Iuda

1 KO Iuda, e tavini no Iesu Mesia, e e taeake oki no Iakobo, i te aronga i akatapuia e te Atua Metua ra, tei tiakiia i roto ia Iesu Mesia, i te aronga i kapikiia ra:

2 Kia maata mairai te aroa, e te au, e te inangaro, ia kotou.

3 E aku au akaperepere e, te rapurapu atu nei au i te tata anga atu ia kotou i te tuatua i te ora no te tangata ravarai nei, i manako akenei au e tata au i te tuatua ia kotou na e tikaʼi, ei ako anga atu ia kotou kia taumāro tikai kotou i te akarongo i tukuia mai i te aronga tapu ra i muatangana.

4 Kua akao poiri ua mai oki tetai papaki tangata ki roto, ko tei akairo takereia na no taua mate nei: e aronga akono kore i te Atua, ko tei ruri ke i te aroa ua o te Atua ei kanga anga, e kua akakore i te Atu okotai ra i te Atua, i to tatou Atu ia Iesu Mesia ra.

5 Te inangaro nei au e akaaraara atu i to kotou manako i teianei tuatua, kua kite ra kotou i muatangana, e akaora ua rai te Atu i te tangata i te enua ra i Aiphiti, rave mate takiri atura aia i te aronga akarongo kore i muri ake.

6 E te au angela katoa ko tei kore i akono i ta ratou orai taoonga ra, akaruke iora ra i to ratou nooanga tikai, ko tei tapekaia ïa e ia i te pirianganaoa matara kore ki raro ake i te poiri, e tae ua atu ki te akavaanga i te rā maata ra.

7 Mei ia Sodoma oki e Gomora, e te au oire katoa i vaitata ra, ko tei tuku ua ia rotou uaorai i te ravenga kanga ra, e te anoano tika kore mei ia raua katoa ra, ko tei akonoia ei akaraanga, i te rave anga i te mate i te ai mate kore ra.

8 Mei te reira katoa teianei aronga i varea e te moe maata, te akaviivii nei i te kopapa, te akavaavaa nei i te au tutara, e te akakino nei i te aronga taoonga.

9 Kare ra te angela maata ra ko Mikaela, ka taumāro ei raua ko te diabolo i te kopapa o Mose ra, i tapepe akakino atu iaia, na ko atu ra e, “Na Iehova e patoi atu ia koe,”

10 Kareka teianei aronga, te akakino nei ïa i te au mea kitea koreia e ratou; e te au mea ta ratou i kite aere ua mei te au mea manako kore e kite ra, te akatupu nei ratou i to ratou mate i te reira.

11 E mate to ratou! kua aere oki ratou na te ara tiroa o Kaina ra, kua aru viviki ua oki i te apa a Balaama ra no te tutaki, e kua mate oki i te taumāro anga a Kora ra.

12 E topata ïa ratou i ta kotou au kaingakai aroa ra; kia kai ratou ma kotou katoa ra, te kai ra ïa ma te mataku kore: e tumurangi vai kore ra ratou, e peke aere ua i te matangi ra; e rakau marō ra, kare e uua anga, taki rua te mate, kua kiriti tumuia:

13 Mei te ngaru tai viviki ra, i te akaruaki anga mai i to ratou uaorai kino; mei te etu kokaua ra, no ratou te poiri kerekere i vaooia ra e tuatau ua atu.

14 Ko Enoka oki, te tokoitu mei ia Adamu maira, ko tei totou ïa i teianei aronga, i te na ko anga mai e, “I na, te aere maira te Atu ma te ngauru katoa o te tausani o tana aronga tapu ra,

15 E akautunga mai i te tangata katoa, e e akakite oki i te au akono kore i te Atua katoa i roto ia ratou i ta ratou au tuatua akono kore i te Atua katoa i raveia e ratou ra, e te au tuatua māro katoa a te aronga ara akono kore i te Atua i karanga iaia ra.”

16 E aronga urutoe ratou, e mareka kore, i te aru anga i to ratou uaorai au inangaro kikino ra; e te karanga anga oki to ratou vaa i te tuatua mamaata akatietie ra, e te akarekareka anga i te tangata kia rauka te apinga.

17 Ka akamaara ra kotou, e aku au akaperepere e, i te tuatua i tuatuaia mai i muatangana e te au aposetolo a to tatou Atu ra a Iesu Mesia;

18 Ta ratou i tuatua maira e, Ka kitea mai te aronga taitoito kia tae ki te tuatau openga ra, i te akono anga i to ratou uaorai au anoano paieti kore ra.

19 Ko te aronga ïa i akataka ke ia ratou uaorai, tei ta te kopapa, ko tei kore i rauka ia ratou te Vaerua ra.

20 Kareka kotou, e aku au akaperepere e, i te patu anga ia kotou uaorai, i to kotou akarongo tapu maata ra, i te pure anga ma te Vaerua Tapu.

21 Tamou tikai kotou i to kotou uaorai inangaro i te Atua, i te tatari anga i te aroa o to tatou Atu o Iesu Mesia, e tae ua atu ki te ora mutu kore ra.

22 Ka aroa atu i tetai pae, ei akonoanga ke ïa,

23 E ka akaora oki i tetai pae ma te mataku, i te aō anga ia ratou no roto i te ai; i te rikarika anga atu i te kakau i viivii i te kino ra.

24 E teianei, ei iaia, ei te tika iaia i te tiaki ia kotou kia kore e inga, e te tuku atu ia kotou ma te apa kore ki mua i te aroaro o tona kakā ma te rekareka maata,

25 Ei te Atua pakari anake, i to tatou Ora ra, te kakā, e te tapunui, te au, e te maroiroi, i teianei oki, e tuatau ua atu. Amene.