Ieremia

31 I TAUA tuatau ra, te tuatua mairā Iehova, e riro ei au ei Atua no te au kopu-tangata katoa o Iseraela, e ei tangata ratou noku.

2 Te na ko mairā Iehova, Ko Iseraela, e au tangata i toe i te koke, i kite aroaia ratou i te medebara, iaku i aere ei akaanga i to ratou roi.

3 Kua kiteia e au Iehova, mei taito mairai, na ko maira, Koia ïa, kua inangaroia oki koe e au i te inangaro mutu kore ra; i akatae mai ei au ia koe i te aroa takinga-meitaki.

4 E patu akaou au ia koe, e e patuia koe, e te paretenia ra e Iseraela e: e akamanea akaouia koe ma te au tophe naau ra, ka aere katoaʼi i te ura anga e te aronga akarekareka ra.

5 E tanu akaou koe i te kainga vine ki runga i te au maunga i Samaria: ka tanu te aronga tatanu, ka kai anoanoa oki i tei ua ra.

6 Ka tae oki te rā, ka kapiki ei te aronga tiaki i runga i te maunga ra i Epheraima, Ka tu kotou, ka aere tatou ki Ziona, ki to tatou Atua ra, kia Iehova.

7 Te na ko maira oki a Iehova, Ka imene ma te rekareka ia Iakoba, ka maeva i rotopu i tei maata i te pa enua ra: tutu aere ua kotou, akameitaki rai kotou, e na ko, E Iehova e, e akaora i to iti-tangata, i te toenga o Iseraela.

8 I na, e arataki mai au ia ratou mei te enua i apatokerau mai, e akaputuputu mai au ia ratou mei te au openga mai o te enua ra; ko ratou, e te matapo, e te pirikoki katoa ra, te vaine nui, e tei rokoia katoaia e te mamae ra: e aronga maata te ka oki mai ki ku nei.

9 E aere mai ratou ma te aue, e ma te pure katoa ra ratou, kia arataki mai au: e arataki au ia ratou ki te au vai peka ra, e na te ara maniania, kare ïa ratou e turori i reira: kua riro oki au ei metua no Iseraela, e ko Epheraima, ko taku ïa tama mua.

10 Akarongo mai i te tuatua a Iehova, e te pa enua e, e akakite kotou ki te au enua mamao i taatai ra, ka na ko atu ei, Ko tei akapueu ia Iseraela, nana ïa e akaputuputu iaia, e nana aia e tiaki, mei ta te tiaki ra i tana ra anana.

11 Kua akaora oki a Iehova ia Iakoba, e kua okoia aia e ia i te rima o tei ririnui iaia ra.

12 E aere mai oki ratou, e imene oki ratou, i te au ngai teitei i Ziona, e maringi ua mai ratou i te takinga-meitaki a Iehova, i te sitona, e te wina ou, e te inu, e te au punua a te anana, e ta te au puakatoro: e riro oki to ratou vaerua mei te kainga i tamauu meitakiia i te vai ra; e kare oki ratou e paruparu akaou.

13 Ei reira te paretenia e rekarekaʼi i te ura anga, e te au tangata ou ma tei ruaine katoa ra: e akariro oki au i to ratou aue ei rekareka, e akapumaana oki au ia ratou, e akarekareka oki au ia ratou i to ratou aue ra.

14 E akamerengo oki au i te vaerua o te kau taunga i te matu, e pangia te kaki o toku au tangata i te meitaki naku, te tuatua mairā Iehova.

15 Te na ko mairā Iehova, E reo tei kitea i Rama, te aue, e te mii maata roa; ko Rahela i te iriea anga i tana au tamariki, e kare rava akera i na i ana tamariki, no te mea kare nei ratou.

16 Te na ko mairā Iehova, Ka tāpu na to reo i te aue, e to mata i te roi-mata na: e tutakiia mai oki taau angaanga ra, te tuatua mairā Iehova; e oki mai ïa ratou i te enua o te enemi.

17 Te vai na te manako anga tei toou openga, te tuatua mairā Iehova, e oki mai oki to au tamariki ki to ratou uaorai kotinga.

18 Kua akarongo oki au ia Epheraima i te aue anga iaia uaorai; kua na ko akera, Kua ako mai koe iaku, e kua akoia au, mei te puakatoro kare i tamātauia ra: e akaariu koe iaku, e kua akaariuia ïa au i reira, ko koe oki toku Atua ko Iehova.

19 Oti akera oki toku akaariu angaia, kua tataraara iora au; e oti akera toku apii angaia, kua papaki iora au i taku ūā: akama akera au, koia ïa, kua aringaringa oki, no te mea kua apai au i te akakino o toku ou anga ra.

20 E tamaiti akaperepere ainei a Epheraima naku? e tamaiti inangaroia ainei aia? mei taku oki tuatua anga atu iaia, kua manako tamou atu rai au iaia: e teianei, kua tangi toku ngakau iaia; e aroa atu rai au iaia, te tuatua mairā Iehova.

