Maseli

22 E NGARI ake te rongo meitaki i te apinga maata ra; e te kite meitakiia mai i te ario e te auro ra.

2 Ka aravei rai te tangata apinga e te tangata apinga kore katoa: na Iehova ratou katoa ïa i anga.

3 E kite mamao te tangata pakari i te kino, e kua pipini iora; te aere ua atura te kite kore, e mate atura.

4 Te tutaki o te taakaaka e te mataku ia Iehova, ko te apinga nui ïa, ko te ngateitei ïa, ko te ora ïa.

5 Ko te rakau taratara e te ereere, tei te arataa o te aronga ketaketa: ko te tapapa ra i tona ngakau, e riro aia i te atea ke atu.

6 E apii i te tamaiti i te arataa e tikaʼi iaia kia aere ra; e kia pakari aia ra, kare e akaruke i taua arataa ra.

7 Te tutara ra te tangata apinga i te ao; e kua riro te ori ei tavini no tei oriia.

8 Ko tei ruru i te kino ra, ko te puapinga kore tana e kokoti; e pou oki aia i te rakau o tona ra riri.

9 E akameitakiia te tangata oronga; no te mea e oronga aia i tana kai na te ao.

10 E tuaru ke atu i te akavaavaa, e riro katoa te taumāro i reira; kore akera ïa te karo e te akakino.

11 Ko tei inangaro i te ngakau mā ra, no te vaa reka nona ra e riro ei te ariki ei taunga nona.

12 Te tiaki ra te mata o Iehova i te kite; e tairipoti ra aia i te tuatua a te rave ara.

13 Te tuatua ra te tangata akatau, E liona tera tei vao akera, ka mate au i te arataa.

14 E vaarua oonu te vaa o te vaine akaturi: ko tei ririia e Iehova ra, ko te inga ïa ki roto ra.

15 Kua mou rava te neneva ki roto i te ngakau o te tamariki: na te pāpā ra, na te ako, e akataka ke atu iaia.

16 Ko tei takinga-kino i te ao kia apingaia tana uaorai, e tei apai i te apinga na te aronga apinga nui, e rokoia tikaia e te putaua.

17 E ariu mai i to taringa, e akarongo mai i te tuatua a te aronga pakari, e tavaitai oki i to ngakau i toku nei kite.

18 E mea mataora oki kia mou piri tikai koe i te reira ki roto i to ngakau na; e kia vaio ua mai oki ki roto i to vaa na.

19 Kia irinaki rai koe ia Iehova, i akakite atu ei au ia koe, ia koe tikai, i teianei au tuatua i teianei rā.

20 Kare ainei au i tata ana i te tuatua meitaki ia koe ra, i te tuatua ako ra e te kite:

21 I te akakite anga atu kia koe i te taka meitaki anga o te tuatua-mou ra; kia akakite atu koe i te tuatua-mou ki te aronga e tono mai i te karere ia koe ra?

22 Auraka e rave i ta te tangata putaua, no te mea e putaua aia; e tei tumatetenga ra, auraka kia takinga-kinoia i te ngutupa:

23 Na Iehova oki e akatika mai ia ratou i ta ratou tuatua, e e āru aia i te vaerua o te aronga i āru i ta ratou.

24 Auraka e akataunga atu ki te tangata rotoriri; e auraka e piri katoa atu ki te aerenga o te tangata riri maata ra:

25 Ko te apii katoa aea koe i tona aerenga, e mou iora to ngakau i te ereere.

26 Auraka e kapiti katoa ki roto i te aronga e mou te rima ra; ki roto i te aronga e riro ei tutaki no te kai ou ra.

27 Kare aau kia apai ei oko ra, eaa oki to roi i raro ake ia koe ra e raveiaʼi?

28 Auraka e kiriti i te kena kainga taito ra, ta to au metua i tuku ra.

29 Te akara ra koe i te tangata i maroiroi i tana taoonga? ei mua i te aroaro o te ui ariki aia e tu ei; kare aia e tu ki mua i te aroaro o te aronga tarevakaua ra.