Maseli

3 E TAKU tamaiti, auraka e akangaropoina i taku nei ture; e kia akono marie toou ngakau i taku nei au akauenga:

2 E au rā roa oki, e te au mataiti ora, e te au, ta te reira e kapiti katoa mai kia koe ra.

3 Auraka rava te aroa e te tuatua-mou e taka ke ia koe ra: e ri piri tikai ki runga i to kaki na; e tata oki i te reira ki runga i te papa o toou ngakau:

4 E kite aroaia mai koe i reira, e te manako meitaki maataia mai, ki mua i te aroaro o te Atua e te tangata katoa nei.

5 E irinaki kia Iehova ma to ngakau katoa ra; auraka ra e irinaki ki toou uaorai kite.

6 Auraka e akangaropoina iaia i toou katoa ra au aerenga; e nana e akakite kia koe i toou ra au arataa.

7 Auraka koe kia pakari i toou uaorai manako: ko Iehova ra taau e mataku, ka akaruke ei i te kino.

8 Ko te ora ïa no toou ra au uaua, ko te matu ïa no toou ra au ivi.

9 E akangateitei atu ia Iehova i taau ra au apinga, e te mataiā o taau katoa ra apinga kia tupu:

10 Ka ki rava te au are vairanga apinga oou ra i reira, e ki oki taau au āriki i te wina ou e maringi ua atu.

11 Auraka koe e akavaavaa, e taku tamaiti, i te ako a Iehova, auraka oki e noongata i tana pāpā anga mai.

12 Ko tei akaperepreia e Iehova ra, ko tana ïa e pāpā mai; mei te metua i te tamaiti, tana i akaperepere ra.

13 E ao to te tangata i kitea iaia te pakari, e te tangata i rauka iaia te kite ra:

14 Ko te apinga oki i oko naʼi aia ra, e meitaki maata ïa i to te ario; e kia maata oki aia ra, e meitaki maata ïa i to te auro meitaki ra.

15 E meitaki maata tona i to te poe: e te au mea katoa i inangaroia e koe ra, kare rava ïa e aite kiaia.

16 E au rā roa tei tona rima katau; te apinga nui e te akangateitei, tei te rima kaui ïa.

17 Tona au arataa, e arataa mataora ïa; e e au tei tona ra au aerenga katoa.

18 Ko te rakau ora aia i te aronga e opu iaia; e ko tei tāpu iaia, e ao tona.

19 Kua akamou i Iehova i te tumu o te enua nei i te pakari; kua akatinamou aia i te au rangi i te kite.

20 Na tona kite i te puroro mai ei te moana, e i topatapata mai ei te au o te au rangi ra.

21 E taku tamaiti, auraka roa teia kia ngaro ke atu i to mata; e tāpu koe i te pakari meitaki e te akono;

22 Ko te ora ïa no toou ra vaerua, e ko te apinga manea ïa ki runga i toou ra kaki.

23 Ei reira koe e aere uaʼi na toou ra arataa ma te ora, e kare to vaevae e turori.

24 Kia moe koe ki raro ra, kare ïa e mataku: koia ïa, ka moe ua koe ki raro, e e rekareka taau moe.

25 Me viviki mai te akamataku, auraka e mataku; e te tairipoti anga o te aronga kino kia vaitata mai:

26 Ko Iehova oki toou irinaki anga, e nana e tiaki i to vaevae kia kore e piritia.

27 Auraka koe e tāpu i te meitaki i te tangata e tau iaia ra, e tei to rima rai taua meitaki ra kia o atu.

28 Auraka koe e karanga ki to tangata tupu ra, E aere, e oki akaou mai, apopo au e o atu ei kia koe ra; e te vai ra oki taua mea ra tei ia koe.

29 Auraka koe e kimi i te kino i to tangata tupu ra, te noo meitaki ua ra oki aia ki vaitata ia koe.

30 Auraka koe e māro ua atu ki te tangata kare e ara ra: e kare aia i takinga-kino mai ia koe ra.

31 Auraka koe e vareae i te tangata takinga-kino, e auraka e aere na tona katoa ra au arataa:

32 E mea viivii oki na Iehova te aronga māro ra, tei te aronga tuatua-tika ra tana muna.

33 Tei te are o te aronga kino te taumaa a Iehova: te akameitaki ra aia i te nooanga o te aronga tuatua-tika ra.

34 Te akavaavaa nei aia i te aronga e akavaavaa: kareka te aronga akaaka, te kite aroa nei aia ia ratou.

35 E rauka te kakā i te aronga pakari; ko te akateitei anga o te aronga neneva ra, ko te akama ïa.