Angaanga

13 E PUKE peroveta oki e te orometua tei taua ekalesia i Anetioka ra; ko Banaba, e ko Simeona, ko tei tuatuaia e, ko Nigere ra, e ko Lukio no Kurene, e ko Manaena, okotai rai o raua apii katoa angaia e te teterareka ko Heroda ra, e ko Saula.

2 E te akamori ra ratou i te Atu ma te akakoreanga kai, kua tuatua maira te Vaerua Tapu, Ka akataka mai ana ia Banaba raua ko Saula noku, no te angaanga i akonoia e au na raua ra.

3 Kua akakore iora ratou i te kai e pure atura, kua tuku akera i to ratou rima ki rungao ia raua, e oti akera, tono atura ratou ia raua.

4 E ko raua oki i tonokia e te Vaerua Tapu ra, aere tika atura ïa ki Seleukia; e mei reira oki, ano atura raua ki Kupero.

5 E tae atura ki Salami, kua ako atura raua i te tuatua a te Atua ki roto i te au sunago o te ngati Iuda ra: e tei ia raua katoa ra oki a Ioane i te tauturu anga.

6 E aere ua atura raua i taua enua ra e tae atura ki Papho, kite atura raua i tetai purepure, e peroveta pikikaa, e ngati Iuda, ko Baraiesu te ingoa:

7 Tei i o te tutara ra aia ko Serio Paulo, e tangata pakari; ko tei tiki mai ïa ia Banaba raua ko Saula, i inangaro aia i te akarongo i te tuatua a te Atua.

8 Karekā Elima taua purepure ra, (ko te ariteanga ïa o tona ingoa kia kiritiia,) kua tauetono maira ïa ia raua, i inangaro aia i te akaariu ke atu i te tutara kia kore e akarongo.

9 Ko Saula ra, (ko tei tuatua katoaia ia Paulo,) ki akera ïa i te Vaerua Tapu, kua tiroi matariki atura tona mata kiaia, Kua na ko atura,

10 Aue koe i ki i te pikikaa e te kino e, e te anaunga a te diabolo e, e enemi koe no te au tuatua-tika katoa nei, kare koe e tukumoe i te akamingi i te tuatua tika ua a te Atu nei?

11 E i na, tei runga mai nei te rima o te Atu ia koe, e ka matapoia koe, kare koe e kite vave i te rā. Rokoia iora aia e te mareureu e te poiri i reira; aa aere atura aia i te kimi anga i te tangata ei arataki iaia i te rima.

12 Kite akera te tutara i taua mea ra, akarongo atura, va rava atura oki i te tuatua a te Atu.

13 Ano aturā Paulo e te aronga i kapiti katoa kiaia ra mei Papho atu, e tae atura ratou ki Perege i Pamephulia; karekā Ioane, akaruke atura ia ratou, oki maira ki Ierusalema.

14 E mei Perege oki, riro atura ratou e tae atura ki Anetioka i Pisidia, tomo atura ki roto i te sunago i te rā sabati, noo iora ki raro.

15 E oti akera te tatau anga i te ture ma te au peroveta ra, kua tono akera te au tutara o te sunago ra i te veka kia ratou, na ko atura, E tāma, e te au taeake nei, te inangaro na kotou i te ako mai i te tangata nei ka tuatua mai.

16 Kua tu mairā Paulo ki runga, kua kamokamo maira te rima, na ko maira, E te au tangata no Iseraela nei, e te aronga e mataku i te Atua ra, ka akarongo mai ana.

17 Na te Atua o teianei au tangata no Iseraela nei i iki i to tatou ai tupuna, e kua akateitei aia i taua iti-tangata ra, ia ratou i noo ua i Aiphiti ra, e kua arataki mai aia ia ratou ki vao, ma te rima marōrō.

18 E kua akakoromaki aia i ta ratou tuatua i te medebara ra, e a akera ngauru anga te mataiti.

19 E pou oki iaia nga vaka tangata e itu i taua enua i Kanaana ra, kua tua kelero iora i to reira enua no ratou orai.

20 E muri akera, ka a paa anere e rima ngauru i te mataiti, ka tuku mai ei i te au akava, tae akera ki te peroveta ra kia Samuela.

21 Mei reira oki, kua inangaro akera ratou i tetai ariki; kua oronga maira te Atua ia Saula kia ratou, te tamaiti na Kisa, no te kopu o Beniamina taua tangata ra, e a akera ngauru anga te mataiti.

22 E tuku keia akera aia e ia, kua akatupu akera aia ia Davida ei ariki no ratou; tana oki i tuatua maira, i te na ko anga mai e, “Kua kitea e au a Davida, te tamaiti na Iese, e tangata e tau i toku ngakau, e nana e akatupu i toku au anoano katoa.”

23 Kua akatupu io nei te Atua i te Ora no Iseraela ia Iesu, no te uanga o teianei ta ngata, ko tei tuatuaia maira:

24 I tuatua aere anā Ioane i te bapetizoanga tataraara ki te tangata ravarai o Iseraela, i aere mai ei aia.

25 Te akatupu rā Ioane i tona tere, kua na ko akera aia, Koai au nei i to kotou manako anga? Kare au i te Mesia. I na ra, te aere maira tetai i muringao iaku, kare au e tau i te tatara ua atu i te tamaka i tona vaevae.

