Salamo

56 E AROA mai koe iaku, e te Atua e, e anoano apuku ua to te tangata nei iaku; te takinga-kino maira aia iaku i te au rā katoa nei i te tamaki anga mai.

2 E anoano apuku ua maira to toku au enemi iaku i te au rā katoa nei; e manganui tei tamaki mai iaku, ma te nengonengo.

3 Kia rokoia au e te mataku ra, ka irinaki au ia koe ra.

4 Ei roto au i te Atua ka akapaapaaʼi au i tana tuatua; ka irinaki au i te Atua, kare e mataku; eaa ta te kopapa ua nei puapinga kia rave mai iaku?

5 Te ruri ke nei ratou i taku nei tuatua i te au rā katoa nei; to ratou au manako iaku nei, e kino anake ïa.

6 Te uipa ra ratou, te pipini ra ratou, te akairo maira ratou i toku ruatapuae, ka tapapaʼi ratou i toku vaerua.

7 Ka ora ainei ratou i te kino? e titiri atu koe i te au tangata ki raro, ma te riri, e te Atua e.

8 Kua tatauia e koe toku nei au aerenga; ka tuku ana koe i toku nei roi-mata ki roto i taau ra āriki: kare ainei i roto i taau ra tuatua?

9 Me kapiki atu au kia koe na, ei reira e oki ei toku au enemi ki muri; kua kite au i te reira, no te mea tei iaku te Atua.

10 Ei roto au i te Atua ka akapaapaaʼi i tana tuatua! ei roto au ia Iehova ka akapaapaaʼi i tana tuatua!

11 Ka irinaki au i te Atua, kare au e mataku; eaa ta te tangata nei puapinga kia rave mai iaku?

12 Tei runga iaku, e te Atua, taku i tia ia koe ra; ka apai atu oki au i taua tia ra kia koe ma te akameitaki.

13 Kua akaora oki koe i toku vaerua i te mate: kare ainei koe e akamaroiroi mai i oku puke vaevae kia kore e paeke, kia aaere au ki mua i te Atua i te mārama o te aronga i ora ra?