Luka

11 E TE pure ra aia i tetai ngai, e oti akera, kua tuatua maira kiaia tetai pipi nana, E te Atu, e apii mai ia matou nei i te pure, mei ia Ioane i apii katoa atu i tana au pipi.

2 Kua karanga atura aia kia ratou, E na ko kotou kia pure: E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.

3 O mai i te kai e tau ia matou i tera rā i tera rā.

4 E akakore mai i ta matou ara; te akakore nei oki matou i ta tei ara katoa ia matou nei. Auraka e akaruke ia matou kia timataia mai, e akaora ra ia matou i te kino.

5 Kua karanga atura oki aia kia ratou, E oa to tetai i o kotou na, ka aere atu ei aia kiaia i te turuaipo, ka karanga atu ei kiaia ra e, E taku oa, o mai ana e toru manga;

6 Kua tapae mai nei tetai oa oku nei i tona aerenga, e kare aku kia tuku atu i mua i tona aroaro.

7 E kia tuatua mai aia i roto ra, kia na ko mai, Auraka e akapekapeka mai iaku: kua tamouia te pa, tei runga au i te roi e taku au tamariki katoa; kare e tika iaku kia tu ki runga e o atu naau.

8 E akakite atu au kia kotou, Kore ua aia i tu ki runga e oronga atu i te mea e oa aia nona; e tu ra aia i te pati akatenga, ka oronga atu ei i tana i anoano ra.

9 E karanga atu oki au kia kotou, E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai te pa ia kotou.

10 Ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topāpā ra, e kiritiia mai ïa te pa iaia.

11 Koai ïa metua i o kotou nei, e apai atu i te toka na tana tamaiti, kia pati mai aia i te manga? e kia pati mai i te ika, e apai atu aina i te ovi nana ei ika?

12 E kia pati aia i te ua moa, e apai atu aina i te sekopio?

13 E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te Vaerua Tapu i te aronga e pati atu aia ra.

14 E te tuaru ra aia i tetai demoni murare ki vao. E kia aere atura taua demoni ra ki vao, kua tuatua maira taua murare ra: va ua iora te tangata.

15 Kua na ko akera tetai papaki ra, Te tuaru nei aia i te demoni i te mana o te demoni maata ra o Belezebuba.

16 Kua pati maira oki tetai papaki i tetai akairo iaia i runga i te rangi, i te timata anga mai iaia ra.

17 Kua kite ra aia i to ratou manako, kua na ko atura kia ratou, Ko te basileia i mavete e rave iaia uaorai, e pou ïa; e te kopu-tangata i mavete e rave iaia uaorai, ka kore ïa.

18 E kia mavete a Satani e rave iaia uaorai, eaa oki tona basileia e mou ei? ta kotou e tuatua na e, te tuaru nei au i te demoni i te mana o Belezebuba.

19 Te tuaru nei au i te demoni i te mana o Belezebuba, i te mana noai ra i tuaru ei ta kotou tamariki? e teianei, ei ia ratou te tuatua ia kotou.

20 Te tuaru nei ra au i te demoni i te rima o te Atua, kua rokoia tika ïa io nei ra kotou e te basileia o te Atua.

21 Kia tiaki te tangata maroiroi ma te taoonga katoa i tona ngutuare te vai meitaki ra ïa tona apinga;

22 Kia raveia maira aia e tetai tangata ririnui maata ua atu, e mate iora, aōia atura e ia tana taoonga i maroiroi ei aia, e ope takiri tona apinga i te tuaia.

23 Ko te kore i ko nei iaku nei, ko toku ïa enemi: e te kore i akaputuputu katoa mai, kua akapueurikiriki ke ïa.

24 Kia riro te vaerua viivii i roto i te tangata nei ki vao, kimi aere atura aia i te ngai papa-marō, i te kimi anga i te akaangaroianga; e kare akera i kitea, kua na ko iora, Ka oki au ki taku are, mei reira mai au nei;

25 E kia tae mai aia ra, kite iora e, kua oti i te oreiia, e kua akamaneaia.

26 Kua tiki atura aia, e kapiti katoa maira i e toko itu vaerua kino maata rava, e o atura ratou ki roto, noo atura i reira; kino maata ua atu te openga o taua tangata ra i tei muatangana.

27 Te tuatua ua ra aia i taua au tuatua ra, kua kapiki ua maira tetai vaine i rotopu i taua aronga ra, kua na ko maira kiaia, E ao to te kopu i apai ia koe, e te u taau i ngote ra.

28 Kua karanga atura ra aia, Ko tei akarongo i te tuatua a te Atua e kua akono atura, ko ratou tei meitaki roa.

29 E kononinoni rava maira te tangata i vaitata iora, kua karanga atura aia, E uki tangata kikino teia: te kimi nei ratou i te akairo, e kare e orongaia atu te akairo, mari ra te akairo i te peroveta ra ia Iona.

