Ioane

16 I AKAKITE atu ei au kia kotou i teianei au tuatua, kia kore kotou e maitu.

2 E tuku ratou ia kotou ki vao i to ratou au sunago ra: e kua vaitata oki te ora, e manako ei te tangata e ta ia kotou na e, kua akamori i te Atua.

3 E pera mai ratou ia kotou, no te mea kare ratou i kite i te Metua, e iaku oki.

4 Te akakite atu nei au kia kotou i teia au tuatua, kia tae ki taua ora ra, kia manako kotou e, kua akakite atu au kia kotou i taua tuatua ra. Kare oki au i akakite atu kia kotou i taua au mea ra i muatangana, no te mea tei vaitata ra au ia kotou.

5 E teianei te aere tika nei au kiaia i tei tono mai iaku nei ra; e kare akerai tetai o kotou i ui mai e, Ka aere koe kiea?

6 No te mea i akakite ateaia atu e au kia kotou teianei au tuatua, te ki ra to kotou ngakau i te aue.

7 E tuatua-mou ra taku e karanga atu kia kotou nei, E meitaki ei kotou ko au e aere ke nei: angairi au kare e aere ke, kare e riro mai te Akapumaana kia kotou nei: kia aere ke ra au, naku ïa e tono mai iaia kia kotou nei.

8 Kia riro maira aia, nana ïa e akakite mai ki to te ao i te ara, e te tuatua-tika, e te akaapa:

9 Ko te ara ra, ko ratou kare i akarongo mai iaku ra;

10 Ko te tuatua-tika ra, ko au e aere ki taku Metua ra, kare atura kotou e kite mai iaku;

11 Ko te akaapa ra, ko te ariki o teianei ao i akaapaia ra.

12 E manganui ra taku tuatua e akakite atu kia kotou, kare ra e tika ia kotou i teianei.

13 Kia tae maira aia, ko te Vaerua tuatua-mou ra, nana ïa e arataki ia kotou ki te tuatua-mou katoatoa: kare oki tana tuatua e riro nana uaorai; ko tana ra e akarongo ra, ko tana ïa e tuatua mai: e nana oki e akakite mai kia kotou i te au mea e tupu a muri akera.

14 E akakakā aia iaku: e rave oki aia i taku ra, ka akakite atu ei kia kotou.

15 Ko te au mea katoa o te Metua ra, naku ïa; i karanga atu ei au e, e rave aia i taku ra, ka akakite atu ei kia kotou.

16 Kia roaroa iti ake, kare atura kotou e akara mai iaku; e roaroa iti akera oki, kua akara mai kotou iaku: no te mea te aere tika nei au ki te Metua ra.

17 Kua karangaranga iora e tokotai puke pipi ia ratou uaorai e, Eaa teia tana i tuatua mai kia tatou nei e, Kia roaroa iti ake, kare atura kotou e kite iaku: e roaroa iti akera oki, kua akara mai kotou iaku: e no te mea te aere tika nei au ki te Metua ra?

18 I tuatuaʼi oki ratou e, Eaa ra taua roaroa iti akera tana i tuatua nei? Kare tatou i kite i tana tuatua.

19 Te kite aturā Iesu e, te inangaro ra ratou e ui mai kiaia, kua karanga atura aia kia ratou, Te ui ua na kotou uaorai i te tuatua taku i karanga atu na e, Kia roaroa iti ake, kare atura kotou e akara mai iaku: e e roaroa iti akera oki, kua akara mai kotou iaku?

20 Tika, tika tikai taku e karanga atu kia kotou, E aue kotou, e e mii oki, ko to te ao ra, e kata ïa: e mii kotou, kareka ra to kotou mii, ka akariroia ïa ei rekareka.

21 E aue te vaine kia rokoia e te anau ra, no te mea kua tae ki tona ora: kia anau ra te tamaiti, kare atura aia i manako i te mamae i te rekareka, i te mea e tangata tei anau mai ki te ao nei.

22 Koia oki kotou ka aue i teianei: e kite akaou maira au ia kotou, e e mareka to kotou ngakau, e kare rava to kotou rekareka e riro ia etai ke.

23 E kia tae ki taua rā ra, kare kotou e ui mai kiaku. Tika, tika tikai taku e karanga atu kia kotou, Ta kotou e pati atu i te Metua ma toku ingoa, nana ïa e o mai kia kotou na.

24 Kare rai a kotou apinga i pati ma toku nei ingoa: ka pati, e rauka ïa ia kotou, kia ki tikai oki kotou i te rekareka.

25 I apii paraboleia atu kotou e au i teianei au tuatua: te vaitata mai nei ra te ora, e kore ei au e apii parabole akaou atu ei kia kotou, e akakite ua atura kia kotou i te tuatua a te Metua ra.

26 Ei reira kotou e pati ake ei ma toku nei ingoa: e kare oki au e tuatua kia kotou e, naku e pure atu ki te Metua ia kotou.

27 Te anoano maira oki te Metua ia kotou, ko kotou i anoano mai iaku nei, e kua akarongo e, mei ko mai au i te Atua ra.

28 I aere mai nei au ki te ao nei, mei mua mai i te aroaro o te Metua ra: te akaruke nei au i teianei ao, e te oki nei au ki te Metua ra.

29 Kua tuatua maira tana au pipi kiaia, I na, kua tuatua pu ua mai koe i tenana, kare e tuatua parabole.

30 Kua kite atura matou i teianei e, kua ope rava te au mea katoa i te kitea ia koe, auraka atu rai tetai tangata e ui atu ia koe: ko te mea teia i akarongo ei matou e mei ko mai koe i te Atua ra.

31 Kua karanga aturā Iesu kia ratou, Kua akarongo ainei kotou i tenana?

32 I na, te vaitata mai nei te ora, e teianei rai oki, e pueurikiriki ke atu ei kotou, ko te tangata ko tona uaorai kainga, akaruke maira iaku ko au anake ua: kare ra ko au anake ua, te vaitata katoa ra oki te Metua iaku.

33 I akakite atura au kia kotou i teianei au tuatua, kia rauka to kotou au iaku nei. E tumatetenga to kotou i teianei ao: ka akamaroiroi ra, kua riro te re o teianei ao iaku.