Isaia

26 KIA tae i te reira rā e peʼeiaʼi teianei peʼe i te enua ra i Iuda; E oire ketaketa to taou; ko te ora ta te Atua e akono, ei patu, e ei paruru.

2 Ka eeu na kotou i te au pa, kia tomo mai te enua tuatua-tika, i tei tāpu i te tuatua mou ra, ki roto.

3 Ko tei ngaueue kore te manako ra, taau ïa e tiaki, e ei au nuingangare tona, koia i irinaki ia koe.

4 E irinaki kotou ia Iehova e tuatau ua atu: ko Ia tika rai oki a Iehova, e Mato mutu kore ïa.

5 Kua taakaaka oki aia i te aronga nooanga teitei: te oire teitei ra, ko tana ïa i tuku ki raro; kua tuku aia i te reira ki raro rava i te one; kua akaarite aia i te reira ki te one-pueu.

6 E takatakaiia te reira e te vaevae; te vaevae o te aronga ao, te tapuvae o te aronga apinga kore.

7 E aerenga tiratiratu to te aronga tuatua-tika; kua akatikaoru ua koe, e Tei Tika e, i te aerenga o te aronga tuatua-tika.

8 Tei te arataa o taau ra tuatua-tau matou, e Iehova e, i te tapapa anga ia koe; i toou ra ingoa, e kia akamaara matou ia koe ra, ko te inangaro ïa o to matou vaerua.

9 Taku vaerua tei inangaro ia koe i te po ra; koia ïa, ko taku vaerua i roto roa ra tei kimi ia koe i te popongi roa ra: kia kitea taau au tuatua-tau i te enua nei, te apii ra to te ao nei i te tuatua-tika i reira.

10 Kia akaperepereia te tangata kino, kare aia e apii i te tuatua-tika: ei te enua tiratiratu ra aia e rave ei i te tuatua-tika kore, kare rai aia e akono i te tapunui o Iehova.

11 E Iehova e, kua apai takere anaia to rima ki runga, kare ra ratou e akara: e kite ra ratou ma te akama; na toou matutu i toou au tangata ra, e na te ai oki a toou au enemi, ratou e akapou.

12 E Iehova e, kua akono rai koe i te au no matou: ta matou au angaanga katoa oki, naau rai i rave no matou.

13 E to matou Atua, e Iehova, e aronga atu ke, kare koe, i tei tutara mai ia matou nei: ko koe anake ra, ko toou ingoa, ta matou e akapaapaa.

14 Kua mate ratou, kare rava e ora; e turuma anake ra, kare ratou e tu mai ki runga: kua tiki mai oki koe, e kua rave akamate roaia ratou; e kua akakore roa koe i te manako anga ia ratou.

15 Kua akamaata koe i te enua nei, e Iehova e, kua akamaata koe i te enua nei: kua akakakāia koe: kua akaatea koe i te au kotinga katoa o te enua nei.

16 E Iehova e, i te pini anga ra to ratou kimi anga ia koe ra; kua pati ratou ma te taakaaka ra i reira, te iri ra te ako naau ki runga ia ratou.

17 Mei te vaine nui ra, kia vaitata i te anau ra, kua rokoia e te mamae ra, kua aue ua i tona mamae anga; kua pera rai oki matou, i to matou taka ke anga i to aroaro, e Iehova e.

18 Kua nui oki matou; kua mamae matou; kua tu a matangi ua ta matou i anau; kare i rauka te ora ia matou i te enua nei, kare oki to te ao nei i anau mai.

19 Toou ra aronga mate, e ora ïa, to ratou kopapa mate, e tu akaou ïa: e ara, e imene, e tei noo ki te one-pueu: mei te au o te ngangaere ra, toou ra au, ka akapuaki mai oki te enua i te aronga i mate ra.

20 E aere mai, e taku iti-tangata e, e tomo ki roto i to au pia ra, e topiri marie i toou au pa ia koe: e pipini ei koe i tetai manga tuatau iti kia okotai ake kamoanga mata, kia ngaro ke atu taua riri otooto nei.

21 I na oki, te aere mairā Iehova mei tona ra ngai, e tutaki i to te enua nei i ta ratou ara; e na te enua e akakite mai i te toto i roto iaia ra, e kare oki aia e tapoki akaou i tona au tangata i taia ra.