Numero

6 KUA tuatua mairā Iehova kia Mose, na ko maira,

2 E karanga atu koe ki te tamariki a Iseraela, e na ko atu kia ratou, Kia akataka tetai tane e tetai vaine iaia uaorai, e tia i te tia Nazira, ei akataka anga iaia uaorai no Iehova ra:

3 Kia taka ke iaia te wina e te kava kona, auraka aia e inu i te vinega vine e te vinega kava kona, e te vai katoa no roto i te vine ra, auraka aia aia e inu, auraka oki e kai i te vine mata, e te vine marō. 4 Te au rā katoa o tona akataka anga, auraka aia e kai i to roto i te vine, i te atu vine e tae ua atu ki te kiri ra.

5 Te au rā katoa no tana tia akataka anga iaia ra, auraka roa e reta e tae ki runga i tona mimiti; e kia ope roa te au rā i akatakaʼi aia iaia uaorai no Iehova ra, kia tapu aia, e vaio ua aia i tona makave rauru kia tupu ua na.

6 Te au rā katoa i akatakaiaʼi aia no Iehova ra, auraka roa aia e akavaitata ua atu ki tetai tangata mate.

7 Auraka aia e akaviivii iaia uaorai i tona metua tane, e tona metua vaine, e tona taeake, e tona tuaine, kia mate ra, no te mea, ko te akairo Nazira o tona ra Atua tei runga i tona mimiti. 8 Te au rā katoa i akatakaiaʼi aia ra, te tapu ra ïa aia no Iehova. 9 E kia mate vave ua tetai tangata i vaitata iaia ra, kua viivii tona mimiti akatakaia i reira; e varu aia i tona mimiti kia tae ki te rā tamā anga iaia ra, ei te rā itu aia varu ei.

10 E kia tae ki te rā varu ra e apai mai aia i e rua puke kukupa, e kare ra, kia rua punua rupe, ki te taunga, i te ngutupa o te Are uipaanga ra: 11 E na te taunga e apai i tetai ei tarangaara, e tetai ei atinga karakaratio, nana oki e apai i te tapokiangaara nana, i te ara i taua tangata i mate ra, e ka akatapu aia i tona mimiti i aua rā ra. 12 E kua oti tetai punua mamoe mataiti okotai i te apaiia mai e ia ei tutakingaara, e akataka akaou rai aia i taua au rā Nazira anga nona ra no Iehova: kare oki tei muatangana ra au rā e tatauia, no te mea kua viivii taua peu Nazira nona ra. 13 Teia te ture na te Nazira, kia ope te au rā katoa o tona Nazira anga; e akakite aia iaia uaorai i te ngutupa o te Are uipaanga ra;

14 E apai mai oki aia i tana atinga kia Iehova ra, okotai punua mamoe toa mataiti okotai, e te kino kore, ei atinga karakaratio, okotai oki punua mamoe ua mataiti okotai, e te kino kore, ei tarangaara, e tetai mamoe toa kino kore ei atinga au, 15 E tetai kete kai akaopue kore ra, ei areto faraoa pueu i irokia ki te inu ra, e te uefa akaopue kore i tainuia ra, e te atinga kai no te reira, e to reira oki atinga inu ra. 16 E na te taunga e apai mai i te reira ki mua i te aroaro o Iehova ra, e nana e apai i tana tarangaara, e tana atinga karakaratio:

17 E nana e apai i te mamoe toa kia Iehova ra, ei atinga au, e te kete areto akaopue kore: e na te taunga katoa e apai i to reira atinga kai, e to reira oki atinga inu ra.

18 Ei reira taua Nazira ra e varu ei i tona mimiti akatakaia ra i te ngutupa o te Are uipaanga ra, ka rave ei i te rauru o tona mimiti akatakaia ra, ka tuku ei ki runga i te ai i raro ake i te atinga au ra. 19 Ka rave oki te taunga i te ūā mua mamoe toa i tunuia ra, e tetai areto akaopue kore ra, e tetai uefa akaopue kore i roto i te kete ra, ka tuku ei ki roto i te rima o taua Nazira ra, kia oti ake tona mimiti akatakaia i te varuia ra: 20 E na te taunga e ruru i te reira ei atinga ruru ki mua i te aroaro o Iehova; e mea tapu te reira na te taunga, e te uma i ruru katoaia, e te ūā mua i apaiia ki runga ra: e i muri ake i te reira e tika te Nazira kia inu i te wina. 21 Ko te ture teia a te Nazira kia tia ra, e no tana atinga kia Iehova, no tana peu Nazira ra, ka apai katoaʼi i te rauka ua mai iaia: ko te tia tana i tia ra ko tana ïa e rave, kia tau i ta te ture no tana peu Nazira ra. 22 Kua tuatua mairā Iehova kia Mose, na ko maira,

23 E karanga atu kia Aarona e ana puke tamariki, e na ko atu, Ka akapera kotou i te akaora i te tamariki a Iseraela, e na ko atu kia ratou,

24 Kia akameitaki mai a Iehova ia koe, e kia tiaki mai ia koe:

25 Kia akakakā mai a Iehova i tona mata ki runga ia koe, e kia aroa mai ia koe:

26 Kia nānā mai a Iehova i tona mata ki runga ia koe, e kia oronga mai i te au ia koe.

27 E akapera ratou i te akaiki i toku ingoa ki runga i te tamariki a Iseraela; e e akaora ïa au ia ratou.