Angaanga

19 TE noo rā Apolo i Korinetia, tae mairā Paulo ki Ephesia, kua pini akera iaia te pa enua i runga: e kite akera aia i e tokotai puke pipi,

2 Kua karanga atura aia kia ratou, Kua rauka aina ia kotou te Vaerua Tapu, mei to kotou akarongo anga mai? Kua tuatua maira ratou kiaia, Kare matou i kite e, i orongaia mai te Vaerua Tapu.

3 Kua ui atura aia kia ratou, I bapetizoia oki kotou i te aa? Kua tuatua maira ratou, I te bapetizo anga a Ioane ra.

4 Kua karanga aturā Paulo, I bapetizo rai oki a Ioane ki te bapetizoanga tataraara, ma te karanga atu ki te tangata e, e akarongo ratou iaia ko te aere mai na muri mai iaia ra, koia oki a Iesu Mesia ra.

5 E kia akarongo ratou i te reira, bapetizoia iora ratou i roto i te ingoa o te Atu ra o Iesu.

6 Kua tuku aturā Paulo i tona rima ki rungao ia ratou ra, e kua aere maira te Vaerua Tapu ki rungao ia ratou; e kua tuatua iora ratou i te tuatua ke, e kua totou iora i te tuatua.

7 Tino ngauru ma rua paa taua aronga tangata.

8 Aere atura aia ki roto i te sunago ra, tuatua atura ma te mataku kore, e toru marama, i te taumāro anga atu, e te akakite ua anga atu i te tuatua o te basileia o te Atua ra.

9 E paetaeta maira tetai pae kare i akarongo ra, e te akakino mai oki i te tuatua ki mua i te aroaro o te tangata tini ra, vaio iora aia ia ratou, aere ke atura, akataka ke maira i te au pipi, kua tuatua iora ki roto i te are apii anga no Turano ra, kare e rā i tukua.

10 I pera aia e rua akera mataiti; kite akera to Asia ravarai, te ngati Iuda, e te Eleni, i te tuatua a te Atu a Iesu.

11 E akairo maata oki tei oti i te rima o Paulo i te Atua.

12 E i apaiia te kakau orei ou e te pareu no runga i tona kopapi ki te aronga maki, e peke atura to ratou maki, e te au vaerua kikino katoa, kua aere maira ïa ki vao.

13 Kua timata atura tetai pae ngati Iuda tuaru vaerua kino koka aere ua, i te akaiki i te ingoa o te Atu ra o Iesu i te aronga vaerua kino ra, i te na ko anga atu e, Te akaue atu nei matou ia kotou ma te ingoa o Iesu i ta Paulo e tuatua aere nei.

14 Ko nga tamariki toko itu a tetai taunga maata ngati Iuda, ko Sekeva, tei akapera.

15 Kua tuatua maira te vaerua kino, na ko maira, Kua kite au ia Iesu, kua kite oki au ia Paulo; koai ra kotou na?

16 Kua rere maira taua tangata tei roto iaia te vaerua kino ki rungao ia ratou ra, e rauka iora ratou, mate iora ratou, oro taaka ua atura ratou ki vao i taua are ra ma te paruparu.

17 E kitea iora taua mea ra e te ngati Iuda, e te Eleni katoa, i noo i Ephesia ra; rokoia iora ratou ravarai e te mataku, akameitakiia iora te ingoa o te Atu ra o Iesu.

18 E manganui oki to taua aronga i akarongo ra, i aere mai e aaki i ta ratou peu, e akakite ua maira.

19 E manganui oki te aronga peu tu ke i apai mai i ta ratou au buka, kua tutungi iora i te ai ki mua i te aroaro o te tangata ravarai: kua tatau iora i te moni i te oko i taua au buka ra, e kitea iora, e rima ngauru anga te tausani i te moni ario.

20 I te maata oki i te tupu anga e te autu anga te tuatua a te Atu ra.

21 E oti akera te reira, maara akera to Paulo ngakau e aere ki Ierusalema, e na Makedonia, e na Akaia, na ko akera, Kia tae atu au ki reira, kia kite katoa atu au ia Roma e tikaʼi.

