Daniela

6 E MEA meitaki ia Dariu kia akatu aia i nga tutara okotai anere e rua ngauru ki runga i taua basileia ra, ei runga ïa ratou i te basileia katoa ra.

2 Ei runga ia ratou ra nga akaaere ïa toko toru; e ko ratou nei ko Daniela tei mua: kia apai mai te au tutara i te tuatua kia ratou, e auraka kia ngere te ariki ra.

3 Akateiteiia aturā Daniela ki runga i te au akaaere e te au tutara, no te mea e ngakau meitaki roa tei roto iaia; te manako ra oki te ariki e tuku iaia ki runga i taua basileia katoa ra.

4 Kua kimi iora nga akaaere e te au tutara i tetai tapepe anga ia Daniela i taua basileia ra; kare akera i kitea ia ratou te tapepe anga atu, e te kino; no te mea e tuatua pikikaa kore tana, kare roa oki e tatipake e te kino i kitea iaia.

5 Kua tuatua akera taua au tangata i reira ra, Kare rava a tatou tapepe anga e kitea i taue Daniela nei, mari ra ei te ture a tona uaorai Atua e raukaʼi.

6 Kua akaputuputu iora aua nga akaaere e te au tutara ki o te ariki ra, e kua na ko atura kiaia, E te ariki ra e Dariu, kia ora koe e tuatau ua atu.

7 I tuatua ana nga akaaere ravarai o te basileia nei, te au tutara, e te ui ariki, te au tumu korero, e te au rangatira, e akatu i tetai ture ariki, e kia riro oki ei ture mou, e ko te tangata kia pati i tana patianga ki tetai atua ke, e tetai tangata ke, mari ra kia koe ra, e te ariki, e kia po toru ngauru ake, e titiriia ïa ki roto i te vaarua o te au liona ra.

8 E teianei, e te ariki, e akamou koe i taua ture nei, e tata oki i to ingoa ki tei tataia nei, kia kore e taruri keia, mei te ture a to Madai e to Peresia, kare e taruri keia ra.

9 Kua tata atura te ariki ra ko Dariu i tona ingoa ki taua tuatua i tataia ra e taua ture ra.

10 Kite ua rai a Daniela e kua akairoia taua tuatua i tataia ra, kua aere atura aia ki roto i tona are; e te vai tuera ua ra te au māramārama o tona pia ki te pae ki Ierusalema, tuturi iora aia ki raro, tutoru tuturi anga i te rā okotai, e kua pure iora, e kua akameitaki i tona Atua, mei tana oki i rave i muatangana ra.

11 Kua akaputuputu maira taua au tangata ra, e kua kite atura ia Daniela i te pure anga, e te pati anga atu, ki mua i tona Atua.

12 Kua akavaitata iora ratou i reira, e kua tuatua iora ki mua i te ariki ra i taua ture a te ariki ra; Kare ainei koe i akairo i tetai ture ra e, te tangata ravarai e pati i tana patianga ki tetai atua ke, e tetai tangata oki, mari ra ia koe, e te ariki, e kare e ope nga rā e toru ngauru ra, e titiriia ïa ki roto i te vaarua o te au liona ra? Kua tuatua maira te ariki, na ko maira, Kua tinamouia ïa tuatua, mei te ture a to Madai e to Peresia, ko tei kore e taruri keia ra.

13 Kua karanga atura ratou, na ko atura, ki mua i taua ariki ra, Ko Daniela, no te tamariki o Iuda i tuikaa ra, kare ïa i akono ia koe, e te ariki, e te ture i akairoia e koe, tutoru oki ana pure anga i te rā okotai.

14 Akarongo akera te ariki i taua tuatua ra, kua kinokino roa iora iaia uaorai, e kua riro takiri tona ngakau ia Daniela e akaora iaia, e kua tauta iora aia, e topa ua atura te rā i te akaora anga iaia.

15 Kua akaputuputu maira teianei au tangata i reira ra ki te ariki, e kua karanga atura ki te ariki, Kia kite mai koe, e te ariki, ko te ture a to Madai e to Peresia, ko teia ïa, kare rava e ture, e kare rava e tuatua, i akamouia e te ariki ra, e tika kia akatu ke.

16 Kua akaue akera te ariki, e kua arataki maira ratou ia Daniela, e kua titiri atura ki roto i te vaarua o te au liona. Kua tuatua maira te ariki, na ko maira kia Daniela, Ko toou Atua, taau i akamori tamou ra, nana koe e akaora.

17 E kua apaiia maira tetai toka e kua tukuia iora ki runga i te vaa o taua vaarua ra; e kua akairoia e te ariki ki tana uaorai akairo, e ki te akairo a te ui mataiapo ki ona ra, kia kore e taruri keia te ture ia Daniela.

18 Kua aere atura te ariki i reira ra ki tona uaorai are ariki, e ao akera te reira po i te akakoreanga i te kai: kare oki i aratakiia mai te au vaine tavini ki mua iaia: kare ua akera aia i varea i te moe.

19 Kua tu akera te ariki ki runga i te popongi metua tikai, e kua aere viviki atura ki te vaarua o te au liona.

20 E kia tae atura aia ki taua vaarua ra, kua kapiki atura kia Daniela ma te reo tangi: Kua karanga atura te ariki, na ko atura, kia Daniela, E Daniela, e te tavini o te Atua ora ra, kua tika ainei i toou Atua, taau i akamori tamou ana, i te akaora ia koe i te au liona?

21 Kua tuatua mairā Daniela ki te ariki. E te ariki e, kia ora koe e tuatau ua atu.

22 Kua tono mai taku Atua i tana angela, e kua topiri i te vaa o te au liona, e kare ua ratou i rave kino mai iaku: no te mea te kitea ra te ara kore i roto iaku nei ki mua i tona aroaro; e ki mua katoa ia koe, e te ariki, kare oki au i rave ana i te kino.

23 Rekareka rava akera te ariki i reira, e kua akaue atura kia raveia mai a Daniela ki runga mei raro mai i taua vaarua ra. E kua raveia mairā Daniela ki runga mei raro mai i taua vaarua ra, e kare rava e pakiko i kitea i runga iaia, no te mea kua irinaki aia i tona ra Atua.

24 E kua akaue atura te ariki, e kua arataki maira ratou i taua aronga tangata ra i tapepe ia Daniela, kua titiri atura ratou ia ratou ki roto i te vaarua o te au liona, ko ratou e ta ratou au tamariki, e ta ratou au vaine; e kare akera ratou i tae ki raro i te takere o te vaarua, noniia maira ratou e te au liona, ungaungātiti roa akera to ratou au ivi.

25 Kua tata atura te ariki ra ko Dariu i reira ra ki te au tangata katoa, te pa enua, e te au reo, e noo ki te enua katoa nei; Ei au nuingangare to kotou.

26 Te akatu nei au i tetai ture, E kia ruketekete te tangata e pini ua ake te au matakeinanga i toku nei basileia, e kia matakutaku, ki mua i te aroaro o te Atua o Daniela; koia te Atua e ora nei, e kare e ngaueue e tuatau ua atu, kare roa oki tona basileia e kore, e mana oki tona e tae rava atu ki te openga.

27 Te akaora nei aia, e te tuku nei kia aere, e te rave nei aia i te au ravenga taka ke, e te mea umereia, ki runga i te rangi, e te enua katoa nei, ko tei akaora ia Daniela i te ririnui o te au liona.

28 Meitaki atura taua Daniela nei i te au o Dariu, e i te au o Kuro te Peresia.