2 Paraleipomeno

20 E MURI ake oki i te reira, kua aere maira te tamariki a Moabi, e te tamariki a Amona, ko ratou e tetai aronga ke oki kare te ngati Amona, e tamaki ia Iehosaphata.

2 Kua aere maira tetai aronga kua akakite maira kia Iehosaphata, na ko maira, E aronga maata tera, te tiki maira ia koe mei tetai pae tai mai mei Arama; e i na, tei Hazazonatamara ratou, koia Enigedi.

3 Kua mataku iorā Iehosaphata, e kua akonokono iora e kimi ia Iehova, e kua tutu aere i te akakoreanga kai e pini ua ake Iudea katoa ra.

4 Kua akaputuputu maira Iuda e kimi ia Iehova kia turuia mai: mei roto mai oki i te au oire katoa o Iuda to ratou aerenga mai e kimi ia Iehova.

5 Kua tu mairā Iehosaphata i roto i te uipaanga o Iuda e Ierusalema, i roto i te are o Iehova, ki mua i te paepae ou ra,

6 E kua karanga atura, E te Atua o to matou ai metua e, e Iehova e, kare ainei koe i te Atua i runga i te rangi? ko tei tutara ki rungao i te au basileia katoa o te ao nei? kare ainei tei to rima te mana e te ririnui, e kare rava e tangata e tika kia patoi atu ia koe?

7 Kare ainei ko koe, e to matou Atua, i tuaru ke i to teianei enua i mua i te aroaro o to au tangata ia Iseraela, e kua oronga mai no te uanga o to oa ra ko Aberahama, e tuatau ua atu?

8 E kua noo ratou i reira, e kua akatu i te ngai-tapu i reira no toou ra ingoa, kua tuatua e,

9 Kia rokoia mai matou e te kino ra, mei te koke ra, te utunga, e te makimate, e te onge, kia tu matou ki mua i teianei are, ki mua oki i toou aroaro, (tei roto oki i teianei are toou ra ingoa,) e kia kapiki atu matou kia koe i to matou ra mate, e akarongo mai koe i reira, e e tauturu mai.

10 E teianei, i na, te tamariki a Amona, e ko Moabi, e te maunga ra ko Seira, ko tei kore i akatikaia mai e koe kia rave Iseraela, ia ratou i aere mai mei Aiphiti maira, anga ke maira oki ratou ia ratou, e kare i akapou ia ratou;

11 E i na, te takinga-kino maira ratou ia matou nei, kua aere maira te tuaru ia matou i te tuanga naau nei, taau i o mai kia matou nei ei nooanga.

12 Kare ainei koe e akava ia ratou, e to matou Atua? kare oki o matou nei ririnui, kia tamaki atu i teianei aronga maata, e aere mai e tamaki ia matou nei; kare oki matou i kite i te ravenga kia rave: tei runga ia koe ra to matou mata.

13 Te tu ua ra Iuda katoa ki mua ia Iehova, e ta ratou au tamariki varevare, ta ratou au vaine, e ta ratou au tamariki.

14 Kua aere maira te Vaerua o Iehova ki runga ia Iahaziela, te tamaiti a Zekaria, te tamaiti a Benaia, te tamaiti a Ieiela, te tamaiti a Matania, e ngati Levi, no te au tamariki a Asapha, i rotopu i te uipaanga ra;

15 E kua tuatua maira aia, E akarongo mai ana, e Iuda katoatoa ra, e to Ierusalema, e te ariki e Iehosaphata: Te na ko mairā Iehova kia kotou, Auraka kotou e mataku, auraka oki e tumatetenga i teianei aronga maata: kare na kotou te tamaki, na te Atua ra.

16 Apopo kotou e aere ei ki raro kia ratou; i na, te na runga maira ratou i te kakenga ra ko Ziza; ka rokoia atu e kotou tei te openga mai o te kauvai ra, i te pae i te medebara ra ko Ieruela.

17 Kare kotou e tamaki i tenana, e akamou ua kotou, e tu ua mai kotou, e e akara i te ora a Iehova i o kotou na; e Iuda, e Ierusalema katoa, auraka e mataku auraka e tumatetenga: apopo e aere ei ki vao ka aravei ia ratou: tei ia kotou oki a Iehova.

18 Kua tupou iora te mimiti o Iehosaphata ki raro te mata i te one: kua tipapa maira to Iuda katoatoa, e to Ierusalema, ki raro i mua i te aroaro o Iehova, ma te akamori ia Iehova.