22 Kua tono atura aia i e toko rua i te aronga i tauturu mai iaia ki Makedonia, ko Timoteo, e ko Eraseto; kareka aia uaorai, noo iora ïa i Asia e roa iti akera.

23 Kua tupu akera i reira te keu i teianei tuatua e kare i te mea ngiti.

24 Ko tetai tangata oki ko Demeterio te ingoa, e taunga ario, ko tei anga i te au marae ario no Diana, e apinga maata ta te aronga taoonga i rauka iaia;

25 Kua akaputu iora aia ia ratou e te aronga i rave katoa i taua angaanga ra, kua karanga atura, E tāma, kua kite kotou e, no teianei angaanga i raukaʼi to tatou nei apinga.

26 Te akara nei oki kotou, kua kite oki kotou e, e manganui te tangata ta teianei tangata ta Paulo i ako, kare i Ephesia anake nei, kua tu pini oki Asia katoa, e kua akamingi oki ia ratou, i te tuatua anga atu e, kare te Atua tei angaia e te rima tangata nei:

27 E e riro ta tatou angaanga nei i te akakinoia, e kare oki ko te reira anake ra; e riro katoa oki te iero o te atua maata nei o Diana i te akavaavaaia, e e kore tona inuinu, ko tei akamoriia e to Asia ravarai, e to te ao katoatoa nei oki.

28 E kia akarongo akera ratou i te reira tuatua, ki akera ratou i te riri, kua kapiki atura ratou, na ko atura, E maata to Diana i Ephesia.

29 Kua keu atura taua oire ravarai: e opukia iorā Gaio e Arisetareko, e puke tangata Makedonia, ko tei kapiti katoa kia Paulo i tona tere, oro katoatoa atura ki roto i te are tuatua anga, ma te ngakau okotai.

30 E kia inangaro akerā Paulo i te aere ki roto ki taua aronga tangata ra, kare ïa i tukuia e te au pipi.

31 Kua unga maira e tokotai puke tangata taoiau no Asia i tau mai iaia i te karere, i te ako anga mai iaia e, auraka aia e tomo ua atu ki roto i taua are tuatua anga ra.

32 Te kapiki ua ra ratou, e tuatua ke ta tetai pae, e mea ke ta tetai pae: te keu ua ra taua aronga maata ra; e kare oki te maata o te tangata i kite i te mea i putuputu mai ei ratou ra.

33 Kua arataki maira ratou ia Alekanedero no roto i taua aronga maata ra, na te ngati Iuda aia i opara mai. Kua kamokamo aturā Alekanedero i tona rima, i anoano aia i te akatika iaia uaorai ki taua aronga tangata ra.

34 Kite akera ratou e, e ngati Iuda aia, kua kapiki maira ratou ravarai okotai rai kapiki anga, e rua akera ora, E maata to Diana i Ephesia.

35 E papa iora taua aronga tangata ra i te tata tuatua, kua karanga atura aia, E te au tangata no Ephesia nei, koai ïa tangata kare i kite e te akamori nei teianei oire ko Ephesia nei i te atua maata ia Diana, e te tiki i topa mai ki raro nei no runga mai ia Dia ra?

36 E teianei, kare e māroia mai taua tuatua nei, e noo ua kotou e tikaʼi, e auraka ei rave rapurapu ua.

37 I kika mai nei oki kotou i teianei aronga tangata, e kare oki ratou i te keia iero, e te akakino oki i to kotou atua.

38 E teianei, e ara tikai ta Demeterio e te aronga taoonga ki ona i tetai tangata atu, te vai nei ïa te akava anga, te vai nei oki te tutara; e tapepe ratou ia ratou uaorai.

39 E māro anga ta kotou i tetai au tuatua ke, i te tuatua anga tikai e tau i te ture e akatikaiaʼi te reira.

40 E riro oki tatou i te akavaia mai i teianei keu maata i teianei rā, kare oki e mea e tikaʼi kia akatika tatou i teianei repua maata ua i te tangata.

41 E oti akera taua tuatua nana ra, kua tuku atura aia i taua aronga ra.