30 Mei ia Iona oki e akairo na to Nineve, koia katoa te Tamaiti a te tangata na teianei uki.

31 E tu katoa mai te ariki vaine no apatonga ki runga i te akavaanga ra, e akaapa i teianei uki tangata: i te mea, i aere mai aia mei te openga mai o teianei ao, e akarongo i te tuatua pakari na Solomona; e i na, e maata teia ia Solomona.

32 E tu katoa mai te tangata o Nineve ki runga i te akavaanga ra, e akaapa mai i teianei uki: kua tataraara oki ratou i te ako angaia atu e Iona; e i na, e maata teia ia Iona.

33 Kare oki e tangata e tutungi i te lamepa ka tuku atu ei ki te ngai ngaro, e ki raro ake i te aite ra, ei runga ra i te vairanga, kia kite te aronga e tomo mai i te mārama.

34 Ko te mata to te kopapa nei mārama: te meitaki ra to mata, kua mārama toou kopapa katoa; kareka kia kino toou mata, ka poiri ïa toou kopapa katoa.

35 E tenana e matakite, kia kore e riro te mārama i roto ia koe na ei poiri.

36 Kua pini katoatoa oki to kopapa i te mārama, kare e ngai toe, e riro toou na pininga i te mārama, mei te mārama lamepa mura ra i te kakā anga.

37 Te karanga atura aia, kua tuatua maira tetai Pharisea kiaia, e aere e kaikai i ona ra: aere atura aia, noo atura ki te kaingakai ra.

38 Va ua iora taua Pharisea ra i te akara anga mai iaia, koia kare i timata na i te orei ka kai ei i te manga.

39 Kua karanga atura te Atu kiaia, Kareka kotou, e te au Pharisea na, te tamā na kotou i te kapu ma te mereki ki vao ake; kareka o roto ia kotou uaorai, te ki nei ïa i te noinoi apinga e te kino.

40 E te aronga neneva e, kare ainei na tei anga i vao akera, i anga katoa i roto?

41 Ka oronga ra i ta kotou apinga i rauka, e i na, e mā anake te au mea katoa ra ia kotou i reira.

42 Aue kotou, e te au Pharisea e! te oronga na kotou i te ngauru o te minete, e te pegano, e te au rakau rikiriki ravarai, e te kopae ua nei oki i te tuatua-tau, e te anoano i te Atua: ko ta kotou ïa e akono e tikaʼi, e auraka katoa e akaruke i tera.

43 Aue kotou, e te au Pharisea e! te inangaro na oki kotou i te nooanga meitaki i te au sunago ra, e kia aroaia oki i te ngai okoanga ra.

44 Aue kotou, e te au tata tuatua e, e te au Pharisea pikikaa! mei te vaarua turuma kitea kore ra kotou na, ko tei aere vare uaia e te tangata na rungao e kare i kite.

45 Kua tuatua maira tetai apii ture kiaia, na ko maira, E te Orometua, i pera mai koe ra, kua akakino katoa mai koe ia matou.

46 Kua karanga atura aia, Aue katoa oki kotou, e te au apii ture e! te tuku na oki kotou i te apainga maranga kore i runga i te tangata, e kare rava oki tetai rima o kotou na e mirimiri ua atu i taua apainga ra.

47 Aue oki kotou e! te patu nei kotou i te tanumanga o te au peroveta, ta to kotou ai metua i ta ra.

48 Kua akakite mou kotou e, kua tika ia kotou ta to kotou ai metua i rave ra: na ratou oki i ta ia ratou, e te patu nei kotou i to ratou tanumanga.

49 I tuatuaʼi oki te pakari o te Atua e, E tono au i te peroveta e te aposetolo kia ratou ra, ka ta ratou i etai pae, e ka takinga-kino oki;

50 Kia umuumuia mai te toto o te peroveta ravarai, i akamaringiia mei muatangana mai o teianei ao, i teianei uki;

51 Mei te toto mai o Abela e tae roa ake ki te toto o Zakaria, tei taia i roto i te va o te atarau e te nao ra: tikai taku e karanga atu kia kotou nei, Ka umuumuia mai i teianei uki.

52 Aue oki kotou, e te au apii ture e! kua apai ke oki kotou i te taviri o te kite, kare kotou uaorai i tomo ki roto, e te aronga e anoano i te tomo ra, kua tāpu kotou.

53 Te tuatua ua ra aia kia ratou i taua au tuatua nei, kua unuunu tikai te au tata tuatua e te au Pharisea, e kua akakoko iaia i te au tuatua katoa e manganui;

54 E te tapapa ra oki iaia kia apao, e rauka mai ei tetai manga tuatua no roto iaia, ei tapepe anga mai na ratou iaia.