Salamo

22 E TAKU Atua! e taku Atua! eaa koe i akaruke mai ei iaku? i ateaʼi koe i te tauturu iaku, e i te tuatua o toku nei ngunguru anga?

2 E taku Atua, te kapiki nei au i te ao, kare ra koe i tuatua mai; e i te po oki, kare ra oku akaea anga ra.

3 Ko koe ra Tei Tapu ra, e tei noo i rotopu i te akameitaki anga o Iseraela.

4 I irinaki ana to matou ai metua ia koe; kua irinaki ratou, e kua akaoraia ratou e koe.

5 Kua kapiki ratou ia koe, e kua akaoraia; i irinaki ana ia koe, e kare i akama.

6 E toke ra au nei, kare te tangata; e akakinoanga na te tangata, e ta te tangata ïa akavaavaanga.

7 Te aronga katoa e akara mai iaku nei, te kata aviri maira iaku; kua akatiitii ratou i te ngutu, kua takirikiri ratou i te mimiti, te na ko ra,

8 I irinaki ana aia ia Iehova, kia ora aia: kia akaora aia iaia, i na e mataora oki aia nana.

9 Naau ra au i rave mai mei roto i te kopu: i moe mataku kore uaʼi au ia koe i runga i nga u o toku metua vaine.

10 Kua tukuia atu au kia koe mei te kopu mai: ko toku Atua oki koe mei te kopu mairai o toku metua vaine.

11 Auraka e akamamao ke atu iaku; te vaitata mai nei oki te tumatetenga; kare atu oki e tuaturu.

12 E manganui te puakatoro i akapini mai iaku: te au puakatoro ririnui i Basana tei takako mai iaku nei.

13 Kua amama maira to ratou vaa iaku, mei te liona ngunguru ra kia kimi i te kai.

14 Mei te vai i riringiia ra au, e kua manuku anake toku au ivi: mei te tapou nei toku ngakau; kua taravai i roto i toku nei kopu.

15 Kua marō toku maroiroi mei te vaanga kapu karakaraea ra; e kua piri toku arero ki toku tanga; e kua tuku koe iaku ki raro i te one mate ra.

16 Kua akapiniia au e te au puaka-aoa: kua takako roaia e te uipa anga tangata kino ra: kua puta oku puke rima e oku puke vaevae ia ratou.

17 E rauka iaku kia tatau i toku au ivi katoa: te akara ua maira, te tiroi matariki maira iaku.

18 Te tua nei ratou i toku au kakau no ratou, e te akatopa kelero nei i toku pereue.

19 Auraka koe, e Iehova, e akamamao ke atu iaku nei; e toku maroiroi, kia ngakoikoi mai koe i te tauturu mai iaku.

20 E akaora koe i toku vaerua i te koke nei; taku akaperepere i te riri o te puaka-aoa.

21 Kia ora au i te vaa o te liona: i akarongo anga oki koe iaku i runga i nga tara o te puaka toro taetaevao ra.

22 E akakite au i to ingoa i toku ra au taeake: e akapaapaa au ia koe i roto i te uipa anga ra.

23 Ko kotou ko tei mataku ia Iehova ra, e akapaapaa kotou iaia; kotou ravarai te au uanga o Iakoba, koia ta kotou e akakakā; e kotou katoa te au uanga o Iseraela, e mataku kotou iaia.

24 Kare oki aia i akavaavaa, kare oki i akakino, i te tairoanga o tei tairoia ra: kare oki i uuna i tona mata iaia; kia kapiki ra aia kiaia ra, kua akarongo maira aia.

25 Ko koe taku e akapaapaa i roto i te uipa anga maata ra; ka akatupu au i taku i tia ra i mua i te aroaro o te aronga e mataku iaia ra.

26 Ka kai te aronga akaaka e kia merengo: ko tei kimi ia Iehova ra ka akapaapaa ratou iaia: ka ora rai to kotou ngakau e tuatau ua atu.

27 To te au openga katoa o te enua nei, ka akamaara, e ka ariu mai kia Iehova: ka ope te au kopu-tangata o te ao nei i te akamori iaia.

28 No Iehova oki te basileia; e koia te tutara i te pa enua.

29 Ka kai te aronga apinga o te enua nei e ka akamori: te aronga katoa e tae ki raro i te one ka tupou ki mua iaia, e tei kore e ora iaia uaorai.

30 Na tetai pae uanga e akarongo iaia; e ka tatauia ïa ei uki no te Atu.

31 Ka tae mai ratou, e e akakite i tana ra tuatua-tika ki tetai aronga tangata te ka anau mai e, nana teia i rave.