1 Samuela

21 AERE aturā Davida ki Noba ki te taunga ra ki Ahimeleka; mataku ua iorā Ahimeleka i te aravei anga ia Davida, e kua tuatua maira kiaia, Eaa koe i aere ua mai ei, e kare oou e tangata?

2 Kua karanga aturā Davida ki te taunga ra kia Ahimeleka, E tuatua ta te ariki i akaue mai kiaku nei, ek ua tuatua mai kiaku ra e, Auraka rava tetai tangata kia kite i tenana tere taku i tono ia koe nei, tei akaueia atu koe e au ra: e kua akonoia e au te ngai e aravei mai ei toku ra au tangata iaku.

3 E teianei, ko taau ra manga kai i rauka, ko te apai mai ïa, e rima akera tupe faraoa ra; e kare ra, ko tei rauka ua mai.

4 Kua tuatua maira te taunga kia Davida, na ko maira, Kare au faraoa noa i ko nei, kareka e faraoa tapu, teia ïa; tei te au tangata ou na, kare i rave i te vaine ra, e tika ïa.

5 Kua karanga aturā Davida ki taua taunga ra, na ko atura kiaia, Kare oki a matou vaine e po toru akenei, mei iaku rai i riro maira, kua tapu oki te āriki o te au tangata ou nei, e kua tu noa oki te faraoa, no te mea e faraoa ou i akatapuia i teianei rā i roto i te āriki.

6 Kua tuku maira te taunga i te faraoa tapu nana; kare atu oki o reira e faraoa mari ra ko taua faraoa o te aroaro ra, ko tei raveia mai mei mua mai i te aroaro o Iehova ra, ka tuku atu ei i te faraoa maana i taua vairanga ra, i te rā i raveia mai ei tera.

7 Tei reira tetai tavini o Saula i taua ra ra, te noo ra ki mua i te aroaro o Iehova; ko Doega tona ingoa, e ngati Edoma, ko te tangata maata i te au tiaki anana a Saula ra.

8 Kua karanga atura oki a Davida kia Ahimeleka, Kare aau e korare e te koke i ko nei? kare akenei oki au i rave mai i taku koke, e taku ra taoonga, no te mea e tuatua na te ariki kia ngakoikoi rai te rave.

9 E te tuatua maira te taunga ra, Te koke a te Philiseti ra a Golia taau i ta i te o ra ko Ela, i na, tera ake ïa, tei muri mai i te tiputa, kua vaîia ki te kakau; e rave koe i te reira ra, ka rave; kare atu oki e koke i ko nei, mari ra ko te reira. Kua karanga aturā Davida, Kare ïa koke e aite ki te reira; o mai ana kiaku.

10 Kua tu akerā Davida ki runga, oro atura i taua rā ra i te mataku ia Saula, aere atura ki te ariki o Gata ra kia Akisa.

11 Kua tuatua akera te au tavini o Akisa kiaia, Kare ainei teia ko Davida te ariki o taua enua nei? kare aina koia teia ta ratou e peʼe aere i te ura anga, i te na ko anga e, Kua mate ta Saula e kua tausani! kua ngauru ra te tausani i ta Davida?

12 I vaoo marie iorā Davida i taua tuatua ra ki roto i tona ngakau; e mataku rava akera aia i te ariki o Gata ra ia Akisa.

13 Kua akatu ke iora aia ki mua ia ratou, kua akaneneva aia iaia uaorai i rotopu ia ratou ra, kua tata aere iora i nga ngutupa i te tomoanga ra, e kua akatopa ua i te uavare ki runga i tona kumikumi.

14 Kua karanga aturā Akisa ki tona au tavini, I na, kua nenevaia tera ra tangata: eaa kotou i arataki mai ei iaia kiaku nei?

15 No te kore e tangata neneva i oku nei, i arataki mai ei kotou i tera ake kia akapeu neneva ki mua i toku aroaro nei? e tae ainei oki tera ake ki roto i toku are?