Salamo

18 TE inangaro atu nei au ia koe e Iehova, e toku maroiroi.

2 Ko Iehova taku mato, e taku punanga, e toku nei ora; toku Atua, toku mato, koia taku ka irinaki atu; taku paruru e te tara o toku ora, toku are teitei.

3 E kapiki au ia Iehova, e tau iaia kia akameitakiia; e ka ora iora au i toku au enemi.

4 Kua akapiniia au e te taura o te mate; mataku rava akera oki au i te vai puke o te akono kore i te Atua ra;

5 Kua akapiniia au ki te taura o ade ra; kua tukuia te ereere o te mate iaku:

6 Kua kapiki au kia Iehova i toku tumatetenga ra; e kua kapiki atura au ki taku Atua; e kua akarongo aia i toku reo i tona nao ra, e kua tae toku aue ki mua iaia, ki roto i tona taringa.

7 Kua ngaueue iora te enua, e kua rutetetete; e kua keukeu atura te au tumu o te maunga, e kua ngaueue, no te mea kua riri aia.

8 Kua peke akera te auai no roto i tona putaiu, e te ai kakai ra no roto i tona vaa; kua ka iora te ngaru ai i te reira.

9 Kua tuku akaaka katoa mai aia i te rangi, e kua eke maira: e poiri pangopango tei raro ake i tona vaevae.

10 Kua noo aia ki runga i te kerubi, e kua rere; rere atura oki aia na runga i te peau o te matangi.

11 Kua akariro aia i te poiri ei tapoki nona, te vai poiri, e te tumurangi patapatatue o te rangi ra, tona are e pini ua ake aia ra.

12 No te kakā o tona aroaro, peke atura te au tumurangi patapatatue nana ra, te ua toka, e te ngarau ai ra.

13 Kua tuku mairā Iehova i te mangungu i runga i te rangi ra, kua akakite maira Tei Teitei i tona reo, i te ua toka e te ngarau ai ra.

14 Kua akainana iora aia i tana kakao, e akapueurikiriki ke ia ratou; kua akakoraparapa atura aia i te uira, ati atura ratou.

15 Kua kitea iora te papa o te moana i reira, e kua kite iora te au tumu o te enua, i to akamura anga mai, e Iehova, i te aruru anga i te aʼo o to riri.

16 Kua akatika maira aia i tona rima mei runga mai, kua rave maira iaku; kua totō maira iaku no raro i te au vai maata ra.

17 Kua akaora akera aia iaku i toku enemi ririnui ra, i tei makitakita mai iaku ra; no te mea, e ririnui to ratou i toku.

18 Kua rokoia putia au e ratou i te rā i tumatetengaʼi au ra; ko Iehova ra toku turu.

19 Kua apai katoa aia iaku ki te ngai atea; kua akaora aia iaku, no te mea te mataora maira aia iaku.

20 Kua tutaki mairā Iehova iaku i tei tau i taku tuatua-tika: kua aite i te viivii kore o toku rima tana tutaki anga mai iaku:

21 No te mea kua akono au i te au arataa o Iehova, e kare rai au i akaruke kino ua i toku Atua.

22 No tei mea te mua tana katoa ra au tuatua-tau iaku; e tana au ture, kare rai au i akaruke i te reira;

23 E tiratiratu katoa toku ki mua iaia, e kua tiaki au iaku uaorai i toku kino:

24 Kua tutaki mai a Iehova iaku i tei tau ki te tuatua-tika naku ra; ko tei tau ki te viivii kore o toku nei rima i mua i tona aroaro.

25 I te tangata e aroa ua ra, e aroa ua katoa koe; e te tangata tiratiratu katoa taau.

26 I te tangata e viivii kore ra, e viivii kore katoa taau; kareka te tangata ketaketa ra, e riro katoa koe i te māro.

27 Ko te aronga i tairoia ra, e akaoraia ïa e koe ra: ko te mata teitei ra, ka tukuia ïa e koe ki raro.

28 Ko koe rai te ka tutungi i taku lamepa: e akamārama mai taku Atua a Iehova i toku nei poiri.

29 Ia koe rai i mama atu ei au na roto i te takanava toa ra; e kua taea te patu e au i taku Atua.

30 Ko te Atua ra, kua tika rava tona aerenga; e tuatua timata uaia ta Iehova: ko te paruru aia ki te aronga katoa e irinaki iaia ra.

31 Koai tikai te Atua mari ra ko Iehova? koai oki te mato mari ra ko to tatou Atua?

32 Ko te Atua i tatua mai iaku ki te maroiroi, e kua akariro i toku nei arataa ei mea apa kore.

33 Te akariro nei aia i toku vaevae nei mei to te aili; e te akatinamou nei aia kiaku nei i te au ngai teitei.

34 Te apii nei aia i toku rima i te tamaki: kua aatiia e oku nei rima te ana veo ra.

35 Kua oronga katoa mai koe kiaku i te paruru ora naau; e na to rima katau i tauturu mai iaku; e no toou maru i maataʼi au.

36 Kua akaatea koe i toku takainga vaevae i raro ake iaku: kia kore oku vaevae e paeke.

37 I aruaru atura au i toku au enemi, e rokoia atu ratou e au; e kare au i oki, e ope akera ratou i te pou.

38 Kua ta au ia ratou, e kare atura i tika ia ratou kia tu mai ki runga: kua topa ratou ki raro ake i toku vaevae.

39 Naau oki au i tatua i te maroiroi i te tamaki: e te aronga i tu ki runga iaku nei, kua tuku akaaka koe ki raro ake iaku.

40 E kua oronga mai oki koe i te kaki o toku au enemi; kia pou iaku tei makitakita mai iaku ra.

41 Kua kapiki ratou, e kare e ora: kua kapiki kia Iehova, e kare aia i ki mai.

42 Pāpā atura au ia ratou, e ungaungātiti rava akera, mei te one-pueu i te matangi ra; akaruke atura au ia ratou mei te vari i te arataa ra.

43 I te karo anga o te tangata ra, kua akaora mai koe iaku, e kua tukuia au e koe ki runga i te au etene; ko te aronga kare i kitea e au ra, ka tavini ïa iaku.

44 Tei te kite anga mai iaku ra, ka akarongo mai ratou iaku: te pa enua ke ke ra, ka tatomo ïa kiaku.

45 Te pa enua ke ke ra, ka mae ïa, e ka rutetetete ratou i roto i to ratou au punanga ra.

46 Te ora rā Iehova! e kia akameitakiia taua Mato noku ra! e kia akateiteiia te Atua e oraʼi au ra!

47 Ko te Atua ko tei akaoko mai iaku ra, ko tei akavi mai i te tangata i raro ake iaku ra,

48 I te akaora anga iaku i toku au enemi ra: e kua akateitei koe iaku i runga ravao i tei māro mai iaku; kua akaora koe iaku i te tangata rotoriri ra.

49 E teianei e akameitaki au ia koe, e Iehova, i rotopu i te au etene ra, e imene akapaapaa rai au i toou ingoa.

50 E ora maata tana i oronga mai ki tona ariki; e te akakite maira aia i te aroa ki tei akamainuia e ia, kia Davida, e tona uanga, e tuatau ua atu.