Ioane

12 E PO ono toe i te pasa ra, kua aere mairā Iesu ki Betania, i te ngai i nooia e taua tangata i mate ra ko Lazaro, ko tana i akatu mei te mate maira.

2 Kua rave iora ratou i tetai kaingakai nana; ko Mareta tei raverave: ko Lazaro ra tetai i noo katoa ma ia i taua kaingakai ra.

3 Kua rave akerā Maria i te manongi narido okotai paunu, e mea apinga maata, kua akatainu iora i te vaevae e Iesu, e orei atura i tona vaevae ki tona rauru: ki akera te are i te aunga o taua manongi ra.

4 Kua na ko akera tetai pipi nana, ko Iuda Ikariota, ko te pikikaa iaia ra,

5 Eaa teianei manongi i kore ei i okoiaʼi i te denari kia toru ake te anere, apai atu ei na te putaua ra?

6 I akapera atura aia, kare ra to te mea, e aroa aia i te putaua ra; no te mea ra, e keia aia, e nana i mou i te pute, e nana rai i apai i nga mea i tukuia ki roto ra.

7 Kua karanga aturā Iesu, Vaio ua atu ïa: kua vaoo marie oki aia i teia no te rā tanumanga iaku ra.

8 Ka noo ua rai oki te putaua ki o kotou nei; ko au ra, kare au e noo tikai ki o kotou.

9 Kua aere maira te ngati Iuda e manganui i reira ra, kua kite ana e te reira aia; kare ra no Iesu anake ra i aere mai ei, kia kite katoa ra ia Lazaro, i tana i akatu mei te mate maira.

10 E akakoro akera te kau taunga nunui, kia ta katoa ratou ia Lazaro;

11 No te mea, nona i akaruke ei te ngati Iuda katoa e manganui ia ratou, e akarongo atura ia Iesu.

12 E ao akera, manganui te tangata o taua aronga i aere mai ki te oroa ra, kite akera e te aere mairā Iesu ki Ierusalema,

13 Kua rave akera i te kikau nu tamara, aere atura kia aravei atu iaia, e kua kapiki atura, Osana! Kia ora na te Ariki no Iseraela, ko tei aere mai ma te ingoa o te Atu!

14 E kite akerā Iesu i tetai punua asini, noo iora i rungao, koia oki tei tataia ra e,

15 “Auraka e mataku, e te tamaine a Ziona; i na, te aere maira toou Ariki, te noo ra ki runga i te punua asini.”

16 Kare te au pipi i kite i taua tuatua ra i muatangana; kia akakakāia rā Iesu ra, kua manako akera ratou e, kua akaperaia taua tuatua nona nei i te tata, e kua akapera oki ratou iaia.

17 Kua akakite katoa atura oki te au tangata i vaitata iaia ra e, nana i kapiki ia Lazaro i tae mai ei ki vao mei roto mai i te tanumanga ra, e kua akatu mai iaia mei te mate maira.

18 No te rongo o taua akairo tana i rave ra, i aravei ua mai ei te tangata iaia ra.

19 Kua tuatua iora te au Pharisea ratou ratou uaorai, Kare rai kotou i kite e, kare ua a kotou i rauka e vaʼi mea ngiti ake? i na, kua ope takiri to te ao katoa i te aru iaia.

20 E taua aronga i aere mai e akamori i te Atua i taua oroa ra, e Eleni ia tetai pae:

21 Kua aere mai ratou kia Philipa, no Betesaida i Galilea ra, kua tuatua maira kiaia, E tama, te anoano nei matou kia kite matou ia Iesu.

22 Kua aere aturā Philipa, akakite atura kia Anederea: kua tuatua maira oki a Anederea raua ma Philipa kia Iesu.

23 Kua karanga aturā Iesu kia ratou, na ko atura, Kua tae ki te ora e akakakāiaʼi te Tamaiti a te tangata nei.

24 Tika, tika tikai taku e karanga atu kia kotou, Kia tukuia tetai ua sitona ki raro i te one, kia kore e mate ra, kua vai tai ua ïa; kia mate ra, kua maata atura ïa te uua anga.

25 Ko tei anoano ua ki tona ora, ka ngere ïa i te ora: ko te kore e anoano i tona ora i teianei ao, ei ora mutu kore tona ra. 26 Ko tei anoano ei tavini aia noku ra, ka aru mai ïa iaku; e te ngai taku e noo ra, ei reira katoa taku tavini; e kia tavini tetai tangata iaku ra, na toku Metua e o mai i tana tutaki.

