2 Paraleipomeno

32 E OTI akera teianei au mea, e kua akatinamouia ïa, kua aere maira te ariki o Asura ko Senakeriba, e kua tomo ki roto ia Iuda, kua patia iora i te puakapa e tamaki i nga oire i akaketaketaia ra, manako akera e ka rauka iaia nona uaorai.

2 E kite akerā Hezekia e tera ake a Senakeriba, e te akakoro ra aia e tamaki ia Ierusalema,

3 Kua akaaiteite akera aia i te tuatua ki te ui mataiapo, e te aronga toa, e momani i te au punavai i vao mai i te oire: e kua tauturu maira ratou iaia.

4 E manganui oki te tangata tei putuputu mai, e kua momani atura ratou i te au punavai ravarai, e te kauvai i taʼe tikai na rotopu i te enua ra, e kua tuatua akera, Kia maata ainei te vai i te kitea anga, kia rokoia mai ei e te ui ariki o Asura ra?

5 Kua akamaroiroi iora oki aia, e kua patu i te patu i ngaangaa ra e ope ua ake, e kua akatu e tae ua atu ki te punanga ki runga; e tetai patu ke rai na vao, e kua akaketaketa iora oki aia ia ia Milo i te oire o Davida, e kua anga oki i te au korare e te au paruru e manganui.

6 Kua akono atura aia i te rangatira no te tamaki i runga i te au tangata, e kua akaputuputu maira ia ratou i vaitata iaia i te arataa i te ngutupa o te oire, e kua tuatua akamaru atura aia kia ratou, na ko atura,

7 E akamaroiroi, e kia kaumaiti, auraka e mataku, auraka e tumatetenga i te ariki o Asura, e taua aronga maata katoa e aru iaia ra; tei ia tatou te maata e iti ua tei iaia.

8 E rima tangata tei iaia; ia tatou nei ra, ko to tatou Atua ïa ko Iehova, ei tupae ia tatou, e ei karo i ta tatou tamaki. Irinaki marie akera te au tangata i te au tuatua a te ariki o Iuda ra a Hezekia.

9 E i muri akera i te reira, kua tono maira te ariki o Asura ra, ko Senakeriba, i te au tavini nona ki Ierusalema, (kareka aia uaorai e te aronga mana katoa nona, te tamaki ra ïa ia Lakisa,) ki te ariki o Iuda kia Hezekia, e kia Iuda katoa ra, i noo i Ierusalema ra, karanga atura,

10 Te na ko maira te ariki o Asura ko Senakeriba,Te irinaki na kotou ki te aa, i noo ei kotou i roto i te punanga i Ierusalema?

11 Kare ainei ko Hezekia tei akanauru ia kotou, kia mate kotou i te pongi e te kaki vai, i te na ko anga e, Na to tatou Atua na Iehova e akaora ia tatou i te rima o te ariki o Asura?

12 Kare ainei ko taua Hezekia rai tei apai ke i te au ngai teitei nona, e tana au atarau, e kua akaue ia Iuda e ia Ierusalema, i te na ko anga atu e, Okotai rai a kotou atarau kia akamori, ka tutungi ei i te atinga kakara ki rungao i te reira?

13 Kare kotou i kite i tei raveia o au e toku ai metua i te tangata ravarai no te pa enua ra? te tika ra te au atua no taua pa enua ra kia akaora i to ratouu enua i toku rima nei?

14 Koai to te au atua o taua pa enua i pou takiri i toku ai metua ra, i tikaʼi iaia kia akaora i tona tangata i toku nei rima, ka oraʼi kotou i to kotou Atua i toku nei rima?

15 E tenana, auraka kotou e vare ia Hezekia, auraka kia akanauruia i te reira, auraka e akarongo iaia: kare oki e atua i to te pa enua, e te au basileia i tika kia akaora i tona au tangata i toku nei rima, e te rima oki o toku ai metua ra: eaa e tikaʼi i to kotou Atua kia akaora ia kotou i toku nei rima?

