1 Samuela

20 KUA oro mairā Davida mei Naiota mai i Rama ra, e kua aere maira kia Ionatana ra, e kua tuatua maira, Eaa taku nei i rave? Eaa toku nei kino? Eaa taku nei ara i toou na metua i kimi mai ei aia iaku nei kia mate?

2 Kua karanga atura aia, Auraka rava ïa; kare koe e mate: i na, kare a toku metua e mea e rave i te mea maata e te mea iti e kore ei i te akakite mai kiaku; eaa oki toku metua e uunaʼi i tera ra iaku nei? kare tena.

3 Kua taputou iora Davida, kua tuatua maira, Kua kite pu tikai toou metua e, te tauia maira au e koe ra, e te tuatua ra aia e Aurakā Ionatana kia kite i taua mea nei, ko te aue aea aia: te ora rā Iehova, e te ora ra koe na, okotai ua ake takainga vaevae i te atea iaku nei e te mate.

4 Kua karanga aturā Ionatana kia Davida, Ko taau e anoano ra, naku ïa e rave.

5 Kua tuatua mairā Davida kia Ionatana, I na, apopo te marama ou, e kia tae katoa au ki te kaingakai a te ariki ra e meitaki ei: e tuku akena ra koe iaku, kia pipini au i te kainga e kia tae ki te toru o te rā i te aiai ra.

6 E kia ui ua ake to metua iaku nei, e karanga atu koe e, I tuatua raurau mai a Davida kiaku kia tuku atu au iaia, kia oro ra aia ki Betelehema ki tona uaorai oire; e atinga mataiti ta taua kopu-tangata katoa ra i reira.

7 E kia tuatua mai aia ra, E meitaki ïa; kua ora to tavini nei i reira: kai riri roa ra aia, te akakoro ra aia i te kino iaku nei, kia kite mai oki koe.

8 E takinga-meitaki mai oki koe i to tavini nei; kua kapiti katoa oki koe i to tavini nei kia koe i tetai koreromotu ia Iehova ra; e ara tika ra taku ra, ko koe uaorai te ta mai iaku nei: eaa ïa puapinga kia kave koe iaku ki to metua ra?

9 Kua karanga aturā Ionatana, Auraka rava ïa te reira; naringa oki au i kite pu tikai e, te akakoro ra toku metua i te rave kino ia koe, kare ainei au e akakite atu kia koe i te reira?

10 Kua tuatua mairā Davida kia Ionatana, Kia tuatua taivaiva mai to metua kia koe ra, naai e akakite mai kiaku nei?

11 Kua karanga aturā Ionatana kia Davida, Taki aere taua ki te kainga akera. Kua aere iora raua ki taua kainga ra.

12 Kua karanga aturā Ionatana kia Davida, Na te Atua o Iseraela na Iehova e akara mai, e kua unuunu atu au i toku metua apopo e apopo atura, peneiake ko te meitaki tona ngakau ia Davida, kia kore au e tono i te tangata kia k oe, e akakite kia koe ra;

13 Kia pera mai a Iehova, e kia maata ua atu, kia Ionatana: e kia manako oki toku metua e e takinga-kino ia koe ra, e akakite rai au kia koe i reira, e ka tuku atu au ia koe kia aere ua ana ma te ora. Kia vaitata mairā Iehova ia koe, mei iaia i vaitata mai i toku metua ra,

14 Te ora ra au i reira, ei takinga-meitaki taau iaku i te takinga-meitaki a Iehova, kia kore au e mate:

15 E auraka rava oki kia mutu toou takinga-meitaki i toku ngutuare, e ope ua atu te au enemi katoa nei i te mate ia Iehova.

16 Kua papau iorā Ionatana i te koreromotu i te ngutuare o Davida, i te na ko anga e, Kia umuumu mai a Iehova i te tutaki i te reira i te rima o to Davida au enemi.

17 Kua akataputou akaou aturā Ionatana ia Davida, no te mea e aroa aia iaia, kua aite katoa oki tona aroa iaia i te aroa iaia uaorai.

18 Kua karanga aturā Ionatana kiaia, Apopo te marama ou; e no te mea kare e tangataia toou nooanga, ka riro koe i te uiia.

19 E kia po toru ake toou noo anga, ka aere viviki ei koe ki raro, e tae ua atu ki te ngai i pipiniia e koe i te rā i kimiiaʼi te angaanga, ka noo atu ei i vaitata i te toka ra ko Ezela.

20 E naku e akainana atu nga kakao e toru i te reira pae toka, mei te mea e te akainana ra au ki te akairo.

21 E i na, naku e akaue i tetai tamaiti, e karanga atu au e, Ka aere ka kimi i nga kakao. E kia tuatua pu tikai au ki taua tamaiti ra e, I na, tei ko nei mai te kakao tei vaitata mai, ka tiki mai ana; e aere mai koe i reira: te ora ra oki a Iehova, e ora toou i reira, kare ïa e kino.

