Kolosa

2 TE inangaro nei oki au kia kite kotou, e e taitaia maata toku ia kotou, e i to Laodikea, e te aronga katoa kare i kite i toku mata i te kopapa nei;

2 Kia pumaana to ratou ngakau, i te tau okotai anga i te aroa, kia rauka te apinga maata katoa ra, te kite pu tikai kia āriki i te tuatua ngaro a te Atua Metua e ta te Mesia ra oki;

3 Tei vaoo katoatoaia te apinga ra o te pakari e te kite i roto iaia ra.

4 Ko te pikikaa mai aea tetai tangata atu ia kotou i te tuatua tarekareka, i na reira atu ei au.

5 Taka ke ua mairai taku kopapa, tei i o kotou rai toku vaerua, i te rekareka anga, e te akara anga atu i to kotou akono meitaki, e te tinamou o to kotou akarongo i te Mesia ra.

6 E tenana, kua āriki kotou i te Atu ra i te Mesia ia Iesu, kia akono kotou i tana:

7 Kia akaia ki roto iaia, e kia patuia ki rungao iaia, e kia akatinamouia kotou i te akarongo, mei tei apiiia atu ia kotou na, kia maata atu te reira ma te akameitaki.

8 E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.

9 Tei roto iaia oki te ki katoa o te Atua i te noo marie anga.

10 E kua meitaki rava kotou iaia, te upoko ïa i te aronga mana e te aronga au katoa ra:

11 Kua peritomeia oki kotou i roto iaia i te peritome rave koreia e te rima ra, ko te kopapa o te kino i kopaeia i te peritome a te Mesia ra;

12 I tanumia kotou ma ia katoa i te bapetizoanga ra, e kua akatu katoaia i reira i te akarongo i te ravenga a te Atua ra, ko tei akatu iaia mei te mate maira.

13 Ko kotou oki, ko tei mate i ta kotou ara, e te peritome kore i to kotou kopapa, tei akaora katoaia e ia, kua oti i te akakoreia ta kotou ara tini ravarai;

14 Kua taparaia oki te ture i tataia no tatou ra, e tona katoa au oroa, tau kore ia tatou ra, e kua apai keia, koia i patiti i te reira ki rungao i tona satauro;

15 Kua pou iaia te aronga au e te aronga mana ra, kua akariro atura ia ratou ei matakitaki anga i te ngai atea, ma te autu i rungao ia ratou i tona satauro.

16 E tenana, auraka ei tangata e akaapa ua atu ia kotou i te kai, e i tei inumia oki, e te rā tapu ra, e te marama ou, e te Sabati:

17 E ata anake ïa no te ka tupu a muri atu: kareka te kopapa tika ra, ko te Mesia ïa.

18 Auraka kotou e ngere i to kotou tutaki i tetai tangata atu i te inangaro anga i te taakaaka e te akamori i te au angela, e i te akao ua anga i te mea kitea koreia e ia, i te akanengonengo puapinga kore a tona uaorai ngakau i te tau i ta te kopapa ra,

19 Kare i mou piri tikai i te upoko, nona te kopapa katoa ra i te au topirianga, e te au paunga anga, i tupu ei i te tupu a te Atua ra.

20 E teianei kua mate kotou i te Mesia ra i te au apiianga mua o teianei ao, eaa oki kotou e akono ei i te au peu ra, mei te mea e te ora ua nei rai i teianei ao,

21 (Ma te tuatua e, Auraka e arapaki, auraka e tongi; auraka e akatukia;

22 I tei pou ua oki taua au mea nei kia raveia ra;) i ta te tangata i akaue mai e tana i apii mai oki?

23 E au mea tu meitaki oki taua au mea ra i te akamori a te tangata nei, te taakaaka ra, e te akaperepere kore i te kopapa nei; kare ra e akameitakiia, e mea tarekareka tangata nei.