Exodo

14 KUA tuatua mairā Iehova kia Mose, na ko maira,

2 Ka tuatua ana ki te tamariki a Iseraela, e ariu ratou e patia i te puakapa ki mua mai i Pi-hahi-rota, i rotopu i Migadola e te tai, i mua ia Baala-zephona: ei reira kotou puakapaʼi i taatai.

3 E riro oki a Pharao i te tuatua i te tamariki a Iseraela nei, Kua ii ratou i roto i te enua; kua kako ratou i te medebara.

4 E akaketaketa ua atura au i to Pharao ngakau, kia aruaru mai aia ia ratou; e ka akangateiteiia au ki runga ia Pharao, e te nuku katoa nana ra; kia kite oki to Aiphiti e, ko au ko Iehova. Kua pera atura oki ratou.

5 E i akakiteia akera te ariki o Aiphiti e, kua riro roa te au tangata ra; tu ke atura to Pharao ngakau, e to tona katoa ra au tavini i taua au tangata nei, e kua tuatua akera ratou, Eaa teia ravenga a tatou nei, i tuku ei tatou ia Iseraela nei i to ratou tavini anga ia tatou nei?

6 Kua akateateamamao iora aia i tona kariota, e kua rave iora i tona au tangata:

7 Kua rave iora aia i te au kariota i ikiia ra e ono anere, e te au kariota katoa a to Aiphiti ra, e te aronga rangatira i rungao ia ratou ravarai.

8 E kua akaketaketa ua aturā Iehova i to taua ariki o Aiphiti ra ngakau to Pharao, e kua aruaru mai aia i te tamariki a Iseraela; riro mai nei ra te tamariki a Iseraela ki vao ma te maroiroi maata.

9 Kua aruaru maira to Aiphiti ia ratou, te au oroenua katoa, e te au kariota o Pharao, e te aronga akaoro oroenua nona, e te nuku nana ra; e rokoia mai, te puakapa ua ra i taatai i Pihahirota, i mua ia Baala-zephona.

10 E vaitata mairā Pharao; kua nānā akera te tamariki a Iseraela i to ratou mata ki runga, e i na, te aruia maira ratou e to Aiphiti; mataku roa akera ratou: e kua kapiki nui atura te tamariki a Iseraela kia Iehova.

11 E kua tuatua maira ratou kia Mose, No te mea aina kare o Aiphiti e tanu manga, i arataki mai ei koe ia matou kia mate matou i te medebara nei? Eaa koe i pera mai ei ia matou, i arataki mai ei ia matou mei Aiphiti mai?

12 Kare aina teia ta matou i karanga atu kia koe i Aiphiti, ka na ko atu ei e, E vaoo ua koe ia matou kia tavini ua ana matou i to Aiphiti? E ngari ake oki ia matou kia tavini atu i to Aiphiti, i te mate i te medebara nei.

13 Kua karanga aturā Mose ki taua aronga tangata ra, Auraka kotou e mataku; e noo ua, e akara i te ora a Iehova, i tana e rave no kotou i teianei rā; ko tenana Aiphiti ta kotou i akara na i teianei rā, kare rava kotou e kite akaou atu ia ratou e tuatau ua atu:

14 Na Iehova oki e tamaki i ta kotou tamaki, e noo muteki ua kotou.

15 Kua tuatua mairā Iehova kia Mose, Eaa koe i kapiki mai ei kiaku? e karanga atu ki te tamariki a Iseraela, e aere rai ratou ki mua:

16 Ka tāki ana i to rakau ki runga, e ka akatika ana i to rima ki runga i te tai, e vaʼi: ka aere ua oki te tamariki a Iseraela na rotopu i te tai na runga i te one marō.

17 E i na, ka akaketaketa ua atu au i te ngakau o to Aiphiti, kia aruaru mai ratou na muri: e ka akangateiteiia au ki runga ia Pharao, e te nuku katoa nana ra, i te au kariota nona, e te aronga akaoro oroenua nona ra.

18 E ka kite to Aiphiti e, ko au ko Iehova, kia ngateitei au ia Pharao, i tona au kariota, e te aronga akaoro oroenua nona ra.

19 E te Angela a te Atua, i na mua i te nuku o Iseraela ra, kua taoki maira, e kua aru aere ia ratou; e taua pou tumurangi i mua ia ratou ra kua taoki maira, kua tu iora i muri mai ia ratou:

20 Tei rotopu maira taua tumurangi ra i te nuku o Aiphiti, e te nuku o Iseraela; e tumurangi e te poiri ki tetai pae, e e turama ïa i te po ki tetai pae; e kare rava tetai papaki i vaitata mai ki tetai e ao ua akera taua po ra.

21 Kua akatika iorā Mose i tona rima ki rungao i te tai; taka ke atura te tai ia Iehova i te maoake viviki ra e ao ua ake taua po ra, e kua akariro atura aia i te tai ei one marō, e veveteia iora taua tai ra.

22 Aere ua atura te tamariki a Iseraela na rotopu i te tai na runga i te one marō; mei te patu ra te tai ia ratou i te pae katau e te pae kaui.

23 Kua aruaru maira to Aiphiti na muri mai ia ratou, e kua aere atura i rotopu i taua tai ra, te au oroenua katoa a Pharao, tana au kariota, e te au akaoro oroenua nona ra. 24 E tae akera ki te araanga popongi ra, ko to Iehova ïa akara anga atu i te nuku a to Aiphiti ra, na roto i te pou ai ra e te tumurangi, e kua tamanamanata atura i taua nuku o Aiphiti ra,

25 E kua kiriti atura i to ratou au tipi kariota, teimaa atura kia akaoro; kua tuatua iora to Aiphiti, Tatou e oro e akaruke i te ngati Iseraela; te akatika mai nei a Iehova ia ratou, kia pou to Aiphiti nei.

26 Kua tuatua mairā Iehova kia Mose, Ka akatika ana i to rima ki runga i te tai, kia oki mai te tai ki runga i to Aiphiti, ei rungao i to ratou au kariota, e to ratou aronga akaoro oroenua ra.

27 Kua akatika iorā Mose i tona rima ki rungao i te tai, e tei te akirata anga, kua oki akaou iora taua tai ra i tona ririnui anga, aravei maira i to Aiphiti i to ratou oro anga atura: rurungaoroia iora e Iehova to Aiphiti i rotopu i te tai ra.

28 Kua oki maira oki taua tai ra, e ngaromia iora te au kariota i raro, e te aronga akaoro oroenua, te tangata tini ravarai o Pharao ra, ko tei aru mai ia ratou na raro i te tai ra; kare rava i toe e okotai iti ake.

29 Kareka te tamariki a Iseraela, kua aere ua ratou na rotopu i taua tai ra na runga i te one marō; mei te patu ra te tai ia ratou i te pae katau e te pae kaui.

30 Kua ora iora to Iseraela ia Iehova i taua rā ra, i te rima o Aiphiti ra; e kua kite oki Iseraela i to Aiphiti i te urupae aere ua anga na taatai, kua mate takiri roa.

31 Kite akera to Iseraela i te mana maata o Iehova i te rave anga i to Aiphiti ra: mataku iora te au tangata ia Iehova, e kua akarongo ia Iehova, e tona tavini ia Mose.