Genese

21 KUA mairā Iehova ia Sara i tana i tuatua maira; e kua akatupu a Iehova i tana i akakite mai kia Sara ra.

2 Kua to iora oki a Sara, e e tamaiti tana i anau na Aberahama i tona ruaine anga ra, i te tuatau ta te Atua i akakite maira.

3 E tapa iorā Aberahama i te ingoa o tana tamaiti i anau ra, ta Sara i anau nana ra, ko Isaaka.

4 E peritome iora oki a Aberahama i tana tamaiti ia Isaaka i te po varu ra, i ta te Atua i akaue mai kiaia ra.

5 Kua tae a Aberahama ki te anere o te mataiti, i anau mai ei tana tamaiti ko Isaaka. 6 E kua na ko akerā Sara, Kua akatupu io nei te Atua i te kata iaku; e ka riro i te kata katoa te aronga ravarai e akarongo ra.

7 E kua na ko akera oki aia, Naai i tuatua mai kia Aberahama e, ka akangote a Sara i te tamariki? kua anau oki tana tamaiti iaku i tona ruaine anga nei.

8 E tupu atura taua tamaiti ra i te maata, e akatopaia i te u; e kua akatupu iorā Aberahama i tetai kaingakai maata i te rā i topaʼi te u o Isaaka.

9 E kite akerā Sara i te tamaiti a te vaine Aiphiti ra a Hagara, tana i anau ia Aberahama, i te aviri anga.

10 E kua tuatua maira aia kia Aberahama, E tuaru ke atu i teianei vaine tavini e tana tamaiti; kare oki te tamaiti a teianei vaine tavini e riro ei tangata tuanga katoa, raua ko te tamaiti naku nei, ko Isaaka.

11 Ongoongo roa akerā Aberahama i taua tuatua ra, no taua tamaiti nana ra.

12 Kua tuatua maira ra te Atua kia Aberahama, Auraka koe e ongoongo i te tamaiti ra, e i to tavini vaine na: e akarongo koe i te reo o Sara ra, i te au tuatua katoa tana i tuatua mai kia koe ra; e “Na roto i ta Isaaka te uanga i karangaia.”

13 E akariro katoa oki au i te tamaiti a tera ra vaine tavini ei enua katoa, no te mea e uanga katoa aia noo.

14 E kua tu akerā Aberahama i te popongi metua, kua rave akera aia i te kai, e tetai ue vai, e tuku atura ia Hagara ra, apai akera ki runga i tona pakuivi, e te tamaiti, e tuku atura kia aere ana. E riro atura aia, aere ua atura na te medebara ra, na Bere-seba.

15 E ope rava akera te vai i roto i te ue ra; e kua tuku atura i te tamaiti ki raro ake i tetai rakau:

16 E aere ke atura aia, e mei te ngai e taea i te kakao ra te roa, e noo iora aia ki raro tiraa tika atura iaia ra; kua na ko akera oki aia, Auraka au kia kite i te matenga o te tamaiti. Noo au iora aia e tiraa akera iaia ra, e akamaata akera i tona reo, e aue atura.

17 E kua e akarongo maira te Atua i te reo o taua tamaiti ra; e kua kapiki maira tetai angela a te Atua i runga i te rangi kia Hagara, na ko maira kiaia, I aa tika koe, e Hagara? auraka e mataku; kua akarongo oki te Atua i te reo o te tamaiti i tona iora ngai.

18 Ka tu, e akatu i te tamaiti ki runga, e e mou to rima iaia; e akariro oki au iaia ei enua maata katoa.

19 Kua akapuera maira te Atua i tona mata, e kite atura aia i tetai ruavai; e aere atura aia, e akaki atura i te ue ki te vai, e kua akainu atura i te tamaiti.

20 E kua noo maira te Atua ki taua tamaiti ra, e tupu atura i te maata, noo atura aia i te medebara, e kia maata aia, riro atura ei akainana ana.

21 Noo iora aia i te medebara ra i Parana ra: e kua tiki atura tona metua vaine i tetai vaine nana, no te enua ra no Aiphiti.

22 I reira ta Abimeleka e te rangatira maata no tona ra nuku ta Phikola, tuatua anga mai kia Aberahama, i te na ko anga mai e, Tei ia koe te Atua i te au mea katoa taau e rave nei.

23 E teianei e taputou koe i te Atua kiaku nei, e kare koe e pikikaa mai iaku, e i taku tamaiti, e te tamaiti a taku tamaiti; mei toku nei ra takinga-meitaki ia koe, e akapera katoa mai koe kiaku, e te enua katoa taau e tuitarere ua na.

24 E kua karanga aturā Aberahama, E taputou au.

25 E kua ako aturā Aberahama kia Abimeleka i te ruavai, kua pou i te aōia e te au tavini o Abimeleka.

26 E kua tuatua mairā Abimeleka, Kare au i kite i te aronga i akapera ra: kare oki koe i akakite mai kiaku, kare oki au i kite ua ake, e tae roa akenei ki teianei rā.

27 E kua rave akerā Aberahama i te mamoe, e te puaka-toro, apai atura na Abimeleka; e kua papau iora raua i te koreromotu na raua.

28 E kua akataka iorā Aberahama i e itu puke punua mamoe ua no roto i te anana ra.

29 E kua tuatua mairā Abimeleka kia Aberahama, Eaa tenana puke punua mamoe ua e itu i akatakaia e koe na?

30 Kua karanga atura aia, Ko taau ïa e rave mai i toku nei rima, ko nga punua mamoe nei e itu, kia riro ratou ei kite noku, o naku i ko i teianei ruavai.

31 E no te mea, kua taputou katoa raua i reira, tapaia iora taua ngai ra ia Bere-seba;

32 I Bere-seba oki ta raua papau anga i ta raua koreromotu: tu akerā Abimeleka, e te rangatira maata no tona nuku ko Phikola, oki atura ki te enua o te Philiseti ra.

33 Kua tanu iorā Aberahama i tetai rakau i Bere-seba, e kua tautopa iora i te ingoa o Iehova i reira, ko te Atua mutu kore ra.

34 E roa to Aberahama noo tuitarere anga i te enua o te Philiseti ra.