Ezekiela

1 E TAE akera ki te toru ngauru o te mataiti, i te a o te marama, i te rima o te rā i taua marama ra, tei rotopu au i te au tuikaa i te vai ra i Kebara, kiritiia akera te rangi, e kite atura au i te orama a te Atua.

2 I te rima o te rā i taua marama ra, ko te mataiti rima ïa o te tuikaa anga o te ariki ra ko Iehoaikina,

3 Ko te tae pu tika anga mai ïa o te tuatua a Iehova kia Ezekiela, te tamaiti a Buzi, taunga ra, i te enua o te Kaledea, i te vai ra ko Kebara; e tei runga maira te rima o Iehova iaia i reira.

4 E kua akara iora au, e i na, e puaioio i te tae anga mai no te pae i apatokerau ra, tetai tumurangi maata, e te ai i te taviriviri katoa anga ki roto iaia uaorai, e te kakā e pini ua ake i te reira, e i rotopu ra mei te veo kanapanapa te tu, i rotopu i taua ai ra.

5 E mei rotopu mai i te reira mei nga mea ora e a ra te tu. Teia oki to ratou tu; mei to te tangata nei rai to ratou tu.

6 Taki a anake rai o ratou mata, taki a oki o ratou peau e pini ua ake.

7 E to ratou vaevae, e vaevae tikaoru ua ïa: e to ratou maikao-vaevae o te punua puakatoro ra ïa: e mei te veo akakakāia ra to ratou tu i te purapura anga mai.

8 E rima tangata oki to ratou i raro ake i o ratou peau, i nga pae katoa e a ra; e tei ia ratou katoa toko a ra o ratou puke mata ma o ratou peau.

9 Topiriia iora to ratou peau ki tetai ki tetai; kare ratou i aririu kia aere; aere tika ua ratou ravarai ra na mua.

10 E te tu o to ratou au mata, e mata tangata to ratou katoa toko a ra, e te mata liona i te pae katau: e to ratou katoa e toko a ra e mata puakatoro ïa i te pae kaui; e te mata aeto to ratou katoa toko a ra.

11 Ko te tu ïa o to ratou au mata; e to ratou au peau i te totoa anga ki runga ra; e rua ake peau o ratou ravarai i te piri anga ki te tetai ki tetai, e ko e rua oki ei tapoki ïa i o ratou tino.

12 E aere tika ua ratou ravarai ra na mua: ta te vaerua i aere ra, kua aere katoa ratou; kare i ariu kia aere ratou ra.

13 E te tu o aua nga mea ora ra, e tau to ratou tu ki te ngarau ai e mura ra, e mei te tu o te au lamepa ra: kua peke ki runga, e kua oki mai ki raro, na roto i aua nga mea ora ra; e mea kakā oki taua ai ra, e kua koraparapa maira te uira no roto i taua ai ra.

14 Kua oro iora aua nga mea ora ra, e kua oki maira mei te korapa anga uira ra te tu.

15 Te akara ua ra au i aua nga mea ora ra, e i na, e porotata tei runga i te enua nei i te pae o aua nga mea ora ra, e nga aro katoa e a ra.

16 Te tu o taua nga porotata ra, e ta ratou angaanga, mei te berulo areare te tu: e okotai o ratou arite e a katoa ra: e to ratou tu e ta ratou angaanga, mei te mea e, e porotata i rotopu i tetai porotata.

17 E kia aere ratou ra, na runga i nga pae katoa e a ra kia aere kare oki ratou e ariu kia aere.

18 E to ratou au tatua ra, e to ratou teitei, e mea matakutaku; e to ratou au tatua ra, kua ki ïa i te mata e pini ua ake ratou e a katoa ra.

19 E kia aere aua nga mea ora ra, kua aere katoa nga porotata i vaitatao; e kia apaiia nga mea ora ki runga i te enua nei, kua apai katoaia nga porotata ki runga.

20 Te au ngai katoa i aereia e te vaerua ra, kua aere katoa ratou, i reira oki te vaerua i te aere anga; kua apai katoaia nga porotata i vaitatao: tei roto oki te vaerua o taua nga mea ora ra i te au porotata ra.

21 Kia aere tera aronga, kua aere katoa teia; e kia tu ua tera aronga, kua tu katoa teia; e kia apaiia tera aronga ki runga i te enua nei, kua apai katoaia nga porotata i vaitatao; tei roto oki te vaerua o taua nga mea ora ra i te au porotata.

22 E mei te reva nei te tu i te vairanga mai i runga ake i te mimiti o aua nga mea ora ra, mei te io areare rikarikaia ra te tu, i te oora angaia na runga ake i to ratou upoko.

23 E ko raro ake i taua reva ra, te tika ua ra to ratou peau ki tetai ki tetai: taki rua anake rai to ratou ei tapoki i to ratou tino i teia pae, e taki rua oki to ratou ei tapoki i to ratou tino i tera pae.

24 E kia aere ratou ra, kua akarongo au i te aruru o to ratou au peau, mei te aruru o te tai maata ra, mei te reo o te Mana katoatoa ra, te reo tuatua mei te maoro o tetai nuku ra: kia tu ua ratou ra, kua tuku ratou i o ratou peau.

25 E tetai reo maira no roto i te reva i runga ake i to ratou upoko: kia tu ua ratou ra, kua tuku i o ratou peau.

26 E ko runga i te reva ki runga i to ratou au upoko ra, mei tetai terono te tu, mei te toka saphiro te tu: e i runga ake te tu o te terono ra, e arite anga mei te tu o te tangata i rungao i te reira.

27 Kua akara iora au mei te veo kanapanapa te tu, mei te tu o te ai ra e pini ua ake i roto i te reira ra; mei tona taukupu e runga akera, e mei tona taukupu e raro iora, akara atura au e mei te ai te tu, e kua pini akera aia i te kakā.

28 Mei te tu o te anuanua e vai i roto i te tumurangi i te rā ua nei, ko te tu ïa o te kakā e pini ua ake. Ko te tu ïa teia o te arite anga o te kakā o Iehova. E tei te kite anga atu au ra; kua tipapa iora au ki raro te mata, e kua akarongo atura au i te reo o tetai i tuatua maira.