Isaia

43 TEIANEI ra, te na ko mairā Iehova; ko tei anga ia koe, e Iakoba; e ko tei akaaite ia koe, e Iseraela: Auraka e mataku, kua akaoraia koe e au; naku i tapa i toou ingoa na; noku koe.

2 Kia aere koe na raro i te moana, ei vaitata rai au ia koe; e kia na raro i te vai taʼe, kare koe e ninaia; kia aere koe na roto i te ai, kare koe e pakapaka; kare oki te mura ai e mou mai ki runga ia koe.

3 Ko au oki toou Atua, ko Iehova; Tei Tapu i Iseraela nei, ko toou ïa Akaora: kua oronga au ia Aiphiti ei oko ia koe; ko Kusa, e ko Seba, ei tutaki noou.

4 No te mea e apinga tumanava koe ki mua i oku mata, kua akateiteiia koe; no toku inangaro ia koe, i orongaʼi au i te au tangata ei tutaki noou, e te au enua ei ora noou.

5 Auraka koe e mataku; ei vaitata rai au ia koe: e arataki mai au i toou uanga mei te itinga o te rā mai; e akaputuputu mai au ia koe mei te opunga o te rā mai;

6 E karanga atu au kia apatokerau, Ka tuku mai; e kia apatonga, Auraka e tāpuia: e arataki mai i taku au tamariki tamaroa mei te au ngai mamao mai, e taku au tamaine mei te au openga mai o te enua nei;

7 Te aronga katoa i tapaia i toku nei ingoa: ko tei angaia e au kia kakā au ra; naku i akaaite i tona tu; e naku rai i anga.

8 E arataki mai i te aronga matapo, mata ua rai to ratou; e te turi, taringa ua rai to ratou.

9 Kia putuputu te pa enua katoa, e kia takiruru mai te au tangata katoa. Koai to rotopu ia ratou e akakite mai i teia, e akakite mai i te au mea taito? E tuku mai ana i to ratou aronga kite kia akatikaia ratou: kia akarongoia ta ratou e kia karangaia, E tuatua-mou.

10 Te tuatua mairā Iehova, Ko kotou toku kite, e toku tavini i ikiia e au ra: kia kite kotou, e kia akarongo mai iaku, e kia kite e, ko Au ïa. Kare e Atua i angaia i mua iaku, e ko muri ake iaku, kare rai ïa.

11 Ko au, ko au nei ko Iehova; kare rava oki e Akaora mari ra ko au.

12 Kua akakite au, e kua akaora oki au, ko au tei akakite, e kare oki tetai atua ke i rotopu ia kotou: e tenana, ko kotou toku kite e, ko au te Atua, te tuatua mairā Iehova.

13 Ou te ao nei, ko Au rai ïa; e kare rava e akaora i tei tae ki toku rima: e rave rai au, e naai e akakore?

14 Te na ko mairā Iehova, to kotou Akaora, Tei Tapu i Iseraela nei: No kotou i ungaʼi au i te karere ki Babulonia, e naku i vavaʼi i te au arai ketaketa katoa nona ra ki raro, e te au Kaledea e rekareka i to ratou au pai ra.

15 Ko au ko Iehova, ko Tei Tapu ki o kotou nei, ko tei anga ia Iseraela, ko to kotou Ariki.

16 Te na ko mairā Iehova, ko tei anga i te ara na raro i te tai, e te arataa na te moana maata ra;

17 Ko tei arataki mai i te kariota e te oroenua, te nuku, e te urupu toa maata ra; okotai o ratou oropapa anga ki raro; kare e tu akaou mai: i tamateia iora ratou, e mate atura mei te vavai mori ra:

18 Auraka e manakoia tei muatangana ra au mea, e tei taito ra au peu, auraka e akonoia atu:

19 I na, e mea ou taku e rave nei; i teianei rai e tupu ei; e kare ainei kotou e akono i te reira? koia ïa, i te medebara e anga ai au i tetai arataa; e tetai aronga vai taʼe i te enua marō.

20 Na te au puaka o te vaorakau e akangateitei mai iaku, te au taae, e te au tamaine o te ione ra: no te mea kua oronga au i te vai i te medebara, te vai taʼe i te ngai papa-marō ra, ei vai no toku ra iti-tangata, i ikiia e au ra.

21 I angaia e au teia iti-tangata nei noku uaorai; na ratou e akameitaki mai iaku.

22 Kare ra koe i tautopa mai iaku, e Iakoba e, e kua akamaromaroa rai koe iaku, e Iseraela.

23 Kare koe i apai mai i te punua mamoe o taau atinga karakaratio iaku nei; kare oki koe i akateitei mai iaku i taau ra au atinga: kare au i akateiaa ia koe i te atinga kai, e kare oki i akaroiroi ia koe i te umuumu anga atu i te atinga kakara.

24 Kare koe i oko i te to venevene naku i te moni; e kare oki au i akaiuia e koe i te tongaua o taau au atinga: kua akateiaa maira koe iaku i taau ra au ara; kua akaroiroi mai koe iaku i toou kino.

25 Ko au, ko au nei ra, ko tei taparapara i taau ra au tuatua kino noku uaorai, e kare oki au e manako akaou i taau ra au ara.

26 E akakitekite mai kia maara atu au: kia aite katoa i ta taua akavaanga: e akakite mai i taau tuatua, kia tikaia mai oki koe.

27 Ko to metua maata tei araia; e to au orometua ra, kua ara ïa iaku nei.

28 I viivii ei iaku te aronga nunui o te ngai-tapu, i tuku atu ei au ia Iakoba ei mea taumaaia, e ia Iseraela, kia akakinoia.