22 Kia na ko ra au ki taua tamaiti ra e, I na, tei ko roa atu nga kakao; ka aere koe i reira; ko Iehova oki tera e tono ia koe ra e aere ke.

23 E te tuatua ta taua i tuatua ra, i na, ko Iehova tei rotopu ïa ia taua e tuatau ua atu.

24 Kua pipini aturā Davida i taua kainga ra: e tae akera ki te marama ou ra , kua noo iora te ariki ki raro e kai i te kai.

25 Noo iora te ariki i tona uaorai nooanga mei tei muatangana ra, i te nooanga i te pae are ra: e kua tu ua akerā Ionatana, e tei tetai pae a Abenera ia Saula ra: te vai ua ra to Davida nooanga.

26 Kare rā Saula i tuatua ua mai i te reira rā: i manako oki aia e, Kua rokoia aia e tetai mea ke, e kare paa i mā; koia rai ïa, kare paa i mā.

27 Kia popongi ra i te rā rua o taua marama ra, te vai ua ra taua nooanga o Davida ra: kua tuatua mairā Saula ki tana tamaiti kia Ionatana, Eaa te mea i kore ei i tae mai te tamaiti a Iese ki te kaingakai nei i nanai e teia katoa rā?

28 Kua karanga aturā Ionatana kia Saula, Kua tuatua raurau mai a Davida kiaku e tuku iaia e aere ki Betelehema:

29 Kua tuatua maira aia, Teia taku tuatua kia koe, e tuku ana koe iaku; e atinga oki ta to matou kopu-tangata i taua oire ra; e kua akaue mai taku tuakana kiaku e aere ki reira; e teianei, kia tika ia koe ra, e tuku koe iaku, ko taku ïa tuatua kia koe, kia kite oki au i toku au tuakana. I kore ei aia i tae mai ki te kaingakai a te ariki.

30 Kua tupu rava akera to Saula riri ia Ionatana, e kua tuatua maira aia kiaia, E tera tangata māro kaitamaki e, kare aina kua kite au e, kua iki koe i tera ra tamaiti na Iese ei akakino ia koe uaorai, e ei akakino kia akama to metua vaine uaorai?

31 Te noo ra taua tamaiti a Iese i te enua nei kare rava koe e toou ra basileia e akatinamouia. E tenana e tono i te tangata e arataki mai iaia i ko nei kiaku nei, kua tau oki aia i te mate.

32 Kua karanga aturā Ionatana ki tona metua kia Saula, e kua na ko atura kiaia, Eaa aia ka taiaʼi? eaa tana ara?

33 Kua vero mairā Saula i tetai tao iaia kia mate; kite akerā Ionatana e te akakoro tika ra tona metua e tamate rava ia Davida.

34 Kua tu akerā Ionatana ki runga i taua kaingakai ra ma te riri maata; kare rava aia i kai i te manga i taua rā rua o te marama ra: kua aue iora aia ia Davida, e no te mea kua taakama mai tona metua iaia.

35 E popongi akera, aere aturā Ionatana e tetai tamaiti iti katoa ki taua kainga ra, i te taime i akaaiteiteia kia Davida ra.

36 E kua karanga atura aia ki taua tamaiti nana ra, Ka oro, ka kimi i te kakao taku akainana atu. Kua oro iora taua tamaiti ra, kua akainana atura aia i tetai kakao i mua roa atu i taua tamaiti ra.

37 E tae atura taua tamaiti ra ki te vairanga o taua kakao i akainanaia e Ionatana ra, kua kapiki aturā Ionatana ki taua tamaiti ra, na ko atura, Kare aina tei ko roa atu te kakao?

38 E kua kapiki atura oki a Ionatana ki taua tamaiti ra, Aere viviki, kia ngakokoi, aua e tavare. Kua rave iora taua tamaiti a Ionatana ra i nga kakao, e kua aere maira ki tona pu ra.

39 Kare ra taua tamaiti ra i kite iti ake; ko Ionatana anake ra raua ko Davida tei kite i taua mea ra.

40 Kua tuku aturā Ionatana i taua taoonga nana ra ki taua tamaiti nona ra, e kua karanga atura kiaia, Ka aere, ka apai ana ki roto i te oire.

41 E kia riro taua tamaiti ra, kua tu akerā Davida mei te pae i apatonga ra, e kua tupou anga: e kua oongi iora raua ia raua uaorai, e kua aue iora raua, e aue maata roa ra to Davida.

42 Kua karanga aturā Ionatana kia Davida, Kia ora koe i te aerenga, kua taputou akenei oi taua ravarai i te ingoa o Iehova, kua tuatua oki e, Ko Iehova tei rotopu ia taua nei, e toku ra uanga, e toou ra uanga e tuatau ua atu. Kua tu akera aia i aere atura; e kua oki mairā Ionatana ki roto i te oire.