Ebera

4 E TEIANEI, kia mataku tatou e tikaʼi, ko te tuatua oki i vaooia e ka o tatou ki roto i te akaangaroianga o te Atua ra, ko te topa ua atu aea etai o kotou na ki muri.

2 Te tuatuaia nei oki taua evangelia ra kia tatou nei, i tei tuatuaia kia ratou ra; kare ra ratou i puapingaia i taua tuatua i tuatuaia atu kia ratou ra, no te mea kare i ārikiia i te akarongo e te aronga i kite ra.

3 Ko tatou oki e akarongo nei, ka o ïa ki roto i te akaangaroianga, ko tana oki i tuatua ra e, “Ko tei taputouia e au i toku riri anga ra e, Auraka roa ratou kia o i toku ra akaangaroianga;” oti uaʼi te au angaanga mei muatangana mairai o teianei ao.

4 Te na ko maira oki aia i tetai ngai i te tuatua i te rā itu ra e, “Noo ua iora te Atua i te rā itu i tana katoa ra angaanga.”

5 E i teianei rai oki salamo, “Auraka roa ratou kia o i toku ra akaangaroianga.”

6 E teianei kia o rai tetai aronga ki roto e tikaʼi; e kare taua aronga i tuatuaia atu i te evangelia i muatangana ra i o i te akarongo kore:

7 Kua akono rai te Atua i tetai rā, i te na ko anga mai ia Davida ra e, “I teianei rā,” roa uaʼi te tuatau i topa; mei tei karangaia ra e, “Kia tika ia kotou i teianei rā i te akarongo i tona reo, auraka e akamārokiakia i to kotou ngakau.”

8 Naringa oki a Iosua i oronga i te akaangaroianga no ratou, kare oki te Auta e na muri i te akakite mai i tetai.

9 E teianei te vai ra mari te akaangaroianga no te tangata o te Atua.

10 Ko tei o oki i tona akaangaroianga ra, e akaangaroi ïa aia i tana uaorai angaanga, mei te Atua oki i tana.

11 E teianei, e akamaroiroi tatou i te akao i taua akaangaroianga ra, ko te topa atu aea tetai, mei ia ratou i topa i te akarongo kore.

12 E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.

13 Kare rava e mea ngaro iaia: te vai ua nei ra te au mea katoa ma te maeu rava ki mua i tona mata, tei iaia te tuatua ia tatou nei.

14 E teianei, e taunga maata teitei to tatou, i riro akenei ki runga i te rangi, ko te Tamaiti a te Atua ra ko Iesu, e tāpu marie rai tatou i ta tatou tuatua.

15 Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara.

16 E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.