Roma

7 KARE kotou i kite, e aku au taeake, (te karanga atu nei oki au i te aronga i kite i te ture nei,) e te vai mana ra te ture ra ki runga i te tangata i tona ora anga nei?

2 Te vaine noo tane ra, te ora ra te tane ka piri atu aia ki tana tane, ko ta te ture ïa; kia mate ra te tane ra, kua matara aia i te ture i tana tane.

3 Kia riro ke aia i tetai tangata ke te ora ra te tane, e karangaia aia i te akaturi: kia mate ra te tane ra, kua matara aia i taua ture ra; kare aia i te akaturi kia akaipoipo i tetai tangata ke.

4 Koia katoa kotou, e aku au taeake, kua mate katoa kotou i te kopapa o te Mesia i te akonoanga i te ture ra, kia riro kotou no tetai ke, no tei akatuia mei te mate maira, kia akaua tatou i te ua i te Atua.

5 Tei runga tatou i ta te kopapa ra, te maroiroi ra te anoano kikino i raro ake i te ture ra ki roto i to tatou kopapa, i te akaua anga i te ua e mate ei ra.

6 I teianei ra, kua tataraia tatou i te ture, kua mate oki te mea i mou ei tatou ra; kia akamori tatou ma te ngakau ou, eiaa ma te tuatua taito ra.

7 Ka akapeea oki tatou i teianei? te kino ra aina te ture? Kare rava ïa. Auraka te ture ra, kare oki au e kite i te kino; kare oki au e kite e, e ara te morimori, auraka te ture i tuatua mai e, “Auraka rava koe e morimori.”

8 Rauka iora ra ta te kino ravenga i te ture, e kua akatupu aia i te noinoi e manganui ki roto iaku. I te kore anga oki o te ture ra, e mea mate te kino i reira.

9 I ora na oki au i muatangana i te ture kore ra: kia tae maira te ture ra, ora akera te kino, mate iora au.

10 E te akauenga ra oki i akonoia ei ora ra, riro ua atura ïa ei mate noku.

11 Rauka iora oki ta te kino ravenga i te akauenga, e pikikaa maira kiaku, mate iora au iaia i te akauenga.

12 E teianei e mea tapu te ture, e mea tapu oki te akauenga, e te apa kore, e te meitaki.

13 I riro mai aina taua mea meitaki ra ei mate noku? Kare rava ïa: ko te kino ra, kia kitea i taua mea meitaki ra e, e kino, ko tei riro ïa ei mate noku, kia riro te kino ra ei mea kino maata ua atu i te akauenga.

14 Kua kite oki tatou e, no te vaerua te ture: no te kopapa ra au, kua okoia i raro ake i te kino.

15 Ko taku oki e rave nei, kare oki au e akatika: e ko taku e anoano ra, kare au e rave; ko taku ra mea makitakita ra, ko taku ïa e rave nei.

16 E kia rave au i te au mea anoano koreia e au ra, te akatika nei au i te ture ra e, e mea meitaki ïa.

17 E teianei, kare ïa au tei rave ra, ko te kino ra e vai i roto iaku nei.

18 Kua kite oki au e kare ua e mea meitaki e vai i roto iaku, (i roto i toku kopapa nei:) ko te anoano ra, te vaitata ua nei ïa kiaku; kareka te rave i te mea meitaki ra, kare ïa i kitea iaku.

19 Ko te meitaki oki taku e anoano ra, kare ïa au e rave; kareka te kino anoano koreia e au ra, ko taku ïa e rave nei.

20 Te rave nei au i te mea anoano koreia e au ra, kare ïa au tei rave, ko te kino ra e vai i roto iaku nei.

21 Te kite nei au i tetai ture, e kia anoano au i te rave i te mea meitaki ra, te vaitata ua nei te kino iaku i reira.

22 Te rekareka nei oki au i te ture a te Atua i te akonoanga i te tangata i roto ra;

23 Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.

24 Aue oki au ko te tangata mate maata e! naai au e akaora i teianei kopapa mate?

25 E akameitaki au i te Atua i te mea e ora i to tatou Atu ra ia Iesu Mesia. E teianei, te akono nei toku vaerua i te ture a te Atua: kareka toku nei kopapa, ko te ture ïa o te kino.