Iobu

14 KO te tangata ta te vaine e anau nei, e iti ua ona puke rā, e te ki oki i te pekapeka.

2 Te tupu nei aia mei te tiare, e kua motu iora: te rere nei oki aia mei te ata ra, e kare i mou mai.

3 E akapuera ainei oki koe i oou mata ki runga i te reira, e e arataki ainei koe iaku ki te akavaanga, e ko koe katoa ra?

4 E rauka iaai te mea viivii kore no roto i te mea viivii? kare rava ïa.

5 E teianei kua akonoia ona puke rā, tei ia koe te rainga o tona au marama, kua akonoia e koe tona au kotinga, kare aia e topa mai:

6 E ariu ke mai koe iaia, kia akaangaroi ana aia, kia taea tona rā, mei to te tangata i ouia ra.

7 E manakonako anga oki tei te rakau ra e, kia tipuia ra, e kao akaou ïa, e kare e kore te mea tupu ou ra.

8 E pakari oti tona aka i raro i te one, e mate atura te tumu ki runga i te enua;

9 Kia ongi i te vai ra, e tupu akaou ïa, e e tupu akaou tona au rara mei te rakau tanu ra.

10 Ko te tangata nei ra, te mate nei ïa, e popo ua iora: te mate nei oki te tangata, e teiea iora ïa?

11 Mei te vai nei e kore i te roto ra, e te pou nei te vai puke, e kua marō:

12 Kua pera rai te tangata nei, te moe nei ki raro, e kare e tu mai: e kia kore rava te au rangi ra, kare ratou e ara mai, e kare e akatuia mai, i to ratou moe.

13 Naringa koe e akapipini iaku ki te vaarua e, angairi koe e uuna iaku, e kia riro ke toou riri, angairi koe e akataka i te taime noku, ka maara mai ei iaku nei!

14 Kia mate te tangata nei, ka ora akaou ainei aia? E tapapa rai au i oku puke rā i akonoia ra e kia ope, e tae rava atu ki toku tu ke anga ra.

15 Naau e kapiki mai, e naku e io atu kia koe: e tangi rai koe ki te angaanga a to rima ra.

16 Te tatau mai na koe i toku au takainga i tenana: kare ainei koe i tiaki ua i runga i taku ara?

17 Kua topiriia taku ara i roto i te pute, e kua tuiia e koe toku kino.

18 Te maunga i topa ra, te kore nei ïa, e te uri keia nei te mato i tona vairanga.

19 Te pou nei te toka i te vai: e te pou nei te one enua i te maata o te vai; e to te tangata nei manakonako anga te pou katoa nei ia koe.

20 Te upokotu ua nei rai koe iaia kare e tukumoe, e riro atura aia: te akatu ke nei koe i tona mata, e kua tuku atu iaia kia aere na.

21 Kua akangateiteiia tana au tamariki, e kare aia i kite; e kua taakaakaia ratou, kare ra aia i kite ua atu.

22 E riro ra tona kopapa i runga iaia i te mamae, e tona ra vaerua i roto iaia i te aue.