Iakobo

1 IAKOBO, te tavini no te Atua, e no te Atu ra no Iesu Mesia, i te au kopu tino ngauru ma rua i pueurikiriki ke ra, Kia ora na.

2 E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa;

3 Kua kite oki kotou e, na taua timata anga i to kotou akarongo ra e akatupu i te akakoromaki.

4 E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.

5 Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana.

6 E pati ra aia ma te akarongo, e te ekoko kore: ko tei ekoko ra, e tau ïa i te ngaru tai e puia e te matangi, e tikitiki akera.

7 Auraka oki te reira tangata e manako e, ka rauka tana i te Atu ei ngai mea ngiti ake:

8 E tangata ngakau rua ïa, e te tinamou kore, i tona katoa ra au aerenga.

9 Kia rekareka te taeake akaaka i te mea aia i akateiteiia:

10 E te taeake apinga maata ra, i te mea aia i taakaakaia: e ngaro atu oki aia mei te tiare o te ngangaere ra.

11 Kua teitei anake oki te rā ma te veravera maata ra, kua mae te ngangaere, topa iora tona tiare, kare atura taua tu manea nona ra; mei te reira katoa to te tangata apinga ra kore anga i tona aerenga.

12 E ao to te tangata e akakoromaki i te timataanga: kua akatika anakeia mai aia ra, e rauka ïa iaia te korona ora, ta te Atu i tuatua mai e no te aronga i anoano iaia ra.

13 Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata:

14 Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore.

15 E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.

16 Auraka e vavare, e aku au taeake akaperepere e.

17 Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra, kare rava e tu ke ke iaia ra, kare oki e tu ke anga e ngai mea ngiti ua ake.

18 Nana tatou i anau i te tuatua-mou ra, no tona uaorai anoano, kia riro tatou mei te pipi mua o te au mea i angaia e ia ra.

19 E teianei, e aku au taeake akaperepere e, kia rapurapu ua te tangata ravarai i te akarongo, kia tavarevare i te tuatua, kia tavarevare oki i te riri:

20 Kare oki te riri o te tangata e akatupu i te tuatua-tika a te Atua.

21 E tenana e tuku ke atu i te au mea viivii ra, e te au mea kino maata ravarai, ka āriki marie ei ma te maru i te tuatua tanumia mai ki roto ra, e oraʼi oki to kotou vaerua.

22 Ei aronga rave oki kotou i te tuatua nei, auraka ei aronga akarongo ua, i te pikikaa ua anga ia kotou uaorai. 23 Ko te tangata oki e akarongo ua i te tuatua, e kare aia i rave, e tau aia i te tangata e akara ua i tona uaorai mata ki roto i te io ra:

24 Te akara ra aia iaia uaorai, e aere atura, ngaropoina ua iora tona tu iaia uaorai i reira ra.

25 Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.

26 Te manako ra tetai tangata ia kotou e, e akono tona i te Atua, e kare i tapeka i tona arero, te pikikaa ra i tona uaorai ngakau; e akono pikikaa tona i te Atua.

27 Ko te akono mou i te Atua e te kino kore i mua i te aroaro o te Atua, o to tatou Metua ra, ko teia ïa: Ko te takinga-meitaki i te matiroeroe e te au vaine takaua i to ratou mate anga e te tiaki iaia uaorai auraka ei viivii i teianei ao.