Deuteronomi

32 E AKARONGO mai ana, e te rangi e, e karanga atu na au; e akarongo mai, e te enua e, i te tuatua a toku vaa.

2 Mei te ua e topa ra taku tuatua kia topa, e toku reo mei te au e topatapata ra; mei te ua tîāu ki runga i te ngangaere ra, e mei te ua kavau ki runga i te rakau rikiriki ra:

3 E akakite oki au i te ingoa o Iehova: e akamaata kotou i to tatou Atua.

4 Ko te Mato aia ko tei tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!

5 Kua kino ratou, kare oki to ratou titoutou i to tana ra au tamariki: e uki māro e te mingi.

6 Te pera ra kotou i te tutaki ia Iehova, e tera ra au tangata manako kore, e te pakari kore ra? kare ainei aia i toou Metua i tei oko ia koe na? kare ainei aia i tei anga ia koe e tei akatinamou ia koe?

7 Ka akamanako ana i te au rā taito ra: e akamaara oki i te au mataiti o tera uki ma tera uki: ka ui ana ki toou na metua, e nana e akakite mai kia koe; ki to aronga pakari, e na ratou e tuatua mai kia koe.

8 Ka tua aere ei Tei Teitei i ta te pa enua ra tuanga, ka akapueurikiriki ke ei aia i te tamariki a Adamu ra, kua tuku mai aia i to te tangata nei kotinga, ma te akono i te rainga o te tamariki a Iseraela.

9 Ko ta Iehova ra tuanga, ko tona uaorai ïa iti-tangata; ko Iakoba tana tuanga kelero.

10 Kua kite aia iaia i te enua medebara, i te ngai motutaa rikarika ra: kua arataki aia iaia, kua ako aia iaia: kua tiaki aia iaia mei tona uaorai koringo mata.

11 Mei te aeto e erueru i tana koanga, e kapakapa oki ki runga i tana anaunga, e kua totoa oki i tona peau, e kua rave akera ia ratou, kua apai ia ratou na runga i tona peau;

12 Koia katoā Iehova, koia anake tei arataki ia ratou; kare atu e Atua ke atu.

13 Kua akaoro akera aia iaia na runga i te au ngai teitei o te enua nei, kia kai aia i te ua o te au kainga ra; kua angai aia iaia ki te meli o te mato, e ki te inu no roto i te toka tama ra;

14 Ki te bata o te puakatoro, e te u o te mamoe; ki te mamoe toa, e te puakanio toa, o Basana; e te faraoa sitona meitaki ra; kua inu oki koe i te wina, te toto kaui vine ra.

15 Matu atura Iesuruna, e kua takatakai maira: i taua matu noou ra, to maata ra, e to iu i te kai ra, akaruke iora aia i te Atua i anga iaia ra, kare akera i akono i te Mato i oraʼi aia ra.

16 Kua akakoko ratou iaia kia vareae i te au atua ke ra; kua akakoko ratou iaia kia riri i te au mea viivii ra.

17 Kua apai ratou i te atinga ki te au demoni, kare ki te Atua; ki te au atua kare i kitea e ratou ra, ki te au atua ou, no to vaitatao ra, kare i matakuia e to kotou ai metua ra.

18 Ko te Mato i anau ei koe ra, kua maara kore koe iaia; ko te Atua i anga ia koe ra, kua akapoina koe iaia.

19 Kua akara mairā Iehova, e kua riri iora aia, i te akakōkō anga a tana au tamaroa, e tana au tamaine:

20 Kua tuatua akera aia, Ka puroku au i toku mata ia ratou, ka akara ana au i to ratou openga: e uki māro oki ratou, e aronga tamariki kare e akarongo o roto ra.

21 Kua akakoko mai ratou iaku ki te au mea kare te Atua ra; kua akariri mai ratou iaku i to ratou au idolo: e akakōkō oki au ia ratou ki te aronga kare ua e puapinga, e akariri au ia ratou i te iti-tangata kite kore ra.

22 E ai oki tei ka i taua riri noku nei, e ka ka rai e tae ua atu ki ade i raro roa; ka pou te enua e tei tupu iaia ra, ka mura oki nga tumu o te au maunga ra.

23 Ka uipa ua au i te kino ki runga ia ratou; ka akaope au i taku au kakao ki runga ia ratou.

24 E ikoke rava ratou i te onge, e ka pou i te maki veravera, e pou maata rikarika ïa: ka tuku atu oki au i te nio o te au puaka taae ki runga ia ratou, e te kavangia ovi o te one ra.

25 Ka pou to vao ki te koke, e to roto ki te mataku, ko te tangata ou e te paretenia, te kaiu, e te tangata rauru inaina.

