Mareko

10 KUA tu akera aia ki runga, aere atura ki te pae i Iudea ra, i na tera pae i Ioridana; kua uipa akaou maira te tangata tini kiaia i reira, kua apii akaou atura aia ia ratou, tana ïa ravenga tikai.

2 Kua aere maira oki te au Pharisea kiaia ra, kua ui maira, E tika aina i te ture kia kopae te tane i tana vaine? ei timata anga mai na ratou iaia.

3 Kua karanga atura aia kia ratou, na ko atura, Eaa ta Mose i akaue mai ia kotou?

4 Kua tuatua mai oki ratou, Kua tika ia Mose kia tata matou i te tuatua kopae, ka tuku atu ei iaia.

5 Kua karanga aturā Iesu kia ratou, na ko atura, No te māroketaketa o to kotou ngakau i tata ei aia i te reira tuatua:

6 Kareka i muatangana ra, ka angaiaʼi te ao nei, ko te tane okotai ta te Atua i anga, e te vaine okotai.

7 “No reira e akaruke ei te tangata i tona metua tane e tona metua vaine, ka topiri atu ei ki tana vaine;

8 E riro oki raua ei kopapa okotai:” e teianei, kare atura raua i te toko rua, kua kopapa okotai ra.

9 E ta te Atua i topiri ra, auraka te tangata e akataka ke atu.

10 E kua ui akaou maira tana au pipi iaia i roto i te are i taua tuatua ra.

11 Kua karanga atura aia kia ratou, Ko te kopae atu i tana vaine, ka akaipoipo ei i tetai, kua akaturi aia iaia.

12 E kia kopae atu te vaine i tana tane, ka akaipoipo ei i tetai, kua akaturi aia.

13 Kua apai maira ratou i te tamariki ou kiaia, kia akatukia mai aia ia ratou: kua kauvae atura te au pipi i te aronga i apai mai.

14 Kia kite aturā Iesu, mainaina atura, na ko atura kia ratou, Ka tuku mai ana i te tamariki mea riki, kia aere ua mai kiaku nei, auraka e akakoreia atu; mei ia ratou nei oki to te basileia o te Atua.

15 Koia mou taku e karanga atu kia kotou na, Ko tei kore e āriki i te basileia o te Atua mei te tamariki mea riki ra, kare takiri aia e o ki reira.

16 Kua rave atura aia ia ratou, kua ikiiki iora, kua tuku atura i tona rima ki rungao ia ratou, akaora atura ia ratou.

17 E te aere atura aia i te arataa ra, te oro maira tetai tangata, e kua tuku iora i te turi ki muao iaia, kua ui maira kiaia, E te Orometua meitaki, e akapeea au nei e raukaʼi iaku te ora mutu kore?

18 Kua karanga aturā Iesu kiaia, Eaa koe i akameitaki mai ei iaku? ko te Atua anake ra te meitaki.

19 Te kite na koe i te au ture, “Auraka e akaturi, Auraka e ta ua, Auraka e keia, Auraka koe kia riro ei kite pikikaa, Auraka e takinga-kino, E akangateitei i to metua tane, e to metua vaine.”

20 Kua na ko maira aia, E te Orometua, kua ope te reira i te akonoia e au, mei toku ou anga mai.

21 Akara aturā Iesu iaia, aroa atura iaia, na ko atura iaia, Te toe nei rai tetai mea ia koe; ka aere, ka oko i taau apinga, ka apai atu ei na te putaua, e apinga taau i te rangi i reira: e aere mai oki, ka rave i te satauro, ka aru mai ei iaku.

22 Taitaia atura aia i te reira tuatua, aere atura ma te aue, e apinga maata oki tona.

23 Kua akara aturā Iesu e kako rava ake, kua karanga atura ki tana au pipi, Te akao ngata e o te aronga apinga nui, ki te basileia o te Atua!

24 Poitirere atura te au pipi i te reira tuatua. Kua karanga akaou aturā Iesu kia ratou, na ko atura, E te au tamariki e, te akao ngata e o te aronga i irinaki i te apinga, ki te basileia o te Atua!

25 E akao ngoie ake te kamela na roto i te puta nira, i te tangata apinga nui kia akao ki roto i te basileia o te Atua ra.

26 Maata rava akera to ratou uaorai, Koai oki te ka ora?

27 Akara aturā Iesu ia ratou, na ko atura, Kare ïa e tika i te tangata nei, i te Atua ra, kare rave e mea e kore ei e tika i te Atua.

