Isaia

55 E TE aronga katoa i kaki ra e! ka aere mai ki te vai nei; e te aronga moni kore ra, ka aere mai, e oko, e e kai; koia ïa, e aere mai, e oko ua i te wina e te u, auraka ei moni, auraka oki ei oko.

2 Eaa kotou i oronga atu ei i te moni i te mea manga kore? e ta kotou angaanga i te mea merengo kore? ka akarongo meitaki mai ana iaku, ka kai ei i te mea meitaki; e kia mareka to kotou vaerua i te kai matu ra.

3 E akaariu mai i to kotou taringa, ka aere mai ei kiaku nei: e akarongo mai, e ora ïa to kotou vaerua; e naku e papau i te koreromotu mutu kore ia kotou, i te au takinga-meitaki ia Davida ra, i te mea pikikaa kore ra.

4 I na, kua oronga au iaia ei Kite no te au tangata nei, ei Arataki, e ei Tutara no te au tangata nei.

5 I na, te enua kitea koreia e koe ra, naau ïa e karanga atu, e te enua kare i kite ia koe ra, te ka oro mai ïa ia koe ra; no to Atua no Iehova, e no Tei Tapu i Iseraela nei; ko koe oki tana i akateitei.

6 E kimi kotou ia Iehova, koi kitea ake aia, e kapiti kotou iaia, koi vaitata mai aia:

7 Kia akaruke te tangata kino i tona aerenga, e te tangata tuatua-tika kore i tona manako: ka oki ei aia kia Iehova, e nana aia e aroa mai; e ki to tatou Atua, te maata ra oki iaia te akakore i te ara.

8 Kare oki toku ra au manako i to kotou ra au manako, kare oki to kotou ra au aerenga i toku ra au aerenga, te tuatua mairā Iehova.

9 Mei te rangi nei oki e teitei maata tona i to te enua, koia katoa toku ra au aerenga e teitei i to kotou ra au aerenga, e toku ra au manako i to kotou ra au manako.

10 Mei te ua e topa nei, e mei te kiona, no runga mai i te rangi ra, e kare i oki akaou ki te reira, kua tamauu ra i te enua, e kua akatupu ra, e kua akauua mai oki i tana, i raukaʼi oki te ua i te aronga e ruru, e te kai i te aronga e kai ra:

11 Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.

12 E aere kotou ma te rekareka, e aratakiia kotou ma te au: e akapuroro ua mai te au maunga e te au tuaivi i te imene rekareka na mua ia kotou, e te au rakau katoa o te kainga ra, e pokara ïa to ratou rima.

13 E kauonoia te rakau taratara i te berusi; e kauonoia oki te tataramoa ki te maire: e riro oki ei vavariaanga na Iehova, ei akairo mutu kore, ko te kore rava e akakoreia ra.