Ezekiela

34 E KUA tae maira te tuatua a Iehova kiaku nei, na ko maira,

2 E te tamaiti a te tangata na, ka totou koe i te au tiaki ia Iseraela, ka totou, e ka karanga atu kia ratou, Te na ko maira te Atu ra ko Iehova ki te au tiaki; E ae oki to te au tiaki o Iseraela tei angai ia ratou uaorai! auraka ainei te au tiaki e angai i te au anana?

3 Te kai ra kotou i te matu, e te akakakau nei ia kotou ki te uru, e te ta nei kotou i tei angaiia ra: kare ra kotou e angai i te anana.

4 Ko tei paruparu ra, kare kotou i akamaroiroi, e te makiia ra, kare kotou i rapakau, e tei aati, kare kotou i tākai, e tei akapueurikiriki keia ra, kare kotou i akaoki mai, kare oki kotou i kimi i tei ngaro ra, kua tutara ra kotou ia ratou ma te takinga-kino e te aroa kore.

5 I pueurikiriki ke ei ratou, no te mea kare e tiaki: e kua riro ratou ei kai na te au puaka taae katoa o te ngangaere ra, ka pueurikiriki ke ei ratou ra.

6 Kua uoa aere ua te au mamoe naku na runga i te au maunga katoa ra, e ki runga i te au tuaivi teitei ravarai ra: koia ïa, kua pueurikiriki taku anana na runga i te tua enua katoatoa ra, e kare ua tetai i aru aere, e kare ua i kimi ia ratou.

7 E teianei, e te au tiaki e, akarongo mai kotou i te tuatua a Iehova;

8 Te tuatua maira te Atu ra ko Iehova, Te ora nei au ra, no te mea kua riro taku anana ei aōnga, e kua riro taku anana ei kai, na te au puaka taae katoa o te ngangaere ra, no te mea kare e tiaki, kare oki taku au tiaki i kimi i taku anana, kua angai ra te au tiaki ia ratou uaorai, e kare i angai i taku anana;

9 E teianei, e te au tiaki, e akarongo mai kotou i te tuatua a Iehova:

10 Te na ko maira te Atu ra ko Iehova, I na, kare au e tau i te au tiaki; e umuumu au i taku anana i to ratou rima, e akakore oki au i ta ratou akaangai anga i taua anana nei; kare oki te au tiaki e akaangai akaou ia ratou uaorai; e akaora oki au i taku anana i to ratou vaa, e auraka kia riro ei kai na ratou.

11 Te na ko maira oki te Atu ra ko Iehova; I na, naku, naku uaorai nei e aru aere i taku au mamoe, e e kimi oki ia ratou.

12 Mei te tiaki e kimi i tana anana, i te rā i noo ei aia i rotopu i tana au mamoe, kia pueurikiriki ke ra; e pera katoa au i te kimi i taku au mamoe, e ka akaora ia ratou i te au ngai katoa i pueurikiriki ke ei ratou i te rā tapokipoki e te poiri.

13 E arataki mai au ia ratou ki vao mai i te au tangata ra, e e akaputuputu mai au ia ratou mei te pa enua mai, e e arataki mai au ia ratou ki to ratou uaorai enua, ka akaangai ei au ia ratou ki runga i te au maunga o Iseraela, ki te pae o te au kauvai ra, e te au ngai katoa i nooia i te enua nei.

14 E akaangai au ia ratou i roto i te one kai meitaki ra, e ei runga i te au maunga teitei o Iseraela to ratou koro: ei reira ratou e moe ei i roto i te koro meitaki, e ei roto i te one kai e matu ei ka kaikai ei ratou ki runga i te au maunga o Iseraela.

15 Naku e akaangai i taku anana, e naku rai e akamoe ia ratou ki raro, te tuatua maira te Atu ra ko Iehova.

16 Naku e kimi i tei ngaro ra, e e akaoki mai i tei îia keia, e e tākaikai i tei aati ra, e e akamaroiroi i tei maki ra: kareka tei matu e tei ketaketa, naku ïa e ta, e naku e angai ia ratou i te tuatua-tau.

17 Kareka kotou, e taku anana, te na ko maira te Atu ra ko Iehova; I na, naku e akatau i te tuatua i rotopu i tetai puaka e tetai puaka, i rotopu i te mamoe toa e te puaka-nio toa ra.

18 E mea ngiti ainei ia kotou tena one kai meitaki i pou ia kotou, ka takatakai ei kotou i te toenga o ta kotou one kai ki to kotou vaevae ra? e te vai areare i inumia e kotou, ka taveu ei kotou i te toenga ki to kotou vaevae ra?

19 E taku anana nei, te kai nei ratou i ta kotou i takatakai ki to kotou vaevae; e tei taveuia e to kotou vaevae ta ratou e inu nei?

20 E teianei, te na ko maira te Atu ra ko Iehova kia ratou; I na, ko au, ko au nei rai te ka akatau i te tuatua i rotopu i te puaka matu e te puaka ikoke.

21 No te mea te tute nei kotou ki te kaokao e te pakuivi, e kua tui i tei makiia ki to kotou au tara, e pueurikiriki ke atu atu ei ratou ia kotou;

22 E teianei, e akaora au i taku anana, e kare ratou e riro akaou ei aōnga; e naku e akatau i te tuatua i rotopu i tetai puaka e tetai puaka.

23 E naku e tuku i te tiaki okotai ki runga ia ratou, e nana ratou e angai, ko toku tavini nei ko Davida; nana ratou e angai, e koia te ka riro ei tiaki no ratou.

24 E ko au nei ko Iehova te ka riro ei Atua no ratou, e toku tavini ko Davida ei ariki ïa i rotopu ia ratou; ko au ko Iehova tei tuatua.

25 E e papau au i tetai koreromotu au ia ratou, e naku e akakore i te au puaka taae ki runga i te enua nei: e ka noo meitaki ua ratou ki te medebara, e ka moe oki i roto i te vaorakau.

26 E akariro au ia ratou, e te au ngai i vaitatao ki toku maunga ra e pini ua ake, ei meitaki; e naku e akatopa i te tua ua i tona tuatau; e riro ïa ei tua ua akameitaki.

27 E oronga mai te rakau o te kainga ra i tona ua, e e akatupu mai te enua i tona, e ka noo mataku kore ua ratou ki to ratou enua, e kite oki ratou e ko Iehova au, kia aatiia e au te au tapeka ra i to ratou zugo, e kia akaoraia ratou e au i te rima o te aronga i akariro ia ratou ei tavini.

28 E kare atura ratou e riro akaou ei aōnga no te au etene, kare oki ratou e pou i te puaka taae o te enua: e noo ponuiaau ua ra ratou, e kare rava tetai e akamataku mai ia ratou.

29 E naku e akatupu i tetai uri rongonui no ratou, e kare ratou e mate akaou i te pongi i taua enua ra, kare oki ratou e akakoromaki akaou i te akakino o te au etene ra.

30 Ka kite ïa ratou i reira e, ko au ko to ratou Atua ra ko Iehova, tei vaitatao ia ratou, e ko ratou toku au tangata, te ngutuare o Iseraela, te tuatua maira te Atu ra ko Iehova.

31 Ko kotou oki taku anana tangata, te anana o taku nei koro ïa, e ko au to kotou Atua, te tuatua maira te Atu ra ko Iehova.