19 E te au ngati Levi no te au tamariki a Kohata, e no te au tamariki a Kora, kua tu maira ki runga e imene ma te reo maata teitei ki te Atua no Iseraela kia Iehova.

20 Kua tu akera ratou ki runga i te popongi roa, aere atura ki te medebara ki Tekoa; te aere ua ra ratou, kua tu ua mairā Iehosaphata, e kua tuatua maira, E akarongo mai ana, e Iedu, e to Ierusalema; e akarongo i to kotou Atua ia Iehova, ka akatinamouia kotou; e akarongo i te au peroveta nana, ka manuia ta kotou.

21 E oti akera tana tuatua anga ki te au tangata, kua akataka atura i te aronga imene kia Iehova, ei akameitaki ma te akangateitei tapu, ka aere ei ratou, na mua i taua nuku ra, ka tuatuaʼi e, E akameitaki ia Iehova, ka tu oki tona aroa e rimua.

22 E tei te tumu anga ratou i taua imene ra kia akameitaki ia Iehova, kua tuku a Iehova i te kotipu e rave i te tamariki a Amona, e ia Moabi, e i te maunga ra i Seira, tei aere mai e tamaki ia Iuda; e kua ta ia ratou uaorai.

23 Kua tamaki atura te tamariki a Amona e Moabi i to te maunga ra to Seira, e ta e kia pou takiri rava ratou: e pou akera to te maunga ra to Seira, kua tupae ua atura i te tainga ia ratou uaorai.

24 E tae atura to Iuda ki te punanga tiaki anga i te medebara, kua akara atura ratou i taua aronga maata ra, e i na, e aronga kopapa mate anake i topaia ki runga i te one, kare rava i ora.

25 E kia aere a Iehosaphata e te au tangata ravarai nona e rave i te apinga ra, kua kitea e ratou i runga i te au kopapa mate ra e apinga maata rava, e te au poe memeitaki, ko tei tarataraia ïa e ratou no ratou uaorai, kare akera e maranga i te apai: ka toru akera o ratou rā i te rave anga i te apinga i te maata.

26 E tae akera ki te po a kua akaputuputu akera ratou i te o ra i Beraka; i reira oki ratou i te akameitaki anga ia Iehova: i tapaiaʼi taua ngai ra, i te o ra, ko Beraka, e tae rava akenei ki teianei rā.

27 Kua oki anake maira to Iuda e to Ierusalema, e ko Iehosaphata katoa na mua ia ratou, e aere ki Ierusalema ma te rekareka; kua akarekareka mai oki a Iehova ia ratou i to ratou au enemi.

28 Kua aere maira oki ratou, ma te au nabala, e te au kinura, e te au pu, ki Ierusalema, ki te are o Iehova.

29 Rokoia iora te au basileia o te pa enua, e pini ua ake, e te mataku i te Atua, i te kite anga ratou e kua tamaki aturā Iehova i te au enemi o Iseraela.

30 Noo marie iora te basileia o Iehosaphata: kua oronga mai oki tona Atua i te au nona e pini ua ake.

31 Au iora to Iehosaphata ki runga ia Iuda: kua tae aia ki te toru ngauru ma rima o tona mataiti i ariki ei aia, e okotai takau ma rima ona mataiti i te ariki anga i Ierusalema. Ko Azuba te ingoa o te metua vaine nona, e tamaine na Silehi.

32 E aere atura aia na te arataa o tona metua o Asa; kare aia i tatipake i te reira, i te rave anga i te mea tika i mua i te aroaro o Iehova.

33 Kare ra te au ngai teitei i akarukeia; kare oki te au tangata i akonokono tikai i to ratou ngakau ki te Atua o to ratou ai metua ra.

34 E te toenga o te tuatua ia Iehosaphata, tei mua e tae ua atu ki te openga, i na, kua oti i te tataia ki roto i te tuatua a Iehu te tamaiti a Hanani ra, ko tei tataia i roto i te tuatua a te ui ariki o Iseraela.

35 E muri ake i te reira, kua topiri atura te ariki o Iuda ko Iehosaphata ki te ariki o Iseraela, kia Ahazia, nana te ravenga kino maata ra:

36 I kapiti aia kiaia e tarai i te pai e ano ki Taresisa: kua tarai iora ratou i te pai i Eziona-gebera.

37 Kua totou iorā Eliezera te tamaiti a Dodava i Maresa ia Iehosaphata, tuatua akera, No te mea kua topiri koe kia Ahazia, kua ngaangaa taau angaanga ia Iehova. Ngaangaa atura te au pai, kare atura i tae ki Taresisa.