2 Ariki

6 KUA tuatua maira te au tamariki peroveta kia Elisaia, I na oki teianei ngai ta matou e noo ua i ko nei ia koe nei, e ngai kokota ia tatou nei.

2 Teia ta matou tuatua kia koe, e aere tatou ki Ioridana, ka rave ei i te rakau, taki tai rakau i te tangata okotai, ka akatu ei tatou i tetai ngai no tatou i reira ei noo anga. Kua karanga atura aia, E aere kotou.

3 Kua tuatua maira tetai, Kia tika ia koe, taki aere katoa tatou. Kua karanga atura aia, Kua tika, ka aere au.

4 Aere katoa atura oki aia e ratou katoa. E tae atura ratou ki Ioridana, kua tipu iora ratou i te rakau.

5 Te tipu ra tetai i te rakau, kua topa iora te tapae ki raro i te vai: kua kapiki ua maira, tuatua maira, Aue, e taku pu e! e mea ori oki teia.

6 Kua karanga atura taua tangata o te Atua ra, I ea te topa anga? Kua akakite akera aia i taua ngai kiaia ra. Kua tipu iora aia i tetai rakau iti, kua titiri atura ki taua ngai ra; te mānu ua maira taua auri ra.

7 Kua karanga atura aia i reira, Ka rave. Kua akatika atura aia i tona rima, rave maira.

8 Kua tamaki maira te ariki o Arama ia Iseraela, e ka akaaiteite akera i te tuatua ki tona au tavini ra tuatua akera, Ei tera ngai, e i tera ngai patiaʼi toku puakapa.

9 Kua tono akera taua tangata to te Atua ra i te karere ki te ariki o Iseraela, karanga atura, Kia matakite, auraka koe e aere na te ngai i mea ra; kua tae mai oki to Arama ki raro ki reira.

10 Kua tono atura te ariki o Iseraela i te tangata ki taua ngai i akakiteia mai e te tangata no te Atua ra, e kua ako mamaoia oki aia, e kua ora akera aia, kare oki te tu tai, e kare oki te tu rua ua.

11 Iroiro ngata iora te ngakau o te ariki o Arama i taua mea ra; kua tiki atura aia i tona au tavini, e kua karanga atura kia ratou, Kare kotou e akakite mai kiaku, e koai ua ake i o tatou tei uriuri ki te ariki o Iseraela?

12 Kua tuatua maira tetai tavini nona ra, Kare, e taku pu e te ariki: mari ra ko Elisaia peroveta, tei Iseraela aia, e nana e akakite ki te ariki o Iseraela i te tuatua i tuatuaia e koe i roto i to pia moe ra.

13 Kua karanga atura aia, E aere, e atoro i te ngai i nooia e ia ra, kia tono au i te tiki iaia. E kua tuatuaia mai aia, kua na koia mai, I na, tei Dotana aia.

14 Kua tono akera aia i te oroenua, e te kariota, e te nuku maata ra: kua aere iora ratou i te po, e kua akapini akera i taua oire ra.

15 E kia ara te tavini o te tangata o te Atua ra i te akirata, e aere atura ki vao, i na, e nuku ma te oroenua e te kariota, te akapini maira i te oire. Kua karanga atura tona tavini kiaia, Aue, e taku pu e! Akapeea tatou nei?

16 Kua tuatua maira aia, Auraka e mataku: e maata oki to tatou pae, e iti to ratou.

17 Kua pure aturā Elisaia, e karanga atura, e Iehova e, teia taku tuatua kia koe, e akapuera koe i tona mata kia kite aia. Kua akapuera akerā Iehova i te mata o taua tangata ou ra; kite atura aia: e i na, kua ki te maunga i te oroenua e te kariota ai i te akapini anga ia Elisaia ra.

18 E kia eke maira ratou ki raro kiaia ra, kua pure aturā Elisaia kia Iehova, e karanga atura, E ta mai koe i teianei au tangata kia matapoia, ko taku ïa tuatua kia koe. Taia iora ratou ki te matapo, ta Elisaia i tuatua ra.