16 E maata rava maira oki ta tona au tavini tuatua kino i te Atua ia Iehova, e i tona tavini oki ia Hezekia.

17 E kua tata oki i te au leta akakino i te Atua o Iseraela ia Iehova; e te tuatua akakino anga atu iaia, i te na ko anga atu e, Mei te au atua no te pa enua ke ra kare i akaora i to ratou au tangata i toku rima nei, kare katoa te Atua o Hezekia e akaora i tona iti-tangata i toku nei rima.

18 Kua kapiki nui atura ratou i te reo ngati Iuda, ki te au tangata o Ierusalema i runga i te patu ra, ei akamataku anga ia ratou, e ei akatumatetenga anga ia ratou; kia rauka te oire ia ratou.

19 Kua tuatua akakino atura ratou i te Atua o Ierusalema, mei te au atua o to te pa enua ke, tei angaia e te rima tangata nei.

20 E no te reira, kua pure iora te ariki ra ko Hezekia, e te peroveta ra ko Isaia te tamaiti a Amoza, e kapiki atura ki runga i te rangi.

21 Kua tono mairā Iehova i tetai angela, pou iora te aronga toa ravarai i te mate, e te aronga mamaata, e te au rangatira, i te nuku o te ariki o Asura. Kua oki atura aia ma te mata akama ki tona uaorai enua. E tae atura aia ki roto i te are o tona ra atua, na raua tei na roto mai i tona uaorai kopu aia i ta ki te koke i reira.

22 Kua akaora iora oki a Iehova ia Hezekia, e to Ierusalema katoa, i te rima o te ariki o Asura ko Senakeriba, e te rima o te pa enua katoa, e kua tiaki ia ratou e pini ua ake.

23 E aronga maata oki tei apai mai i te apinga na Iehova ki Ierusalema, e te taoonga-rima oki na te ariki o Iuda na Hezekia: e mei reira oki, akangateitei uaia atura aia e te pa enua ravarai kia akara mai.

24 Tei taua au rā rai oki to Hezekia mate anga i te maki, e maki mate, e kua pure iora aia ia Iehova: e kua tuatua maira aia kiaia, e kua tuku maira aia i te akairo ora nona ra.

25 Kare rā Hezekia i apai i tei tau i taua meitaki i orongaia mai nona ra; akateiteiia akera tona ngakau: i tupu ei te riri iaia, e ia Iuda, e Ierusalema.

26 Kua taakaaka iora rā Hezekia iaia uaorai i taua ngakau akateiteiia nona ra, koia, e to Ierusalema katoa; kare akera ratou i rokoia mai e te riri o Iehova i te au rā o Hezekia ra.

27 E apinga maata e te kakā maata ta Hezekia: kua anga aia i te vairanga ario nona, e te auro, e te toka memeitaki, e te rakau kakara, e te paruru, e te au mea katoa i mataoraʼi;

28 E te au are vairanga no te sitona, e te wina,e te inu; e te au vairanga oki no te puaka e manganui, e te vairanga no te au anana.

29 Kua akatu oki aia i te au oire nona uaorai; e manganui te au anana mamoe e te puakatoro: e apinga maata ua atu oki ta te Atua i oronga mai nana.

30 Kua popani iora oki taua Hezekia nei i te vai i runga i Gihona, e kua tataki marie maira ki raro ki te pae i te opunga o te rā i te oire o Davida. E ta Hezekia katoa ra au angaanga kua manuia anake ïa.

31 Kareka i te mea i te au karere ra i te aronga mamaata i Babulonia ra, tei tonokia mai kiaia e ui i te semeio i raveia i taua enua ra, i vaooia iora aia e te Atua ei timata anga iaia, kia kite i te au mea katoa i roto i tona ngakau.

32 E te toenga o te tuatua ia Hezekia, e te meitaki nona, i na, kua tataia ïa i roto i te orama a Isaia peroveta, te tamaiti a Amoza ra, e i roto i te tuatua a te ui ariki o Iuda, e o Iseraela.

33 Moe iorā Hezekia ki o tona ra ai metua, e kua tanu ratou iaia ki roto i te menema meitaki rava o te au tamariki a Davida: e kua akangateitei atura to Iuda ravarai e to Ierusalema iaia i tona matenga ra. Tupauia akera aia i te au e te tamaiti nana ra e Manase.