Esetera

2 E I MURI ake i teianei au tuatua, anga akera te riri o te ariki ra o Ahasueru, kua manako akera aia ia Vaseti, e tana i rave, e tei akakoroia iaia ra.

2 Kua karanga atura te au tavini o te ariki tei tavini iaia ra, Ei aronga paretenia ou purotu te kimi na te ariki:

3 E akataka ana ra te ariki i te au rangatira i te au enua katoa i tona ra basileia, e na ratou e akaputuputu mai i te au paretenia ou purotu katoa ki te are o te ariki ra i Susana, ki te are o te au vaine, i raro ake i te rima o te tavini ariki a te ariki ra o Hegai, tei tiaki i te au vaine ra; e kia orongaia te au peu no to ratou tamā anga:

4 E te vaine i tau meitakiia e te ariki ra, ei ariki vaine ïa ei tupau ia Vaseti. Mareka akera te ariki i taua tuatua ra; e kua pera atura aia.

5 Tei taua are ariki ra ko Susana tetai ngati Iuda, ko Moredekai te ingoa, e tamaiti na Iaira, te tamaiti a Simei, te tamaiti a Kisa, e ngati Beniamina;

6 Ko tei apai katoaia mei Ierusalema atu i roto i te au tuikaa ra, ratou e te ariki o Iuda ko Iekonia, tei apai keia e te ariki o Babulonia ra e Nebukaneza.

7 E nana i angai ia Hadasa, koia oki ko Esetera, e tamaine na tetai metua nona, kare oki ona metua tane, kare oki e metua vaine, e vaine manea i te tupu anga e te mata reka; ko tei raveia ïa e Moredakai ei tamaine nana uaorai, i te matenga o tona metua tane e te metua vaine ra.

8 E kitea akera te akauenga a te ariki, e tana ture ra, e manganui oki te vaine ou i putuputu ki te are ariki ra i Susana, i te tiakianga ia Hegai, kua arataki katoaiā Esetera ki te are o te ariki ra, ki te rima o Hegai ko tei tiaki i te au vaine ra:

9 Mareka rava akera aia i taua vaine ra, e kiteia aia e ia; kare akera i roa kua apai atura i te au peu o te tamā anga, e tana ra au tuanga i akonoia ra, e nga paretenia toko itu, no roto i te are o te ariki ra, i tau kia orongaia atu nona: e kua tuku atura aia iaia e tana katoa ra au paretenia ki te ngai meitaki rava i te are o te au vaine ra.

10 Kare a Esetera i aaki i tona iti-tangata, e tona kopu-tangata: kua oti oki aia i te ikuia e Moredekai e, auraka aia e aaki.

11 Kare akerā Moredekai i tivata i te aaere ua anga i te au rā katoa ra i mua ake i te paepae i te are o te au vaine ra, kia kite aia ia Esetera i te meitaki anga e te ka tupu iaia ra.

12 Kua oti anake te au marama okotai ngauru ma rua, ko ta te ture ïa tuatua i te au vaine, e arataki tataki taiia ake te au vaine ki te ariki ra kia Ahasueru: ko te tu ïa o te au rā i ope i te tamā anga, e ono marama no te manongi ra e mura, e ono oki marama no te au rakau kakara, e te au mea i rave katoaia e te au vaine no te tamā anga ra.

13 Kia aratakiia te vaine ki te ariki ra, ko tana ra i anoano i te rave no roto i te are o te au vaine ra, e apai ki te are o te ariki ra, kua orongaia atu ïa.

14 Kia aiai e aere ei, e kia ao e oki mai ei ki roto i te rua o te are o te au vaine ra, ki te tavini a te ariki ra kia Sasagaza, ko tei tiaki i te au vaine tavini: kare aia e oki akaou ki roto i te ariki ra, kia kore te ariki e taurekareka maira iaia, e kia kore te ingoa e akaikiia maira.

15 E tae akera kia Esetera, ki te tamaine a Abihaila e metua no Moredekai, ko tei rave iaia ei tamaine nana ra, i te aere ki roto i te ariki ra, kare akera aia i pati, mari ra ko ta te tavini ra a te ariki ra ta Hegai, ko tei tiaki i te au vaine ra, i tuku mai. E i tauia mai a Esetera ki mua i te aroaro o te aronga ravarai i akara mai iaia ra.

16 Aratakiia aturā Esetera ki te ariki ra kia Ahasueru, ki roto i te are o te ariki ra, i te marama okotai ngauru, i te marama ra ia Tabeta, i te itu o te mataiti o tona ra au.

17 Maata rava atura to te ariki inangaro ia Esetera i te au vaine ravarai, akaperepereia mai oki aia e ia e te tauia mai oki i te au paretenia katoa; i tuku mai ei oki aia i te korona ariki ki runga i tona mimiti, e kua akariro iaia ei ariki vaine ei tupau ia Vaseti.

18 Kua akatupu iora te ariki i tetai kaingakai maata, i te kaingakai a Esetera, na te ui ariki e te au tavini katoa nona ra; e kua tuku atura aia i te akaangaroi ki te au enua, e kua oronga i te au apinga i tei tau ki te ariki ra.

19 E kia putuputu akaouia ra te au paretenia ra, te noo ua mairā Moredekai ki te ngutupa o te ariki ra;

20 Kare oki a Esetera i aaki i tona iti e tona kopu-tangata, tei ikuikuia mai aia e Moredekai ra; e akarongo rai oki a Esetera i ta Moredekai i akaue mai, mei iaia katoa i akarongo ka angaiiaʼi aia e ia ra.

21 E tei taua au rā ra, ia Moredekai i noo i te ngutupa o te ariki ra, kua riri iora nga tavini ariki toko rua a te ariki ra, e puke tiaki ngutupa, ko Bigatana e ko Teresa, e kua kimi iora i te ravenga e ta i te ariki ra ia Ahasueru.

22 Kite akera oki a Moredekai i taua mea ra, e kua akakite atura ki te ariki vaine ra kia Esetera; e kua akakite akerā Esetera ki te ariki, e te ingoa o tona kite ko Moredekai.

23 E makitoro marieia iora taua tuatua ra, e kua kitea; riia atura raua ravarai ki runga i te rakau: tataia iora ki roto i te buka, te tuatua o te au rā, i mua i te aroaro o te ariki ra.