28 Kua tuatua mairā Petero kiaia, I na matou, kua akaruke i te au mea katoa, e kua aru mai nei ia koe.

29 Kua karanga aturā Iesu, na ko atura, Koia mou taku e karanga atu kia kotou nei, Kare e tangata i akaruke i te are, e te au taeake, e te au tuaine, e te metua tane, e te metua vaine, e te vaine, e te tamariki, e te kainga, noku, e no te evangelia nei,

30 E kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.

31 To mua e manganui ra e riro no muri; e to muri ra, e riro ïa no mua.

32 E te aere ua ra ratou na te arataa ki Ierusalema; e na muā Iesu ia ratou i te aere: va ua iora ratou; e aru atura iaia ma te mataku. Kua arataki akaou atura aia i te tino ngauru ma rua ra ki te pae, e kua akamata atura aia i te akakite kia ratou i te au mea e rokoia mai ei aia ra,

33 Na ko atura, I na, te aere nei tatou ki Ierusalema; e e tukuia te Tamaiti a te tangata nei ki te kau taunga nunui ra, e te au tata tuatua; e e akaapa mai ratou iaia kia mate, e tukuia atu oki ki te etene ra:

34 E e taitoito mai ratou iaia, e e pāpā mai, e tutua mai oki i te uavare, e tamate rava mai oki; ka tu akaou ra aia i te po toru ra.

35 Kua aere maira nga tamariki a Zebedaio ra, ko Iakobo e ko Ioane, kiaia ra, na ko maira, E te Orometua, te anoano nei maua kia akatika mai koe i ta maua e pati atu.

36 Kua karanga atura aia kia raua, Eaa to korua anoano kia akatika atu au?

37 Kua tuatua maira raua kiaia, Kia rauka ia koe toou kakā, e noo tetai o maua i to rima katau, e tetai oki i to rima kaui.

38 Kua karanga aturā Iesu kia raua, Kare korua i kite i ta korua i pati mai nei. E tika aina ia korua kia inu i te kapu taku e vaitata i te inu nei, e kia bapetizoia korua i te bapetizo e bapetizoiaʼi au nei?

39 Kua na ko maira raua, E tika ïa ia maua. Kua karanga aturā Iesu kia raua. Ka inu rai korua i te kapu taku e vaitata i te inu nei, e bapetizoia oki korua i te bapetizo e bapetizoiaʼi au nei:

40 Kareka te noo i taku rima katau, e taku rima kaui, kare ïa e tika kia oronga atu au, mari ra no te aronga i akonoiaʼi ra.

41 E kite akera te tino ngauru ra, riri rava akera ratou ia Iakobo raua ko Ioane.

42 Kua karanga aturā Iesu kia ratou, kua na ko atura, Kua kite oki kotou, te tutara nei te ui ariki o te au etene ki runga ia ratou ra, e te aronga nunui ra, te mana ra ïa i runga i to ratou,

43 Kare ra i tika kia akapera i roto ia kotou: ko te anoano i te akamaata i o kotou na, kia riro ïa ei tavini no kotou;

44 E ko te inangaro kia maata aia i o kotou ra, ei tavini akaaka aia no kotou ravarai:

45 Kare oki te Tamaiti a te tangata i aere mai kia taviniia tona, ei tavini ra, e kia oronga atu aia i tona ora ei oko no te tangata e manganui.

46 Kua tae atura ratou ki Ieriko: e kia akaruke aia i Ieriko ma tana au pipi, e te tangata oki e manganui, te noo ra te tamaiti a Timaio, ko Baratimaio matapo ra, i te pae arataa, te pati ra i te apinga.

47 E kite akera aia e, ko Iesu i Nazareta, kua kapiki maira aia, na ko maira, E te Tamaiti a Davida, e Iesu e, e aroa mai koe iaku.

48 I akamuraia atura aia e te tangata e manganui, kia muteki atu: kua maata rava atura tona kapiki, E te Tamaiti a Davida, e aroa mai koe iaku.

49 Kua tu ua iorā Iesu, kua akaue atura e, e kapiki atu kiaia. Kua kapiki atura ratou i taua matapo ra, na ko atura iaia, Auraka e taitaia, ka tu ki runga; te kapikiia maira koe e ia.

50 Kua kopae atura aia i tona kakau, tu akera ki runga, e kua aere maira kia Iesu ra.

51 Kua karanga aturā Iesu, na ko atura kiaia, Akapeea atu au ia koe i toou anoano? Kua na ko maira taua matapo ra kiaia, E Raboni, kia puera taku mata.

52 Kua karanga aturā Iesu kiaia, Ka aere, kua ora koe i toou akarongo. Puera akera tona mata i reira, e kua aru maira aia ia Iesu i te arataa.