Kolosa

4 E TE au atu ra, ka o atu i te mea tika e te mea tau meitaki i to kotou au tavini; kua kite oki kotou e, e Atu katoa to kotou i te rangi.

2 E tamou marie i te pure, e akamaroiroi oki i te reira, ma te akameitaki oki;

3 Ma te pure katoa ia matou, kia kiritiia e te Atua te pa tuatua anga na matou, kia akakite atu matou i te tuatua ngaro a te Mesia ra, i tapekaiaʼi au nei:

4 Kia akakite atu au i taua tuatua ra, mei te tau iaku kia tuatua ra.

5 Ei aerenga akono meitaki to kotou i te aronga ki vao ra, ma te taporoporo oki i te tuatau.

6 Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.

7 Na Tukiko e akakite atu ia kotou na i te au tuatua katoa noku nei, e taeake akaperepere ïa, e te orometua tuatua-mou, e taeake tavini oki i te Atu nei:

8 I unga atu ei au iaia kia kotou, kia kite aia i te tuatua ia kotou, e kia akapumaana aia i to kotou na ngakau;

9 Raua katoa ko Onesimo, e taeake akaperepere e te tuatua-mou, no ko ia kotou na. Na raua e akakite i to ko nei au tuatua katoa.

10 Te aroa atu nei a Arisetareko i tapeka katoaia maua nei ia kotou, e te tamaiti a te tuaine o Banaba ra, ko Mareko, (tei poroakiia atu ia kotou na; e kia tae atu aia kia kotou na, e kite meitaki mai kotou iaia,)

11 Ko Iesu oki, ko tei karangaia ia Iuseto ra, no te peritome ratou: Ko ratou anake tei rave katoa mai i te angaanga i te basileia o te Atua ra, ko ratou tei akapumaana mai iaku nei.

12 Ko Epaphera, e tavini no te Mesia, no ko na mai ia kotou na, te aroa atu nei ia kotou, e te tauta marie anga i te pure ia kotou kare e tivata, kia mou apa kore rai kotou ma te ki i te kite i te au anoano katoa o te Atua ra.

13 Ei kite oki au nona, e e maroiroi maata tona ia kotou, e to Laodikea, e to Ierapoli.

14 Te aroa atu nei a Luka rapakau maki akaperepereia nei, e ko Dema, ia kotou.

15 E aroa atu kotou i te au taeake i Laodikea ra, e ia Numepa oki, e te ekalesia i tona ngutuare.

16 E kia oti teianei leta i te tatauia i rotopu ia kotou na, e akaue atu oki kotou kia tatau katoaia i te ekalesia i Laodikea ra, e kia tatau katoa kotou i to Laodikea maira.

17 E ka karanga atu kia Arekipo, Kia matakite i te angaanga i rauka ia koe i te Atu, kia oti meitaki ia koe.

18 Ko toku teia aroa to Paulo, na toku uaorai rima i tata: Ka akamaara mai te pirianganaoa i runga iaku nei. Ei ia kotou te aroa ua. Amene.