Numero

16 KUA rave iorā Kora, te tamaiti a Izehara, te tamaiti a Kohata, te tamaiti a Levi ra, e ko Datana e ko Abirama, nga tamariki a Eliaba, e ko Ona te tamaiti a Peleta, nga tamariki a Reubena;

2 Kua tu iora ratou ki runga ki mua i te aroaro o Mose, ratou e tetai pae i te tamariki a Iseraela, e rua katoa anere e rima ngauru ui mataiapo anake no taua uipaanga ra, e aronga mamaata i taua uipaanga ra, e aronga tangata rongonui anake: 3 Kua kapiti maira ratou tei runga maira ia Mose raua ko Aarona, e kua tuatua maira kia raua, Te akamaata rava na korua, no te mea te tapu katoa nei te uipaanga katoa e pini ua ake, e tei roto a Iehova ia ratou ra; e tenana, eaa korua i akateitei ei ia korua uaorai, e akaaka io nei te uipaanga o Iehova nei?

4 Kite akerā Mose i te reira tuatua, tipapa iora aia ki raro i tona mata:

5 Kua karanga atura aia kia Kora e taua pouou katoa nona ra, na ko atura, Apopo rai a Iehova ka akakite mai ei i tona ra, e te tangata tapu tikai; e koia tana e akavaitata mai kiaia ra; nana uaorai oki e akavaitata kiaia i tana i iki ra. 6 Teia ta kotou e rave: E rave kotou i te āriki ai, ko Kora, e tona pouou katoa;

7 Ka tuku ei i te ai ki roto, ka tuku ei oki i te atinga kakara ki rungao apopo ki mua i te aroaro o Iehova; e te tangata ta Iehova e akataka ra, ko te tangata tapu ïa: ko kotou tei akamaata roa, e tenana au tamariki a Levi ra.

8 Kua karanga aturā Mose kia Kora, Ka akarongo mai ana kotou, e te au tamariki a Levi ra:

9 E mea ngiti aina ia kotou, kotou i akatakaia e te Atua no Iseraela no rotopu i te uipaanga Iseraela nei, kia apai aia i ia kotou i vaitata iaia uaorai ra, ei rave i te angaanga no te puakapa a Iehova ra, e kia tu kotou ki mua i te aroaro o te uipaanga katoa ei rave i te taoonga no ratou ra?

10 Kua akavaitata oki aia ia koe, e toou ai taeake ngati Levi katoa kiaia uaorai: e te umuumu katoa nei ainei kotou i te taoonga taunga nei? 11 I putuputu mai ei kotou, ko koe, e toou katoa pouou ra, e māro ia Iehova; eaa oki a Aarona i urutoe ei kotou iaia?

12 Kua tono aturā Mose i te tangata e tiki ia Datana raua ko Abirama, nga tamariki a Eliaba ra; kua tuatua maira raua, Kare maua e tae:

13 E mea ngiti aina koe i arataki mai ei ia matou, mei te enua e taʼe a vai ua te u e te meli, kia mate matou ia koe i te medebara nei, e akariro katoa ainei koe ia koe uaorai ei ariki maata ki runga ia matou nei?

14 E kare rai oki koe i kave ia matou ki te enua e taʼe a vai ua te u e te meli, e kare oki i oronga mai i te enua ei nooanga, e te kainga vine, no matou; e akamatapo mai oki koe i teianei au tangata? Kare matou e tae atu.

15 Riri rava akerā Mose, e kua karanga atura kia Iehova, Auraka koe e kite mai i ta ratou atinga kai: kare rava a ratou asini i raveia e au, kare rava tetai o ratou i takinga-kinoia e au.

16 Kua karanga aturā Mose kia Kora, Ei mua koe e toou ra pouou katoa i te aroaro o Iehova, ko koe, e ko ratou, e ko Aarona, apopo: 17 E rave oki te tangata ravarai i tana āriki ai, ka tuku ei i te atinga kakara ki rungao, e e rua anere e rima ngauru āriki ai ta kotou e apai mai ki mua i te aroaro o Iehova, ko te tangata ko tana uaorai āriki ai; ko koe oki, e ko Aarona, ta korua ravarai āriki ai.

18 Kua rave iora ratou ravarai, ko te tangata ko tana āriki ai, kua tuku iora i te ai ki roto, e kua tuku i te atinga kakara ki rungao; e kua tu iora ratou ma Mose raua ko Aarona, i te ngutupa o te Are uipaanga ra.

19 Kua akaputuputu mairā Kora i te uipaanga katoa ra i reira ia raua ra i te ngutupa o te Are uipaanga ra. E kua mama maira te kakā o Iehova ki taua uipaanga katoa ra. 20 Kua tuatua mairā Iehova kia Mose raua ko Aarona, na ko maira, 21 Ka akataka ke ana korua ki vao i teianei uipaanga, kia akapou takiri au ia ratou mei te kamoanga mata nei. 22 Kua tipapa iora raua ki raro to raua mata, e karanga atura, E te Atua e, te Atua no te au vaerua o te tangata ravarai, okotai ainei tangata e rave i te ara, e ka riri koe ki te uipaanga katoa ra? 23 E kua tuatua mairā Iehova kia Mose, na ko maira, 24 E karanga atu koe ki te uipaanga nei, e na ko atu, E aere ke kotou ki te mamao ke i te puakapa o Kora, to Datana, e to Abirama. 25 Kua tu akerā Mose, aere atura kia Datana e Abirama ra, kua aru maira te aronga pakari o Iseraela iaia. 26 Kua karanga atura aia ki taua uipaanga ra, na ko atura, Teia taku tuatua kia kotou, e aere ke kotou i te au puakapa o eianei puke tangata kino, auraka e arapaki ua atu i tetai mea ngiti a ratou ra, ka mate aea kotou i ta ratou katoa ra au ara. 27 Kua aere ke anake iora ratou, to tetai pae e tetai pae i te puakapa o Kora, to Datana, e to Abirama ra. Kua aere mairā Datana raua ko Abirama ki vao, tu ua iora i te ngutupa o to raua au puakapa, e nga vaine, e nga tamariki tamaroa, e te au tamariki mea riki ra. 28 Kua karanga aturā Mose, Teia te mea e kite ei kotou e, na Iehova au i tono mai ei rave i teia katoa nei au angaanga; e kare i to roto i toku uaorai ngakau i rave ei au: 29 Kia mate ua teianei au tangata mei te mate o te tangata katoa nei, e kia rokoia ratou e te mate maki, e mei te tangata ravarai e rokoia e te mate nei, kare ïa au i tonokia mai e Iehova: 30 E mea ou ra ta Iehova e rave i teianei, kia amama te enua nei i tona vaa, e kia apuku ia ratou, e te apinga tini ravarai na ratou ra, e topa ora uaorai ratou ki raro i te vaarua ra; ka kite ïa kotou i reira e, kua akakōkō teianei aronga tangata ia Iehova. 31 E tei te akaoti anga aia i teia katoa nei au tuatua, kua ngaa iora te one i raro ake ia ratou ra; 32 Amama iora te enua i tona vaa, apuku iora ia ratou, e to ratou au are, e te au tangata ravarai i kapiti mai kia Kora ra, e te apinga tini ravarai.