Salamo

65 TE tiaki marie ra te paapaa ia koe, e te Atua, i Ziona; e tei tiaia ra, ka orongaia atu ïa kia koe ra.

2 E tei akarongo i te pure ra e, ka tae te tangata ravarai kia koe na.

3 Kua autu te tuatua kino iaku nei; kareka ta matou au ara, ka tapokiia ïa e koe ra.

4 E ao to te tangata i ikiia e koe, e kua akavaitataia mai e koe kia noo i roto i toou ra au paepae: ka mataora ïa matou i te meitaki no toou ra are, no toou ra nao tapu.

5 Na te au mea mataku, e te tika ra, taau, ta te Atua e oraʼi matou nei, i tuatua mai kia matou nei; ko tei irinakiia e to te au openga o te enua katoa nei, e to te ngai mamao i te moana ra:

6 Ko tei akamou i te au maunga ra i tona ra ririnui; kua tatuaia aia e te mana:

7 Ko tei akamarino i te aruru o te tai, te aruru o tona au ngaru ra, e te oripu ua anga o te tangata nei.

8 To te au ngai openga roa ra, kua rokoia ïa e te mataku i taau ra au akairo: ko te aerenga mai o te popongi, e te aiai, kua akarekarekaia ïa e koe ra.

9 Kua atoro mai koe e kua akamauu i te enua; kua maata roa i te meitaki ia koe i te kauvai a te Atua ra, tei ki i te vai, e meitaki akera ia koe te enua ra, akonokono iora koe i te sitona na ratou.

10 Kua akamauu nui maira koe i tona au tuaivi ki te vai, kua akataʼe maira koe i te ua ki te au rua arote ra, kua akamaru maira koe i te reira ki te tua ua ra: kua akameitaki mai koe i tei tupu ra.

11 Te akakorona nei koe i te mataiti i toou ra meitaki, e te topatapata maira te meitaki i te au aerenga noou ra;

12 Te topatapata maira ki runga i te au one-kai i te medebara, e te rekareka nei te au tuaivi e pini rava ake.

13 Te au kainga nei, kua kakau ïa ki te au anana mamoe; kua kapi pu ua oki te au o i te sitona; te maeva nei i te rekareka, e te imene nei.