Maseli

6 KIA riro koe, e taku tamaiti, ei tutaki no to oa ra; e kua tuku koe i to rima ia etai ke;

2 Kua ii koe i te tuatua a to vaa; kua mou koe i ta to vaa i tuatua ra:

3 E akapera, e taku tamaiti, kia ora koe, tei te rima oki koe o to oa ra; e aere, ka taakaaka ia koe uaorai, e tuatua raurau atu koe ki to oa na.

4 Auraka to mata e moe, auraka oki to topiri-mata e varea e te moe;

5 Ka oro, mei te zabi e oro ke i te ereere ra, e mei te manu i te ereere a te kimi manu ra.

6 Ka aere ana ka akara i te ro, e tenana tangata moe ua; ka akamaara i tana ravenga, kia pakari koe:

7 Kare oki ona arataki, kare e tutara, kare e akamatutu;

8 Te roi ra i tana kai i te tuatau tikai ra, e kia mou ra e akaputuputu ei aia i tana kai.

9 Mei te aa te roa o toou na moe, e tenana tangata moe ua? aea koe e ara ai i taau moe?

10 Ei manga moe iti rai, ei akāvai anga iti rai, e tapeka iti ua atu rai te rima ei manga moe rai!

11 E rokoia mai koe e te putaua mei te tuitarere ra, e toou ra ngere anga mei te tangata taoonga tamaki ra.

12 Ko te tangata puapinga kore ra, te tangata kanga ra, te aere ra ïa ma te vaa ketaketa ua.

13 E kamokamo ua oki tona mata, e akairo mai tona vaevae, e apii mai tona rima;

14 Te akakoro ra tona ngakau i te tuatua kino; kare aia e akapaki i te kimi i te kino; te akatupu ra aia i te karo.

15 E rokoia uaia mai aia e te mate, kare e roaia; mei te kamoanga mata ra, mate rava akera aia, e kare roa e ora.

16 Eia nga mea e ono ra ta Iehova e riri nei, e te itu oki, e mea viivii katoa ïa na tona vaerua:

17 Ko te mata teitei, te arero pikikaa, e te rima i maringa ei te toto ara kore ra;

18 Ko te ngakau i akakoro i te tuatua kino ra, te vaevae e oro viviki e rave i te kino,

19 Te kite pikikaa, e tuatua i te tuatua pikikaa ra, e ko tei akatupu i te karo i rotopu i te au taeake ra.

20 E tāpu meitaki, e taku tamaiti, i te akaue a to metua tane, e auraka e akaruke i te ture a to metua vaine:

21 E mou piri tika ua rai i te reira ki roto i to ngakau; e akaei marie i te reira ki runga i to kaki.

22 Kia aere koe ra, na taua mea ra koe e arataki; kia moe koe ra, nana koe e tiaki; e kia ara koe ra, nana e tuatua mai kia koe.

23 E lamepa oki te akauenga, e turama oki te ture; e te ako i te apii anga, ko te ara ora ïa:

24 Ei tāpu ia koe i te vaine kino; i te arero taparu o te vaine ke ra.

25 Auraka to ngakau kia inangaro ki tona ra purotu; e auraka koe kia riro ki tona ra akara anga mai.

26 No te vaine akaturi oki i ope ei te kai; kareka te vaine moeana ra, te aruaru maira ïa ki te apinga maata ra ki te vaerua.

27 E tika ainei i te tangata kia tuku i te ai ki roto i tona umauma, e kare ainei e ka tona kakau?

28 E tika ainei i te tangata kia aere na runga i te ngarau ka ra, e kare ainei tona vaevae e pakapaka?

29 Koia katoa tei akavaitata atu ki te vaine na tetai ke; ko tei rave ua atu iaia kare e tuatuaia i te ara kore.

30 Kare e akarukeia te keia, kia keia ei akapangia i tona kaki kia mate i te pongi ra;

31 Kia kitea ra, e tataki itu ïa tana kia akaoki mai; e ope rava tei tona ra are i te apai mai:

32 Ko tei akaturi i te vaine ra, e neneva maata ïa; ko tei akapera ra, kua ta ïa i tona uaorai vaerua.

33 Ko te puta, e te akama, te ka rauka iaia; kare oki te akakino iaia e orei keia.

34 Viviki maata oki to te tangata riri i te vareae; kare aia e akaperepere i te rā e tutaki ei ra.

35 Kare aia e rave i te apinga akaora; kare oki e maru, kia apaiia atu te apinga e kia maata ua atu.