Isaia

63 KOAI teia i aere mai mei Edoma mai? mei Bozara mai ma te kakau tukuia? Teia ko tei manea i tona kakau, i te aere anga ma te maata o tona ririnui? Ko au ïa, ko tei tuatua i te tuatua-tika, ko tei mana kia akaora ra.

2 Eaa i kutekute ei toou kakau? e mei to te tangata i takatakai i te taomi anga wina toou ra kakau?

3 Ko au anake rai tei takatakai i te taomianga wina; kareka te au tangata ra, kare rava ïa, ko au anake ra: kua takatakai oki au ia ratou ma toku riri; e kua takatakai au ia ratou ma toku riri akaoko ra; i îî ua mai ei to ratou toto ki runga i toku kakau; e kua avaava iaku toku kakau katoa nei.

4 No te mea tei toku ngakau te rā akaoko anga, e kua tae ki te mataiti o tei okoia e au ra.

5 Kua akara iora au, e kare rava e tauturu; e kua va ua iora au, no te mea, kare rava e toko: i raukaʼi i toku uaorai rima te ora naku; e na toku uaorai riri i turu mai iaku.

6 Kua takatakai au i te au tangata i toku riri, e atiati akera ratou iaku i toku ra riri akaoko; maringi iora to ratou toto iaku ki raro i te one.

7 Ko te aroa o Iehova taku e akaiki ra, te akameitaki ia Iehova, i te au mea katoa ta Iehova i oronga mai no tatou; e te takinga-meitaki maata ki te ngutuare o Iseraela, tana i oronga no ratou ra, no tona aroa, e te takinga-meitaki maata nona ra.

8 I tuatua oki aia e, E iti-tangata rai oki ratou noku, e tamariki ïa kare e pikikaa mai; riro atura aia ei Akaora no ratou.

9 I to ratou katoa ra au mate kare aia i te enemi, na te angela ra o tona aroaro ratou i akaora; no tona inangaro e tona tangi i oko ei aia ia ratou; e nana ratou i apai, e kua maranga ratou iaia, i te au rā katoa mei ito mairai.

10 Kua meameaau ra ratou, e kua akariri i tona Vaerua Tapu: riro iora aia ei enemi no ratou, e kua tamaki maira ia ratou.

11 Kua akamaara ra aia i te au rā taito ra, ko Mose, e tona iti-tangata, i te na ko anga e, Teiea aia i arataki mai ia ratou mei raro mai i te tai ra, e te tiaki katoa o tana ra anana? teiea oki aia i tei tuku i tona Vaerua Tapu ki roto iaia ra?

12 I te arataki anga i te rima katau o Mose, i tona uaorai rima kakā; i te vevete anga i te moana na mua ia ratou, kia akariro aia i tona ingoa ei ingoa ngaro kore?

13 I te arataki anga ia ratou na te moana? mei te oroenua i te medebara ra, kare ratou i turori.

14 Mei te puaka e eke ki raro i te o ra, na te Vaerua o Iehova i akaanga i tona roi: i pera toou arataki anga i toou iti-tangata, kia riro toou ei ingoa kakā ia koe.

15 Ka akara mai na koe mei te rangi mai, ka akara mai mei toou nooanga tapu e te kakā: teiea toou ra maroiroi e te ririnui? te tangi o toou ngakau, e toou aroa iaku uei, kua tāpuia ainei?

16 Ko koe rai to matou Metua, kore ua atu a Aberahama i te kite mai ia matou nei, e kore ua oki a Iseraela i te akono mai ia matou: ko koe, e Iehova, ko to matou ïa Metua, ko to matou ïa Akaora; mei tupua roa mai toou ingoa.

17 Eaa koe, e Iehova e, i akatareva ke ei ia matou i toou ra au arataa? eaa koe i akapaetaetaʼi i to matou ngakau kia kore e mataku ia koe? e oki mai i to au tavini nei, i te au kopu oki o taau ra tuanga.

18 E noo anga poto ua to toou ra au tangata tapu: kua takatakaiia toou ngai-tapu e to matou aronga enemi.

19 Kua roa akenei matou mei te mea e kare koe i te tutara no matou nei; mei te aronga kare i tapaia i toou ra ingoa.