21 Ka akatu ana i te akairo arataa ra naau, ei rakau roa taau e akatu: ka anga na to ngakau ki te arataa, te ara i aereia e koe ra: ka oki, e te paretenia ra e Iseraela, ka oki ki teia au oire noou ra.

22 Mei te aa te roa o tenana ekoko, e tera ra tamaine kotoe ki muri e? te rave nei a Iehova i tetai mea ou i te enua nei, E pini te tane i te vaine.

23 Te na ko mairā Iehova Sabaota ra, te Atua no Iseraela; E tuatua akaou ratou i teianei tuatua i te enua o Iuda, e i tona ra au oire, kia akaoki mai au i to ratou tuikaa anga ra, Kia ora na koe ia Iehova, e te Nooanga tuatua-tika e, te Maunga tapu ra e.

24 Ka noo oki Iuda i reira, e te au oire katoa nona ra, te aronga tanu-kai, e te aronga katoa i tiaki i te anana ra.

25 Kua akamerengo oki au i te vaerua i roiroi ra, e kua akapangia oki au i te au vaerua katoa i paruparu ra.

26 Kua itirere akera au i reira, e kua nānā akera; e kua anga marie akera taua moe noku ra.

27 I na, e tae maira te au rā, te tuatua mairā Iehova, e ruru atu ei au i te ngutuare o Iseraela, e te ngutuare o Iuda, i te uanga o te tangata, e te uanga o te puaka.

28 E riro oki mei iaku i tapapa ia ratou, ei kiriti, e ei vavaʼi ki raro, ei uritumu, e ei akapou, e ei akatumatetenga; ka tiaki katoa au ia ratou, ei patu, e ei tanu, te tuatua mairā Iehova.

29 I te reira au rā, kare ratou e karanga akaou e, Kua kai te au metua i te vine kava, e kua mania te nio o te tamariki.

30 E mate ra te tangata katoa i tana uaorai ara: te tangata katoa i kai i taua vine kava ra, tona uaorai te nioa e mania ra.

31 I na, e tae maira te au rā, te tuatua mairā Iehova, e papau ei au i te ngutuare o Iseraela, e i te ngutuare o Iuda, i tetai koreromotu ou:

32 Auraka mei te koreromotu taku i papau i to ratou ra au metua, i te rā i rave ei au i to ratou rima, e arataki mai ia ratou mei te enua maira mei Aiphiti; e kua akaatikauia iora e ratou taua koreromotu naku ra, akaruke iora au ia ratou, te tuatua mairā Iehova:

33 Teia ra te koreromotu taku e papau i te ngutuare o Iseraela, i muri ake i te reira au rā, te tuatua mairā Iehova, E tuku au i taku ture ki roto ia ratou, e tataia e au ki runga i to ratou ngakau; e e riro au ei Atua no ratou, e riro oki ratou ei tangata noku.

34 Kare oki ratou e apii akaou, ko te tangata ko tona tangata tupu, ko te tangata ko tona taeake, i te na ko anga atu e, Kia kite kotou ia Iehova: e kite katoatoa oki ratou iaku, ko tei mea ngiti i o ratou, e tae ua atu ki tei maata i o ratou, te tuatua mairā Iehova: e akakore oki au i ta ratou ara, e kare au e manako akaou i to ratou kino.

35 Te na ko mairā Iehova, ko tei tuku i te rā ei mārama no te ao, e te au akonoanga o te marama, ma te au etu, ei mārama no te po; ko tei akamarino i te tai kia aruru tona au ngaru ra; ko Iehova Sabaota ra tona ingoa:

36 Kia taka ke atu teianei au akonoanga i mua iaku nei, te tuatua mairā Iehova, ei reira katoa e kore ei te uanga o Iseraela i mua iaku nei, e kare atura ïa e vaka tangata e tuatau ua atu.

37 Te na ko mairā Iehova; Kia tika te rangi ki runga ra kia aite, e kia kitea te tumu o te enua nei ki raro kia kimi, ei reira au e akaruke ei i te uanga katoa o Iseraela, no te au mea katoa ta ratou i rave ra, te tuatua mairā Iehova.

38 I na, e tae maira te au rā, te tuatua mairā Iehova, e patuiaʼi te oire nei no Iehova, mei te punanga o Hananeela e tae atu ki te pa ki te poo patu ra.

39 E tataki tikaia te taura aite ra, i te tika ua anga, na runga i te tuaivi ra o Gareba, e e akapiniia Goata.

40 E taua o kopapa mate katoa ra, e te reu ai, e te au kainga katoa, e tae ua atu ki te kauvai ra ki Kederona, e tae ua atu ki te poo patu i te ngutupa oroenua, i te pae i te itinga o te rā ra, e tapu ïa no Iehova; kare e kiritiia, e kare oki e uritumu akaouia e tuatau ua atu.