Ebera

12 E TEIANEI, kua akapiniia tatou e taua urupu maata i kite nei, e kopae atu tatou i te au mea teiaa ravarai, e te ara e rokoia ngoie ei tatou nei, e oro tamou marie ei i teianei oroanga i tukuia mai ki mua ia tatou nei, 2 Ma te akara tamou kia Iesu i te tumu e te akaoti i to tatou akarongo; ko tei akakoromaki i te satauro, kare i akono i te akama, i te meitaki i tukuia mai ki mua i tona aroaro, e te noo ra i teianei i te pae katau i te terono o te Atua ra.

3 Akamaara marie oki iaia, ko tei akakoromaki i te reira tu akakino a te aronga rave ara iaia uaorai, kia kore kotou e akaroiroi, kia kore oki e taitaia to kotou ngakau.

4 Kare akerai ta kotou māro anga i tae i te maringi anga toto, i te kukumi anga i te kino ra.

5 E kua ngaro aina ia kotou te ako i akoia mai ia kotou mei te mea e tamariki ra, “Auraka koe e akavaavaa, e taku tamaiti, i te ako a Iehova, auraka oki e noongata i tana pāpā anga mai:

6 Ko ta te Atu e akaperepere ra, ko tana ïa e ako mai, e e pāpā rai aia i te au tamariki katoa tana i kite maira?”

7 Te akoia mai ana kotou mei te rave a te metua i te tamariki ra, ta te Atua i rave ia kotou; koai oki ïa tamaiti kare i akoia e te metua ra?

8 Kare kotou i akoia i te ako i te tamariki ravarai nei, e puti kotou, kare i te tamariki mou.

9 E e metua oki to tatou i to tatou kopapa nei, ko tei ako mai ia tatou, e kua akameangiti oki tatou; auraka kia maata atu to tatou kauraro i te Metua o to tatou au vaerua nei, e kia ora atu?

10 I ako mai oki ratou ia tatou i te reira puke rā kare i rainga, no to ratou uaorai anoano; kareka aia, kia meitaki tatou, kia rauka katoa ia tatou tona tapu.

11 Kare rava oki e ako e riro ei mea rekareka i reira ra, e mea aue ra: kareka i muri ake, ko te meitaki ra ïa, koia rai te tuatua-tika te tupu i taua ako ra, i te aronga i akamātauia i te reira.

12 E tenana “e apai i te rima i tautau ana ki raro ra i runga, e e akapakari i te turi paruparu;”

13 “E akatika ua oki i te ara o to kotou vaevae,” kia kore e tungongi ke te pirikoki, kia akaoraia ra.

14 E umuumu i te au i te tangata katoa nei e te tapu, kare oki e tapu ra, kare ua e tangata e kite i te Atu.

15 E akara marie rai, ko te ngere aea tetai i te aroa ua o te Atua ra; ko te tupu aea oki tetai tumu maamaa, pekapeka iora kotou, e viivii atura te tangata katoa e manganui;

16 Ko te tupu ua ake tetai akaturi, e te tangata akono kore i te Atua, mei ia Esau ra, ko tei oko i tana tuanga tama mua i te kai anga kai okotai ra.

17 Kua kite oki kotou e, kia anoano aia i taua meitaki ra i muri ake ei tuanga nana, kare aia i kiteia mai; kare rava e ngai tataraara anga i kitea e ia, umuumu ua atu ei aia i taua meitaki ra ma te roi-mata.

18 Kare oki ko te maunga e tika kia aa ta kotou e aere mai ana, e te ai i mura ra, e kare oki i te tumurangi kerekere, e te poiri, e te uriia ra,

19 E te tangi pu ra, e te aruru o te tuatua ra; i ta te aronga i akarongo ra i pati e, auraka rava ïa tuatua e tuatua akaouia mai kia ratou ra:

20 (Kare atura oki i tika ia ratou kia akakoromaki i tei akaueia maira, “E kia akatukia ua atu tetai puaka i taua maunga ra, ka peî tikaia ra aia ki te toka, e kare ra, ka ko ki te tao e mama roaia.”

21 E no te mataku maata i tei akakiteia maira, kua tuatua iorā Mose, Kua mataku rava au e te koriria:)

22 Ko te maunga ra ko Ziona ta kotou i aere mai nei, e te oire o te Atua ora ra, ko Ierusalema i te ao ra, e te pupu angela katoa kare e ope kia tatau ra;

23 Ki te uipa anga maata ra e te Ekalesia aronga tama mua ra, i tei tataia te ingoa i te ao ra, e te Atua oki i te akava i te tangata ravarai ra, e te au vaerua o te aronga tuatua-tika i akameitaki ravaia ra,

24 E kia Iesu oki i te arai o te koreromotu ou ra, e te toto pîpî anga ra, e tuatua meitaki maata to reira i to te toto o Abela ra.

25 E matakite kia kore kotou e patoi atu iaia e tuatua maira. Kare oki i ora te aronga i patoi i tei tuatua mai i runga i te enua nei, ka tangaʼi oki ia tatou kia ariu ke tatou iaia i tuatua nei no te rangi mai:

26 I tei ngaueue te enua i tona reo i reira: i teianei ra kua tuatua mai ïa aia, kua na ko maira, “Okotai aku akangaueue anga toe, kare oki te enua anake ra, ko te rangi katoa ra.”

27 E ko taua tuatua nei, “Okotai akangaueue anga toe,” no te akakore anga ïa i te au mea e ngaueue ua ra, mei te au mea i angaia ra, kia vai rai te au mea ngaueue kore ra.

28 E teianei kua rauka ia tatou te basileia ngaueue kore, e tāpu marie rai tatou i taua aroa ua ra, kia akamori tatou i te Atua ma te kiteia mai, ma te akaaka e te mataku:

29 E ai kakai oki to tatou Atua.