19 Kua karanga aturā Elisaia kia ratou, Kare teia i te arataa, kare oki teia i te oire: ka aru mai iaku, e naku kotou e arataki ki te tangata i kimiia e kotou na. Kua arataki ra aia ia ratou ki Samaria.

20 E tae maira ratou ki roto i Samaria, kua karanga aturā Elisaia, E Iehova e, e akapuera koe i te mata o teianei aronga, kia kite ratou. Kua akapuera akerā Iehova i to ratou mata, e kite akera ratou; e i na, tei rotopu i Samaria ra.

21 Kite akera te ariki o Iseraela ia ratou, kua karanga atura aia kia Elisaia, E taku metua, ka ta ainei au? ka ta ainei au?

22 Kua tuatua maira aia, Auraka koe e ta: e ta oki koe i tei tuikaa ia koe i te koke naau e te ana naau? Ei kai te tuku mai ki mua i to ratou aroaro e te vai, kia kai ratou e kia inu, ka aere ei ki to ratou ra pu.

23 Kua akonokono iora aia i te kai maata na ratou: e kua kai anake ratou, e kua inu anake, kua tuku atura ia ratou, aere atura ki to ratou pu. Kare akera nga takanava no Arama i tae akaou mai ki te enua o Iseraela.

24 E i muri ake i te reira, kua akaputuputu iora te ariki o Arama ra ko Bene-adada i te nuku katoa nona, kua aere atura e tamaki i Samaria.

25 E onge maata tei Samaria: e i na, kua tamaki atura ratou i taua oire ra, e oko na akera te mimiti asini i te au ario e varu ngauru i te sekela, e te a o te tuanga o te kaba tutae rupe i te sekela ario e rima, i te maata o te onge.

26 Te aere ua ra te ariki o Iseraela na runga i te patu, kua kapiki ua maira tetai vaine kiaia, tuatua maira, E tauturu mai, e taku pu e te ariki e.

27 Kua karanga atura aia, Kia kore a Iehova e tauturu mai ia koe, ei ea taku e tauturu ei? ei te ngai pāpā sitona ainei? e ei te taomianga vine ainei?

28 Kua karanga atura te ariki kiaia, Eaa tikai koe? Kua tuatua maira taua vaine ra, Teianei vaine tei tuatua mai kiaku e O mai ana i te tamaiti naau, e kai tatou iaia akonei, e apopo tatou ka kai ei i taku.

29 Kua tunu iora matou i taku tamaiti, e kua kai: kua karanga atura au kiaia kia popongi ake, O mai ana i to tamaiti e kai tatou iaia; e kua uuna io nei aia i tana tamaiti.

30 E kite akera te ariki i te tuatua a taua vaine ra, kua aae iora aia i ona kakau; e kua aere na runga i te patu, kua akara iora te au tangata, e i na, e kakau paoa tona tei runga i tona kiri.

31 Kua tuatua akera aia, Kia pera mai te Atua iaku, e kia maata mairai, kia vaoo mairai te upoko o Elisaia te tamaiti a Saphata i runga iaia i teianei rai rā.

32 Te noo ua rā Elisaia i roto i tona uaorai are, e te aronga pakari te noo katoa i ona ra; kua tono akera te ariki i tetai tangata i vaitata iaia: kare ra i tae mai taua karere ra kiaia, i karangaʼi aia ki taua aronga pakari ra, Kare kotou i kite e, kua tono mai teianei tamaiti na te ta tangata i te karere, e rave i toku nei upoko? E akara meitaki ana, kia tae mai taua karere ra, e topiri i te pa, e kia vaoo ua ana aia i reira: kare aina tei murio iaia te pakuku o te vaevae o tona pu?

33 Te karanga ua ra aia kia ratou, i na, kua aere maira te karere ki raro kiaia: kua tuatua akera aia, I na, no ko mai ia Iehova ra teianei kino; eaa atu rai taku kia tiaki ia Iehova?