Roma

4 EAA ta tatou tuatua i ta to tatou tupuna i ta Aberahama i rauka i te kopapa ra?

2 I akatikaia oki a Aberahama i te angaanga ra, e nengonengo anga tona i reira; eiaa ra i mua i te aroaro o te Atua.

3 Te akapeea maira oki te tuatua i tataia ra? “Kua akarongo a Aberahama i te Atua, e akonoia atura ïa ei tuatua-tika nana.”

4 Ko te tangata oki i rave i te angaanga ra, kare te tutaki e karangaia e, e mea aroa ua, e oko ra.

5 Ko te tangata ra, kare e angaanga, i akarongo ra iaia ko tei akatika mai i te akono kore i te Atua, e akonoia oki tona akarongo ei tuatua-tika nana:

6 Mei ia Davida oki i tuatua mai i te meitaki o te tangata ta te Atua i uri mai i te tuatua-tika kare e angaanga ra,

7 I te na ko anga mai e, “E ao to ratou, to tei akakoreia, ta ratou ara, to tei tapokiia to ratou kino.

8 E ao to te tangata, kare i tapepeia e Iehova i te ara.”

9 No te peritome anake ra aina taua meitaki nei, e no te peritome kore katoa aina? te karanga nei oki tatou e, kua akonoia te akarongo ei tuatua-tika na Aberahama.

10 Kiea oki te akono angaia? kia peritomeia aina, e i te vai peritome kore anga aina? Kare i te peritome anga, i te vai peritome kore anga ra i akonoiaʼi.

11 I tukuia maira kiaia te akairo ra e peritome, ei akairo no te tuatua-tika i te akarongo iaia i te vai peritome kore anga; kia riro aia ei metua no te peritome kore ravarai i akarongo ra, kia akono katoaia te tuatua-tika no ratou katoa ra;

12 Ei metua oki no te peritome, no te aronga kare to te peritome anake ua, ko tei aere katoa ra na te ruatapuae o te akarongo o to tatou tupuna ra o Aberahama, i tona peritome kore angaia.

13 Kare oki i to te ture tei karangaia mai kia Aberahama e tona uanga e, ka riro aia ei atu no te enua, no te tuatua-tika ra i te akarongo.

14 Naringa oki ko ratou ko to runga i te ture ra te atu, kua ngere ïa te akarongo, e kua riro tei karangaia maira ei mea puapinga kore.

15 E mate oki to te ture ra; kare ra e ture ra, kare katoa ïa e ara.

16 E teianei tei te akarongo, kia riro ei mea aroa ua; kia rauka tikai tei tuatuaia maira i tona uanga katoatoa; eiaa to runga i te ture anake, to runga katoa ra i te akarongo o Aberahama; ko to tatou katoa ïa metua;

17 (Koia oki tei tataia ra e, “Kua akonoia koe e au ei metua no te pa enua e manganui;”) i mua i te aroaro o te Atua ko tana i akarongo ra, ko tei akaora i tei mate ra, e ko tei karanga i te au mea kare ra, mei te mea e, te vai nei,

18 Ko tei kore oki i akara e kare e tatari anga, akarongo atura ïa ma te tatari e, ka riro aia ei metua no te pa enua e manganui, mei tei karangaia maira, e, “Koia katoa toou na uanga.”

19 E no te mea kare tona i te akarongo parukaua, kare aia i akara kua mate tona kopapa, e kua vaitata oki tona mataiti i te anere, e te mate oki o te kopu o Sara:

20 Kare ua oki aia i turori ua i te akarongo kore i tei tuatuaia mai e te Atua ra; i maroiroi ra aia i te akarongo, ma te akakakā i te Atua:

21 Kua kite tikai oki aia e, ko tana i tuatua maira, ka tika iaia kia akatupu.

22 I akonoiaʼi oki te reira ei tuatua-tika nana.

23 Kare ra nona anake ua i tataiaʼi e, kua akonoia nana;

24 No tatou katoa ra, no te aronga e akono katoaia te akarongo ei tuatua-tika kia akarongo tatou iaia i tei akatu akaou i to tatou Atu ra ia Iesu ki runga mei te mate maira.

25 Ko tei tukuia mai no ta tatou ara e kua akatu akaouia kia akatikaia tatou nei.