27 Kua taitaia rava toku vaerua i teianei; e ka akapeea ra au? E taku Metua, ka akaora mai koe iaku i teianei ora; i aere mai ei ra au no teianei rai ora.

28 E taku Metua, e akakakā i toou ingoa. Kua kitea maira tetai reo no runga i te rangi, i te na ko anga mai, Kua akakakā au, e ka akakakā akaou atu rai au.

29 Kua kite oki te aronga tangata i reira i te aruru, manako akera, E mangungu: kua na ko akera tetai aronga, E angela tei tuatua maira kiaia.

30 Kua karanga aturā Iesu, na ko atura, Kare noku i tae mai ei taua reo nei, no kotou ra.

31 E teianei e akapaiaʼi teianei ao; ei teianei ka eke ei te ariki o teianei ao:

32 Kareka kia apaiia au ki runga ra, ka tōia mai e au te tangata katoa kiaku nei.

33 I akapera atura aia i te akakite anga i te tu o tona matenga kia mate ra.

34 Kua tuatua maira te au tangata ra, I kite akenei matou i te ture ra, ka tika te Mesia i te ora ua anga; eaa oki koe i karanga mai ei e, Ka apaiia te Tamaiti a te tangata ki runga? Koai oki taua Tamaiti a te tangata ra?

35 Kua karanga aturā Iesu kia ratou, Koi roao te mārama ki o kotou nei: ka aere koi vai ake to kotou mārama, ko te rokoia aea kotou e te poiri; ko tei aere ua i te poiri ra, kare ïa e kite i tona aerenga.

36 Ka akarongo kotou i te mārama, koi vai ake to kotou mārama, kia riro kotou ei tamariki no te mārama. E oti akera taua tuatua ra, aere poiri aturā Iesu, akaruke maira ia ratou.

37 Rave ua atu rai aia i te akairo e manganui ua atu i mua i to ratou aroaro, kare akerai ratou i akarongo iaia:

38 Tupu atura te tuatua a Isaia peroveta ra, tana i karanga ra e, E te Atu, “koai tei akarongo i ta matou tuatua? e koai tei akakiteia i te rima o te Atu?

39 I kore ei i tika ia ratou kia akarongo, no te mea kua tuatua akaou anā Isaia,

40 “Kua akapo aia i to ratou mata, kua tapakariia to ratou ngakau, ko te akara aea to ratou mata, ko te kite aea to ratou ngakau, ko te ariu mai aea, e ko te akaora atu au ia ratou.”

41 I pera mai a Isaia, i te kite anga aia i tona kakā, ka tuatua mai ei aia iaia ra.

42 Kua akarongo oki tetai papaki o te au tutara ra iaia e manganui; no te mataku ra i te au Pharisea ra i kore ei i mou akakite ua, ko te tukuia aea ki vao i te sunago:

43 E mea meitaki na ratou te akameitaki a te tangata i te akameitaki a te Atua ra.

44 Kua akateitei aturā Iesu i tona reo, na ko atura, Ko te akarongo mai iaku ra, kare ïa ko au tana e akarongo maira, iaia ra i tei tono mai iaku nei.

45 Ko tei akara mai iaku ra, kua akara aia i tei tono mai iaku nei ra.

46 I aere mai ei au i te ao nei ei mārama, kia kore tei akarongo mai iaku ra kia noo ua i te poiri.

47 Kia kite ra te tangata i taku ra tuatua, e kare i akarongo ra, kare ïa ko au te akaapa iaia: kare au i aere mai e akaapa mai i to te ao, e akaora ra i to te ao.

48 Ko tei akavaavaa mai iaku ra, e kare i āriki mai i taku tuatua, te vai ra ïa te akaapa iaia: na te tuatua taku i apii ra, e akaapa iaia kia tae ki te rā openga ra.

49 Kare oki i taku uaorai te tuatua taku i karanga atu na; na te Metua ra i tono mai iaku nei, i akaue mai iaku i te tuatua, kia tuatua au e kia apii au.

50 Kua kite oki au e, ko te ora mutu kore ïa tana i akaue ra; e teianei ko taku e tuatua nei, ko ta te Metua ïa i akaue mai iaku, ko taku e tuatua nei.