Roma

6 E AKAPEEA oki tatou nei? ka tamou rai tatou i te rave i te ara, kia maata mai te aroa?

2 Auraka rava ïa. Ko tatou oki ko tei mate i te ara, eaa oki tatou e ora uaʼi i te reira?

3 Kare rai kotou i kite ko tatou katoa tei bapetizoia ki roto i te Mesia ra ia Iesu, kua bapetizoia i roto i tona mate?

4 E teianei kua tanumia tatou ma ia katoa, i te bapetizoanga i roto i tona mate; mei te Mesia i akatuia e te mana o te Metua mei te mate maira, kia pera katoa tatou i te aaere anga i te ora ou.

5 I kapiti katoaia oki tatou iaia i te tu o tona mate, e kapiti katoaia ïa tatou i te tu o tona tuakaouanga.

6 Kua kite oki e, kua akasatauroia to tatou tangata taito ma ia katoa oki, kia paruparu te kopapa o te kino, kia kore tatou e tavini akaou i te kino nei.

7 Ko te tangata oki i mate ra, kua matara ïa aia i te kino nei.

8 I mate ana oki tatou e te Mesia katoa, kua manako oki tatou e, ka ora tatou ma ia katoa.

9 Kua kite oki tatou e, ko te Mesia i akatuia mei te mate maira, kare ïa e mate akaou, kare oki e mana akaou te mate iaia.

10 Koia oki i mate ra, i mate ïa i te ara, okotai ua ra; koia ra i ora ra i ora ïa i te Atua.

11 E manako katoa oki kotou ia kotou uaorai e, kua mate mou i te kino ra, kua ora ra i te Atua, i to tatou Atu ia Iesu Mesia.

12 E teianei, auraka e vai autu te kino ki roto i to kotou kopapa mate ua nei, ka akarongo ei oki kotou i te kopapa i tona anoano.

13 Auraka e orongaia to kotou kopapa ei taoonga-tamaki na te kino i te tuatua-tika kore ra; ka oronga ra ia kotou uaorai i te Atua, e to kotou kopapa ei taoonga-tamaki na te Atua i te tuatua-tika ra, mei te aronga i mate ana, e kua ora.

14 Kare oki te kino e autu ki runga ia kotou, kare oki kotou i raro ake i te ture, tei raro akera kotou i te aroa ua.

15 Ka akapeea ra? ka rave tatou i te ara no te mea tei raro ake tatou i te aroa ua, kare i raro ake i te ture ra? Auraka rava ïa.

16 Kare kotou i kite e, ko ta kotou e oronga ia kotou io ei tavini ei akarongo atu iaia, e tavini ïa kotou nona no ta kotou e akarongo ra; no te kino ra e mate atu, no te reira ïa, e no te akono e rauka atu ei te tuatua-tika ra no te reira ïa?

17 Kia akameitakiia ra te Atua, i te mea, ko kotou te tavini no te kino na, e kua akarongo ma te ngakau katoa i te tutu tuatua i tukuia atu kia kotou na.

18 E kua matara kotou i te kino, kua riro io nei ra kotou ei tavini no te tuatua-tika.

19 Te tuatua nei oki au i ta te tangata nei, no te paruparu oki o to kotou kopapa: mei ia kotou i oronga ua i to kotou kopapa ei tavini no te mea viivii ra, e te kino ei rave i te kino ra; ka oronga kotou i to kotou kopapa ei tavini no te tuatua-tika ei rave i te meitaki.

20 I to kotou tavini anga i te kino ra, kare a kotou e tuatua-tika i reira.

21 Eaa oki ta kotou puapinga i rauka i taua au mea ra ta kotou e akama i teianei? e mate oki te openga o taua au mea ra.

22 I teianei ra, kua matara kotou i te kino, e kua riro ei tavini no te Atua, ko te tapu ta kotou e akatupu, e e ora mutu kore oki te openga.

23 E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.