Galatia

2 E RAUNGAURU ma a akera mataiti i topa, aere atura au ki runga ki Ierusalema, maua katoa ko Banaba, e arataki katoa atura au ia Tito.

2 E tae akakiteia toku ki runga, kua tuku atura au kia ratou i taua evangelia rai taku i ako aere i te au etene; i akakite poiri ra au i te aronga mamaata, ko te riro oki toku aro anga ei mea puapinga kore, e ko te oro puapinga kore aea au.

3 Ko Tito oki, ko tei aru iaku ra, e Eleni ua rai aia, kare aia i tōia kia peritomeia:

4 No te mea e aronga taeake pikikaa tei akatomo poiriia mai, ko tei aere poiri mai e akara matariki i to matou rangatira i te Mesia nei ia Iesu, kia tapeka akaouia matou:

5 Kare ra matou i tuku ua atu kia ratou i te kauraro anga atu, e okotai ua ake ora iti; kia vai rai te tuatua-mou o te evangelia ia kotou na.

6 E taua aronga i manakoia e e tu ke, e to ratou tu i muatangana, kare au i akono i te reira: kare oki te Atua i akono i to te tangata nei tu: kare rava aku puapinga i rauka i taua aronga i tu ke ra i te tuatua anga;

7 Kare oki ïa, kia kite ra ratou e, kua tukuia mai te evangelia o te peritome kore kiaku nei, mei te evangelia o te peritome i tukuia mai kia Petero ra;

8 (Ko tei akatupu tikai oki i te angaanga ia Petero i te taoonga aposetolo i te peritome ra, ko tei angaanga ririnui katoa rai ïa iaku ki o te etene:)

9 E kite akerā Iakobo, ma Kepha, e ko Ioane, (ko tei manakoia ra e, e au pou,) kite akera i te aroa ua i orongaia mai kiaku nei, kua o mai ratou i te rima katau aroa kia maua ko Banaba; kia aere atu maua ki o te etene, e ei ia ratou te peritome.

10 I inangaro ra ratou kia akono maua i te aronga o ra; ko taku katoa i rapurapu i te rave i taua mea ra.

11 Kia tae rā Petero ki Anetioka, patoi ua atura au iaia ki mua i tona aroaro, no te mea e apa tika tana.

12 Tetai aronga ki o Iakobo ra kare ratou i tae, te kai ra aia ma te au etene katoa: kia riro maira ratou, kotoe ke akera aia, akataka atura iaia uaorai, i te mataku i to te peritome.

13 Koia katoa tetai aronga ngati Iuda kua tapikipiki ratou ma ia katoa: e riro katoa atura oki a Banaba i taua pikikaa na ratou ra.

14 E kite akera au i to ratou aerenga tika kore i te tuatua-mou o te evangelia nei, karanga atura au kia Petero ki mua ia ratou ravarai, Te akono na koe te ngati Iuda i ta te etene, kare i ta te ngati Iuda, eaa oki koe i māro atu ei ki te etene e akangati Iuda?

15 Ko tatou ko te ngati Iuda anau nei, kare te tangata are no te etene,

16 Kua kite oki tatou e, kare ua te tangata e tika i te angaanga a te ture, i te akarongo ra ia Iesu Mesia, i akarongo katoaʼi tatou ia Iesu Mesia, kia akatikaia i te akarongo i te Mesia, auraka i te angaanga a te ture; kare rava e tangata e tika i te angaanga a te ture.

17 Te kimi nei tatou kia akatikaia mai e te Mesia ra, e te noo rave ara ua nei rai tatou, ka riro aina te Mesia ei tavini no te ara i reira? Auraka rava ïa.

18 E kia akatu akaou au i taku i akatopa ra, kua akariro au iaku uaorai ei tangata ara.

19 Ko au ra, no te ture, kua mate ïa au i te ture, kia ora au i te Atua.

20 Kua akasatauroia au maua ko te Mesia: te ora ua nei ra au; kare ra au, te ora nei te Mesia i roto iaku nei: e toku nei ora anga i roto i te kopapa nei, te ora nei au i te akarongo i te Tamaiti a te Atua, ko tei aroa mai iaku, e kua oronga mai iaia uaorai noku.

21 Kare au i akangere i te aroa ua o te Atua; no te ture te tuatua-tika i akatakaia mai ei ra, e matenga puapinga kore to te Mesia i reira.