Roma

1 KO Paulo e tavini no Iesu Mesia, i akariroia ïa ei aposetolo, i akatakaia no te evangelia a te Atua,

2 (Ko tei akakiteia mai i muatangana, e tana au peroveta i roto i te tuatua tapu i tataia ra,)

3 No tana Tamaiti no to tatou Atu ra no Iesu Mesia, ko tei anau i te uanga o Davida, i te akonoanga i te kopapa nei;

4 I akakite akairoia maira ma te mana e, ko te Tamaiti aia a te Atua, i ta te Vaerua Tapu, i te tuakaouanga mei te mate maira:

5 Nona oki i raukaʼi ia matou te aroa ua, e te taoonga aposetolo i te au etene katoa no tona ingoa, kia rauka ia ratou te akono akarongo ra:

6 No ratou katoa oki kotou, ko tei akonoia e Iesu Mesia:

7 I te aronga katoa, i akaperepereia mai e te Atua, i Roma na, i akonoia ei aronga tapu: Ei ia kotou te aroa ua, e te au, no ko mai i te Atua i to tatou Metua ra, e te Atu oki ia Iesu Mesia ra.

8 E akameitaki ana au i taku Atua, no Iesu Mesia ra, ia kotou ravarai, no te mea kua tuatuaia to kotou akarongo e kako roa ake te ao katoa nei.

9 Ko te Atua oki taku e akamori ma taku vaerua katoa i te evangelia o tana Tamaiti, ko toku ïa kite e, kare ua au i vata i te taiku ia kotou;

10 I te pati anga i taku nei pure ma te tivata kore, kia meitaki taku tere i te openga nei, kia tika i te Atua, kia tae atu au kia kotou na.

11 E anoano maata toku kia kite atu ia kotou, kia tuku au i ta te Vaerua ia kotou, kia akatinamouia kotou:

12 Kia pumaana oki au e kotou katoa i to tatou akarongo, i to kotou e i toku katoa oki.

13 Kare au i inangaro, e aku au taeake, e kia kore kotou e kite, e manganui toku akakoro anga e aere atu kia kotou na, (e i tāpuia na ra au,) kia puapingaia taku ia kotou, mei tetai papaki etene katoa ra.

14 E kai ou oki au na te Eleni, e na te tangata ke ke; na te aronga pakari, e na te kite kore.

15 E teianei, kua tika roa iaku i te akakite atu i te evangelia ia kotou katoa i Roma na, e pou ua ake toku nei maroiroi.

16 Kare ua au i akama i te evangelia a te Mesia ra: no te mea, ko te mana ïa o te Atua, kia ora te tangata ravarai e akarongo ra; ko te ngati Iuda ana, e te Eleni katoa oki.

17 Tei reira oki te tuatua-tika a te Atua i te akarongo, i te akakite angaia mai ei akarongo anga, mei tei tataia ra e, “Ko te tangata tuatua-tika i te akarongo ra, ka ora ïa.

18 Kua akakiteia mai oki te riri o te Atua mei te rangi mai, i te au akono kore katoa i te Atua, e i te tuatua-tika kore a te tangata nei, ko tei tāpu i te tuatua-mou ma te tika kore:

19 No te mea ko te au mea ravarai o te Atua e kitea ra, te vai ua nei ïa ia ratou; kua akakite oki te Atua kia ratou.

20 Te au mea oki nona tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga; kare ua atura o ratou kotoe anga.

21 No te mea e, kite ua rai ratou e, e Atua, kare ratou i akakakā iaia i tei tau i te Atua ra, kare oki i akameitaki atu; riro atura ta ratou eumiumianga ei mea puapinga kore, e to ratou ngakau manako kore, poiri atura ïa:

22 I akatangata pakari oki ratou, e riro atura ei neneva;

23 Ruri ke atura te meitaki o te Atua mate kore ra, ei mea angaia mei te tangata e mate ua nei te tu, e mei te manu, e mei te au mea vaevae a ra, e te au mea totoro aere nei.

24 I akaruke ei te Atua ia ratou, kia rave ua i te ravenga viivii i te anoano i to ratou uaorai ngakau, kia akakino i to ratou uaorai kopapa, ratou ratou uaorai;

25 Ko tei ruri ke i te tuatua-mou no te Atua ra ei pikikaa, e kua pure, e kua akamori i tei angaia ra, kare i Tei anga ra, nona te akameitaki mutu kore ra. Amene.

26 No reira te Atua i tuku uaʼi ia ratou ki te anoano viivii ra; na ta ratou au vaine oki i ruri ke i te mea tika ra i te mea tika kore:

27 E te au tane katoa oki, akaruke atura i te mea tika ra i te vaine; tupu atura i to ratou anoano ratou ratou uaorai; e tane e e tane, i te rave anga i te mea akama ra, e te rauka anga te tutaki i roto ia ratou io i tei tau i ta ratou ra ara.

28 E ko ratou kare i anoano i te tāpu i te Atua ma te kite atu, kua tuku ua atura te Atua ia ratou ki to ratou ngakau kino, kia rave ua na ratou i te au mea tika kore;

29 Kua ki i te tuatua-tika kore ravarai, te akaturi, te kanga, te noinoi apinga, te manava kino: kua ki i te vareae, te ta tangata, te tamaki, te pikikaa, te akamoupuku: e aronga urutoe,

30 E aronga oonitua, e anoano kore i te Atua, e takinga-kino, e nengonengo, e akatietie, e kimi mea kino ra, e akarongo kore i te metua ra,

31 E akono kore, e akaatikau koreromotu, kare e aroa mou, e riri anga-kore, e aroa kore;

32 Kite ua rai taua aronga ra i te ture a te Atua e, ko tei rave i taua au mea ra, e tau ia ratou te mate, e rave rai i taua au mea ra, kare oki i te reira anake ra, te taurekareka ra oki i te aronga i rave ra.