26 E tāma, e te au taeake nei, e te tamariki o te kopu-tangata o Aberahama, e te aronga e mataku i te Atua i roto ia kotou na, i tonokia mai teianei tuatua ora kia kotou nei.

27 Te aronga oki i noo i Ierusalema, e to ratou ui rangatira katoa, no te mea kare ratou i kite iaia, e te tuatua a te au peroveta i tatauia i te au rā sabati katoa ra, kua akatupu io nei ratou i taua tuatua ra i te akaapa anga atu iaia ra.

28 Kare rai oki ana ara i kitea e ratou e mate ei, kua pati atura ratou ia Pilato kia taia aia.

29 E ope akera i te akatupuia e ratou te au tuatua katoa nona i tataia ra, kua tuku maira ratou iaia ki raro mei runga mai i taua rakau ra, e vaio atura ïa ki roto i te tanumanga ra.

30 Kua akatu maira te Atu iaia mei te mate maira:

31 I kitea mai oki aia e manganui te rā i te aronga i aere katoa mai ma ia katoa ki Ierusalema mei Galilea maira; ko ratou tona kite ki te tangata ra.

32 E tuatua meitaki ta matou e akakite mai kia kotou nei, te tuatua i tuatuaia mai ki to tatou ai tupuna ra.

33 Kua akatupu io nei te Atua i taua tuatua ra kia tatou nei ki ta ratou tamariki, koia i akatu ia Iesu ki runga; koia oki tei tataia ki roto i te Salamo rua ra. “Ko taku Tamaiti koe, i nakonei koe i akaanauiaʼi e au.”

34 I akatu mai aia iaia ki runga mei te mate maira, auraka aia e oki akaou ki te vaarua, koia i na ko mai e, “E akatupu tika au i te au takinga-meitaki ia Davida ra, i te mea pikikaa kore.”

35 I tuatua mai ei oki aia i roto i tetai Salamo ra, “Kare koe e tuku i to Mea Tapu kia kite i te pe.

36 Karekā Davida, ope atura tona uki i te akono anga i to te Atua ra inangaro, moe atura aia, e kapitiia atura aia ki tona ai metua, e kite atura i te pe:

37 Kareka aia, ko ta te Atua i akatu ki runga ra, kare ïa i kite i te pe.

38 E teianei, kia kite kotou, e tāma, e te au taeake nei, no teianei tangata i akakiteia atu ei kia kotou na e, e matara te ara:

39 E te au mea katoa kare kotou e akatikaia mai e te ture a Mose ra, e akatikaia mai ïa e ia te aronga ravarai i akarongo ra.

40 E teianei, e matakite, ko te rokoia mai aea kotou e tei tuatuaia mai e te au peroveta ra;

41 “Akara ana kotou, e te aronga e akavaavaa, ka va atu e ka mate atu: e rave oki au i tetai angaanga i to kotou na tuatau, e angaanga ra, tuatua ua atu te tangata kia kotou na, kare rava kotou e akarongo.”

42 E tei te aere anga te ngati Iuda ki vao i taua sunago ra, kua pati atura te etene kia tuatuaia mai taua au tuatua ra kia ratou, kia tae ki te sabati.

43 E akangaoro atura taua uipaanga ra, kua aru maira to te ngati Iuda e te au pipi akono i te Atua e manganui ia Paulo raua ko Banaba: ko tei karanga atu ïa kia ratou, e ako atura, kia mou piri tikai i te aroa ua o te Atua.

44 E tae akera ki te sabati, kua uipa maira to taua oire katoa ra e akarongo i te tuatua a te Atua, kare e maata i toe.

45 Kia akara maira te ngati Iuda i taua urupu maata ra, ki akera ratou i te vareae, e kua taumāro maira i taua au tuatua i karangaia e Paulo ra, ma te akakore e te akakino oki.

46 Maroiroi aturā Paulo raua ko Banaba, e na ko atura, E akamata kia kotou i te akakite atu i te tuatua a te Atua e tikaʼi; ko kotou ra i tute ke atu i taua tuatua nei, e te tuatua na kotou kare kotou e tau i te ora mutu kore, i na, te ariu nei matou ki te etene;

47 Ko ta te Atu oki ïa i ikuiku mai kia matou nei, “Kua akonoia koe e au ei turama no te etene, kia riro koe ei ora e tae ua atu ki te openga o te enua ra.”

48 E kia akarongo maira te etene ra, mareka rava atura ratou, e akameitaki atura oki i te tuatua a te Atu; e te aronga i akonoia no te ora mutu kore ra, kua akarongo anake ïa.

49 Tutu aereia atura te tuatua a te Atu e pini rava ake taua enua ra.

50 Kua taoriori iora te ngati Iuda i te au vaine taoiau akono i te Atua e te aronga tutara i taua oire ra, akatupu atura oki i te takinga-kino ia Paulo e Banaba, tuaru atura ratou ia raua e topa maira to ratou pae.

51 Ruru atura ra raua i te one i to raua vaevae ia ratou, e tae atura oki ki Ikonio.

52 Ki akera te au pipi i te rekareka e i te Vaerua Tapu.