Isaia

65 KUA kiteia au i te aronga kare i ui iaku; kua kitea au e te aronga kare i kimi iaku: i tuatua ana oki au e, I na ko au, I na ko au, ki te enua kare i tapaia i toku nei ingoa.

2 I akatika ua ana au i oku rima e po ua akenei te rā ki te aronga meameaau, ko tei aere na te arataa meitaki kore, i ta ratou uaorai i kimi ra;

3 Ki te aronga i akaongoongo mai iaku ki mua tikai i toku nei mata kare i tukumoe; ko tei apai i te atinga i roto i te koro ra, e te tutungi anga oki i te rakau kakara ki runga i te toka karakaraea ra:

4 Ko tei noo ki roto i te au vaarua, e ko tei moe ki roto i te au menema, ko tei kai i te kiko puaka maori ra, e te vai o te au mea viivii tei roto ïa i ta ratou au kapu ra:

5 Ko tei tuatua, Kia atea ke atu koe; auraka e akavaitata mai iaku; e tapu maata oki toku i toou. E auai ratou i roto i toku putaiu, e ai ka ua rai e po ua atu te rā.

6 I na, kua tataia i mua i toku aroaro: oti ra ua ana au i te muteki ua, e tutaki ra au, e tutaki atu ki roto i to ratou uaorai umauma,

7 I to kotou au kino, e te au kino o to kotou ra au metua katoa, te tuatua mairā Iehova; ko tei tutungi i te rakau kakara ki runga i te au maunga, e kua akakino iaku ki runga i te au tuaivi: e teianei, e akaaite atu au ki roto i to ratou umauma i te utunga o ta ratou angaanga taito ra.

8 Te na ko mairā Iehova, Mei te wina ou i kitea i roto i te kaui vine ra, e kua karanga iora tetai, Auraka e rave kinoia; te vai ra oki te meitaki tei roto: e pera rai au i toku ra au tavini, kia kore ratou e pou takiri iaku.

9 E arataki mai au i tetai uanga no ko ia Iakoba ra, e tetai e noo i te maunga noku ra no ko ia Iuda ra: e e riro te enua ki tei ikiia e au ra, e na toku aronga tavini e noo ki reira.

10 E riro oki Sarona ei koro no te au anana, e te o ra o Akora, ei moeanga no te au puakatoro: na toku ra iti-tangata tei kimi mai iaku ra.

11 Ko kotou ra, ko tei akaruke ia Iehova, e kua akangaropoina i toku ra maunga tapu, e kua ārikiriki i te kaingakai na Gada, e kua akaki i te atinga inu na Meni.

12 E teianei, ko kotou taku e tatau no te koke; e piko anake kotou ki raro kia taia: no te mea, iaku i kapiki atu, kare akera kotou i îō mai; iaku oki i karanga atu, kare ra kotou i akarongo mai: kua rave ra kotou i te kino ki mua i toku mata nei, e kua iki ra kotou i tei inangaro koreia e au ra.

13 E teianei te na ko maira te Atu ra ko Iehova, I na, e kaikai toku aronga tavini, e pongi ra kotou; i na, e inu toku ra aronga tavini, e mate ra kotou i te kaki vai: i na, e rekareka toku ra aronga tavini, e akama ra kotou:

14 I na, e imene toku au tavini i te rekareka ngakau ra, e pukaoa ra kotou i te mamae ngakau ra, e evakaku oki i te atiati anga o te vaerua.

15 Ka vaoo oki kotou i to kotou ingoa ei taumaa i toku ra aronga ikiia: na te Atu ra oki na Iehova kotou e ta: ka tapa aia i tona au tavini i tetai ingoa ke.

16 Ko tei akaora oki iaia uaorai i te enua nei, ka akaora aia iaia uaorai ki te Atua tuatua-mou ra; e ko tei taputou i te enua nei, e taputou ïa i te Atua tuatua-mou ra; no te mea kua ngaropoina te au mea pekapeka i muatangana, kua uuna keia ïa oki i mua i oku mata.

17 I na oki, te anga nei au i te rangi ou e te enua ou: kare oki te muatangana ra e maaraia, kare e akamanako akaouia atu.

18 E rekareka ra kotou, e e rere ua i te rekareka e tuatau ua atu, i taku e anga nei: i na oki, te anga nei au ia Ierusalema ei akapaapaa anga, e tona ra iti-tangata ei rekareka anga.

19 E rekareka maata oki au ia Ierusalema, e e pingapingareka au i toku ra iti-tangata: kare oki e kitea akaouia i roto iaia, te reo aue, e te reo evakaku.

20 Kare e kitea akaouia ki reira te tamaiti no nga rā iti ua, e te tangata metua kare i akaopeia tona au rā: e tamariki ua tei mate i te mataiti okotai anere ra, e te tangata rave ara tei mate i te mataiti okotai anere ra, e taumaaia ïa.

21 E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira.

22 Kare ratou e patu, e na tetai ke e noo; kare ratou e tanu, e na tetai ke e kai: mei te au rā o te rakau nei te au rā o toku ra iti-tangata; e rekareka tei ikiia e au ra, i te angaanga a to ratou uaorai rima.

23 Kare ratou e angaanga puapinga kore ua; kare e anau tamariki kia mate vave ua: e uanga oki ratou i akameitakiia mai e Iehova, ratou e ta ratou katoa ra au tamariki.

24 E riro oki ïa, ou ratou e kapiki mai ei, kua akatika takere atu au; e te tuatua ua maira ratou, te akarongo ra au.

25 Ko te luko e te punua mamoe okotai rai kai katoa anga, e kai oki te liona i te ngangaere mei te puakatoro ra: kareka te ovi, ko te one-pueu tana kai. Kare ratou e kanga, kare oki e mea e mate ei i toku katoa nei maunga tapu, te tuatua mairā Iehova.