Isaia

5 I TEIANEI e peʼe au ki taku akaperepere i tetai peʼe akatatānga na taku akaperepere no tona kainga vine ra. E kainga vine to taku akaperepere ki runga i tetai maunga ruperupe ra.

2 Kua ko aere iora aia, e kua akaope iora i te au toka ki vao e kua tanu iora i te vine meitaki: e kua akatu aia i te are tiaki i rotopu, e kua pao iora i te taomianga wina i roto: i manako iora aia e ka ua mai i te vine tikai, e vine kava ra tei uaia mai.

3 E teianei, e to Ierusalema, e te au tangata no Iuda, e akataka ana kotou i te tuatua iaku e taua kainga vine noku nei, ko taku ïa tuatua ia kotou.

4 Eaa ua atu te ravenga toe i taua kainga vine noku ra, mari ra i taku i rave ra? eaa iora, iaku i manakonako i te vine tikai i te ua anga mai, i ua mai ei i te vine kava ra?

5 E teianei, e akakite atu au ia kotou i taku ka rave ki taua kainga vine noku nei: e apai ke au i te koro, kia pou rava i te kaingaia; e vavaʼi au i te patu, kia takatakaiia ki raro ra;

6 E akatanea roa au i te reira; kare e topetopeia, kare oki e kenuia; e tupuia ra te rakau taratara e te tataramoa i roto ra; e akaue oki au i te au tumurangi, auraka ratou e ua mai i te ua i rungao.

7 Ko taua kainga vine o Iehova Sabaota ra, ko te ngutuare ïa o Iseraela, e te au tangata no Iuda ra, ko tana ïa pāu rakau mataora: kua tapapa oki aia i te tuatua-tau, e i na, e ta tangata; i te tuatua-tika, e i na, ko te aue ra!

8 E ae oki ia kotou, to tei kapiti atu i te are ki te are, to tei kapiti atu i tetai kainga ki tetai kainga, e kare atu e ngai toe, toe uaorai kotou anake ua ra i rotopu i te enua ra.

9 Kua akakite mai a Iehova Sabaota ra ki toku nei taringa: E riro tikai te au are e manganui i te tanea, manganui tei nunui e tei manea, kare ïa e tangataia.

10 Kia ngauru ua atura te ekera i te kainga vine, okotai ua bato wina te ka rauka mai, e okotai omera te ua, e epha okotai te ka rauka mai.

11 E ae oki te aronga e tu vave i te popongi ra, kia aruaru atu ki te kava kona; ko tei noo roa i te aiai kia vera ratou i te wina.

12 E ko te kinura e te nabala, te paʼu, e te koê, e te wina, tei to ratou ïa au pokai; kareka te ravenga a Iehova, kare ratou i akono, e te angaanga a tona rima, kare ïa ratou i akara.

13 I riro tuikaaʼi toku ra iti-tangata i te kite kore; e kua mate to ratou aronga taoiau i te paeua, e te tangata tini i o ratou, kua mate ïa i te kaki vai.

14 I maataʼi to ade kaki, e i amama uaʼi tona vaa kare e aite; e kua eke anake atura to ratou aronga mana, e to ratou au tangata tini, e te urupu karavau, e koia ko tei rekareka i roto iaia ra.

15 E te tangata rikiriki, kua tukuia ki raro; e te tangata maata, kua taakaakaia; e te mata teitei oki, kua tukuia ki raro:

16 E ko Iehova Sabaota ra te akateiteiia i te tuatua-tau, e akatapuia te Atua, ko Tei Tapu ra, i te tuatua-tika.

17 Ei reira te au punua mamoe e kai aere uaʼi, e na te au anana ke e kai i te au ngai tanea o te aronga apinga nui ra.

18 E ae oki ia ratou, to tei totō i te kino i te taura o te kanga ra, e te ara i te taura kariota ra:

19 Ko tei karanga e, Kia rapurapu aia, kia akavave aia i tana angaanga kia kite tatou: e kia tupu vave te tuatua a Tei Tapu i Iseraela nei, kia tae mai ïa, kia kite tatou.

20 E ae oki ia ratou, to tei tuatua i te kino ra e meitaki, e te meitaki ra e kino; tei tuatua i te poiri ra e mārama, e te mārama e poiri; tei tuatua i te maamaa ra e vene, e te vene ra e maamaa.

21 E ae oki ia ratou, to tei karape i to ratou uaorai mata, e tei pakari i to ratou uaorai manako anga!

22 E ae oki ia ratou, to tei ririnui i te inu wina ra, e tei maroiroi kia iro i te kava kona ra:

23 Ko tei akatika te aronga ara no te oko, e tei akakore i te tuatua-tika a te aronga tuatua-tika ra!

24 E teianei, mei te ngangaere e pou i te ai ra, e mei te mauku e pou i te ai mura ra; ka riro katoa oki to ratou tumu mei te mea pe ra, e to ratou pua, e peke ïa ki runga mei te one-pueu ra: no te mea kua akaviivii ratou i te ture a Iehova Sabaota ra, e kua akaruke i te tuatua a Tei Tapu i Iseraela nei.

25 No reira i ka ai te riri o Iehova ki tona ra iti-tangata, e kua akatika aia i tona rima ia ratou, kua ta iora aia ia ratou: e kua ngaueue iora te maunga, riro atura to ratou au kopapa mei te teita i rotopu i te au arataa ra. Kare akerai tona riri i anga ke, te akatika ua mairai oki tona rima.

26 E akatu oki aia i tetai reva no te pa enua mamao ra, e mitimiti aia ia ratou i to te openga mai o te enua ra; e i na, e aere mai ratou ma te viviki maata:

27 Kare rava tetai o ratou i roiroi, kare oki i arara aere; kare ua tetai i tirotiromoe, kare oki i moe; kare to ratou tatua taukupu i matara, e kare oki te itiki o to ratou au tamaka i matara.

28 Kua makukui roa ïa ta ratou au kakao, e kua akamingiia ta ratou ana; te matikao o ta ratou au oroenua ra, e manakoia ïa e toka tama ra, e to ratou au porotata ra, mei te puaioio ïa.

29 To ratou ngunguru anga, e tau ïa ki to te liona tinana ra; e mei te au liona ou kia ngunguru ratou: e ngunguru, ka aō ei ratou i te kai; e na ratou e apai ke, e kare ua e rauka akaou mai.

30 Kia tae ki taua rā ra e aruru mai ei ratou, mei te aruru o te tai ra: e kia akara oki tetai ki raro i te one, i na, e poiri tumatetenga, kua ave oki te mārama i te rangi poiri ra.