26 E tuatua au e, Ka akapueurikiriki au ia ratou, e akangaro takiri ia ratou i o te akangaro takiri ia ratou i o te tangata nei;

27 Aua i te mataku i te makitakita o te enemi, ko te riro aea to ratou au enemi ei aronga nengonengo, ko te tuatua aea ratou e, Na to tatou rima marōrō, kare a Iehova i rave i teia.

28 E iti-tangata tuatua taka kore ratou, kare oki e kite o roto ia ratou.

29 Naringa e pakari to ratou kia kite ratou i teia! e kia manako ratou i to ratou ra openga!

30 E akapeea te tangata okotai kia arumaki i te okotai tausani, eaa e ati ei te tangata okotai ngauru anga i te tausani i nga tangata toko rua nei; aua ratou i okoia e to ratou uaorai mato, aua ratou i tukuia e Iehova ra?

31 Kare oki to ratou mato e tau ki to tatou Mato, i ta to tatou au enemi uaorai ra tuatua anga.

32 No te vine i Sodoma ta ratou vine, no te au kainga i Gomora ra: e vine kavangu ta ratou vine, e kaui kavangia ta ratou;

33 E kavangu tanina ta ratou wina, e te kavangu taae no te asepi.

34 Kare ainei tei iaku nei te reira i te vairanga? e kua topiriia ki roto i toku uipaanga apinga?

35 Tei iaku oki te riri, e te tutaki; i te tuatau i paeke ei to ratou vaevae: kua vaitata to ratou rā e mate ei ra, e tei akono tikaia ra no ratou te aere viviki maira ïa.

36 Na Iehova oki e akatika i tona tangata, e tataraara aia i tona au tavini, kia akara aia e kua kore to ratou ririnui, e kare rava i popaniia i roto, kare ua i toe.

37 Ei reira aia e tuatuaʼi, Teiea to ratou au atua, te mato ta ratou e irinaki ra,

38 Ko tei kai i te tongaua o ta ratou au atinga, e kua inu i te wina o ta ratou au atinga inu? ka tu mai ratou ka tauturu mai ia kotou; ei akapuanga no kotou.

39 Ka akara mai ana, ko au, ko au teia, kare atu e Atua mari ra ko au: tei iaku te ta, e tei iaku te akaora; naku e akaparuparu, e naku katoa e rapakau; kare rava e akaora e oraʼi tei toku nei rima.

40 E apai au i toku rima ki runga i te rangi, ka tuatuaʼi au, E ora mutu kore toku.

41 Kia akakoi au i taku koke kanapanapa, e kia rave toku rima e akautunga, e tutaki atu au i toku au enemi, e akautunga atu rai au i te aronga inangaro kore iaku ra.

42 E akakona au i taku au kakao ki te toto, ei kai oki na taku koke te tangata nei; ki te toto o tei mate rava e to te tuikaa, i te upoko o te ui ariki o te enemi.

43 Ka rekareka, e te au etene, e tona katoa au tangata: ka tutaki oki aia i te toto o tona au tavini, e apai atu aia i te tutaki i tona au enemi; e aroa ra aia i tona enua, e tona uaorai tangata.

44 E aere aturā Mose e kua karanga atura i te au tuatua ravarai o teianei peʼe ki roto i te taringa o te tangata; koia, e ko Iosua te tamaiti a Nuna ra.

45 E ope akera teianei au tuatua i te tuatuaia e Mose kia Iseraela katoa ra:

46 Kua karanga atura aia kia ratou, E akamaara tikai i te au tuatua ravarai taku e karanga atu kia kotou i teianei rā; e na kotou e akaue atu ki ta kotou au tamariki, kia akono e kia rave i te au tuatua ravarai i teianei ture.

47 Kare oki teia i te mea puapinga kore kia kotou; ko to kotou ïa ora; e ko te mea teia e roaʼi to kotou au rā ki runga i te enua, ta kotou e aere i tetai pae Ioridana nei e noo. 48 Kua tuatua mairā Iehova kia Mose i taua rā ra, na ko maira,

49 E aere koe ki runga i te maunga nei ko Abarima, ki runga i te maunga ra ko Nebo, i te enua o Moabi ra, i aite ki Ieriko ra; ka akaraʼi i te enua ra ko Kanaana, taku e oronga nei no te tamariki a Iseraela, ei nooanga.

50 Ka mate atu ei ki runga i tenana maunga taau e aere ki runga na, e kia kapitiia koe ki toou ra iti-tangata; mei to tuakana ra mei ia Aarona i mate ki runga i te maunga ra, ko Hora, e kapitiia atura ki tona uaorai iti-tangata;

51 No te mea kua ara korua iaku i roto i te tamariki a Iseraela i te vai i Meriba-Kadesa, i te medebara ra i Zini; kare akera korua i akatapu iaku i rotopu i te tamariki a Iseraela ra.

52 Ka kite ra koe i taua enua nei ki mua ia koe ra, kare ra koe e tae ki rungao i taua enua ra taku e oronga nei no te tamariki a Iseraela ra.