Iobu

1 TEI te enua ra ko Uza tetai tangata, ko Iobu te ingoa; e tangata apa kore, e te tiratiratu, i te mataku anga i te Atua, e te akaruke anga i te kino.

2 E anau maira ana puke tamariki tamaroa toko itu, e nga tamaine toko toru.

3 E ko ana puke apinga, e itu tausani ïa i te mamoe, e toru tausani kamela, e okotai tausani i te puakatoro, e rima anere asini ua, e te ngutuare tangata e manganui ua atu; e maata rava atura aia, i to te itinga o te rā katoa ra.

4 Aere iora tana ra au tamariki tamaroa kua akatupu umukai ngutuare, ratou ravarai i tona uaorai rā anau ra; e kua tono e tiki i nga tuaine toko toru no ratou ra, kia kai, e kia inu ma ratou katoa ra.

5 E ope akera nga rā kaingakai ra, kua tiki aturā Iobu e akatapu ia ratou, e kua tu akera aia i te popongi metua, e kua apai i te atinga karakaratio na ratou ravarai e pini ua ake: te karanga ra oki a Iobu, Peneiake kua ara taua au tamariki naku nei, e kua akakino i te Atua i to ratou ngakau. I pera oki a Iobu i te au rā katoa ra.

6 E tae akera ki tetai rā, kia aere mai te au tamariki a te Atua e akakite ia ratou uaorai kia Iehova, kua aere katoa mairā Satani i rotopu ia ratou.

7 E kua karanga aturā Iehova kia Satani, Mei ea mai koe? Kua tuatua mairā Satani kia Iehova, na ko maira, Mei te oriori anga i te enua nei, e te aaere ua anga i reira.

8 E kua karanga aturā Iehova kia Satani, Kua akamaara ainei koe i toku tavini ia Iobu, kare oki ona e aite i runga i te enua nei, e tangata apa kore e te tiratiratu, i te mataku anga i te Atua, e te akaruke anga i te kino?

9 Kua tuatua mairā Satani kia Iehova, na ko maira. E mataku oko kore ua ainei a Iobu i te Atua?

10 Kare ainei tei koropiniia aia e koe, e tona ra are, e tana katoa ra au mea ravarai e pini ua ake? kua akameitaki koe i ta tona rima i rave ra, e kua maata tana apinga i te enua nei.

11 Ka akatika ua atura koe i to rima i tenana, ka rave atu ei i tana e kia ope rava, kare aia e kore i te akakino ia koe ki mua i to mata.

12 E kua karanga aturā Iehova kia Satani, I na, ko tana katoa ra, tei to rima ïa; auraka ra to rima e rave ua atu iaia uaorai. Aere aturā Satani mei te aroaro atu o Iehova.

13 E tae akera ki tetai rā, te kaikai ra tana au tamariki tamaroa, e tana au tamaine, e te inu ra i te wina, i te are o to ratou tuakana:

14 Te aere maira tetai karere kia Iobu, e kua na ko maira, Te arote ra te au puakatoro, e te kaikai ra te au asini i vaitatao ia ratou:

15 Kua noni ua maira te ngati Seba ia ratou, e kua apai keia; e kua taia e ratou te au tavini ki te mata koke ra; e ko au anake uaorai tei ora mai nei e akakite kia koe.

16 E te tuatua ua ra aia, te aere maira tetai, e kua na ko maira, Kua topa maira te ai a te Atua no te rangi mai, ka atura te au mamoe, e te au tavini, e kua pou iora ratou; e ko au anake uaorai tei ora mai nei e akakite kia koe.

17 Te tuatua ua ra aia, kua aere maira tetai, e kua na ko maira, Kua akataka iora te Kaledea i nga takanava e toru, e kua noni iora i te au kamela, e kua apai ke atura ia ratou, e kua taia oki te au tangata ou ki te mata koe; e ko au anake uaorai tei ora mai nei e akakite kia koe.

18 Te tuatua ua ra aia, kua aere maira tetai, e kua na ko maira, Te kaikai ra to au tamariki tamaroa, e to au tamaine, e te inu ra i te wina, i roto i te are o to ratou tuakana:

19 E i na, ko te matangi viviki maira na runga mai i te medebara, mou maira i nga poo e a o te are ra, inga iora ki runga i taua au tangata ou ra, e mate iora ratou; e ko au anake uaorai tei ora mai nei e akakite kia koe.

20 Kua tu mairā Iobu ki runga i reira, e kua aeae i tona kakau, e kua varu i tona upoko,e kua akainga iora ki raro i te one, kua akamori,

21 E kua tuatua akera, I aere taaka ua mai au mei roto i te kopu o taku metua vaine, e ka oki taaka ua atu rai au ki reira: na Iehova i oronga mai, e na Iehova i rave mai; kia akameitakiia te ingoa o Iehova.

22 Kare a Iobu i araia i taua au mea katoa nei, e kare oki i akaapa i te Atua.