Mataio

12 I REIRA ra to Iesu aerenga na roto i te au koro sitona i te sabati; kua pongi iora tana au pipi, e kua uuti iora i te ua sitona, kai iora.

2 Te akara maira te au Pharisea, kua na ko maira kiaia, I na, te rave nei taau aronga pipi i te mea tau kore i te ture kia rave i te sabati.

3 Kua karanga atura aia kia ratou, Kare aina kotou i tatau i ta Davida i rave, e tei kapiti katoa iaia, ka pongi ei ratou ra;

4 E i tomo aia ki roto i te are o te Atua, e kua kai i te au manga no te aroaro ra, ko tei kore e tau i te ture kia kai aia, e tei kapiti katoa iaia, mari ra na te kau taunga anake ra?

5 E kare kotou i tatau i tei roto i te ture ra, e te akanoa nei te kau taunga i te sabati i roto i te iero i nga rā sabati katoa e kare e ara?

6 Te karanga atura oki au kia kotou, Tei ko nei tetai, e maata aia i te iero.

7 Naringa kotou i kite i te ariteanga o te manga tuatua ra e “Ko te aroa taku i anoano auraka te atinga,” kare kotou e akaapa mai i te aronga ara kore.

8 Ko te Tamaiti oki a te tangata nei, ko te Atu rai ïa o te sabati.

9 Akaruke maira aia i taua ngai ra, aere atura ki roto i to ratou sunago;

10 E i na, tei reira tetai tangata, kua marō te rima. Kua ui maira ratou iaia, na ko maira, E tika aina kia akaora i te rā sabati? kia rauka ta ratou tapepe anga mai iaia.

11 Kua karanga atura aia kia ratou, Koai ïa tangata i roto ia kotou na, okotai ana mamoe, e kia topa ki roto i te rua i te rā sabati, kare e rave atu, e kika mai ki runga?

12 E kare aina e rai to te tangata meitaki i to te mamoe? E tau mari i te ture kia takinga-meitaki i te sabati.

13 Kua karanga atura aia ki taua tangata i reira ra, Ka akatika mai na i to rima. Kua akatika maira aia, ora takiri akera, mei tetai katoa ra.

14 Aere atura te au Pharisea ki vao, e kimi iora i ta ratou tuatua iaia, e ta.

15 Kite akerā Iesu, kua aere ke atura; e e au urupu maata i te aru anga atu iaia, kua akaora atura aia ia ratou ravarai;

16 Kua ako atura aia ia ratou, auraka ratou e aaki iaia.

17 Tika rava atura te tuatua a Isaia peroveta ra, i na ko mai ei ra e,

18 “I na! taku tavini, tei ikiia e au ra; taku akaperepere, kua rekareka rava toku ngakau iaia: e tuku atu au i toku Vaerua ki runga iaia, e nana e tuku atu i te tuatua-tau ki te au etene.

19 Kare aia e taumāro atu, kare e akateitei i te reo; e kare tona reo e kitea i te au arataa ra.

20 Te kakao paruparu ra, kare aia e aati, e te lamepa matemate ra, kare aia e tinai, e kia akatupu ravaia e ia te tuatua-tau nana.

21 E i tona ingoa e irinaki ei te au etene ra.”

22 I apaiia maira kiaia i reira tetai tangata demoni, e matapo e te murare: akaora atura aia iaia, tuatua iora oki e kite atura taua matapo ra e te murare.

23 Kua tuatua iora te tangata tini katoatoa ra ma te va ua, Kare ainei teia i te tamaiti a Davida?

24 Kite akera te au Pharisea i te reira, kua na ko akera ratou, Kare teia tangata i tuaru i te demoni ki vao, mari ra, i te mana o te demoni maata ra o Belezebuba.

25 Kua kite rā Iesu i to ratou manako, e kua na ko atura kia ratou, Ko te basileia i mavete e rave iaia uaorai, e pou ïa; e te oire oki e te kopu-tangata i mavete ra e rave iaia uaorai, kare ïa e mou.

26 E kia tuaru a Satani ia Satani ki vao, kua mavete aia e rave iaia uaorai; eaa iora tona basileia e mou ei?

27 E te tuaru nei au i te demoni ki vao i te mana o Belezebuba ra, i te mana noai i tuaru ei ta kotou tamariki? e teianei, ei ia ratou te tuatua ia kotou.

28 Te tuaru nei ra au i te au demoni ki vao i te Vaerua o te Atua, kua rokoia io nei kotou e te basileia o te Atua.

29 Eaa oki e tikaʼi kia tomo i te are o te tangata maroiroi, e aō atu i tana apinga, kia kore aia e na mua i te tapeka i taua tangata maroiroi ra? ei reira e tikaʼi kia āru atu i tona are.

30 Kare aia i ko nei iaku nei, ko toku ïa enemi, e te kore e akaputuputu katoa mai, kua akapueurikiriki ke ïa.

31 E teianei, e karanga atu au kia kotou, e tika te au ara katoa e te akakino a te tangata nei kia akakore; kare ra te akakino i te Vaerua Tapu e akakoreia.

32 E ko te tuatua kino ki te Tamaiti a te tangata nei, e tika kia akakore i tana ara; kareka te tuatua kino i te Vaerua Tapu, kare tana e akakoreia i teianei ao, kare oki i te ao a muri atu.

33 E akameitaki na i te rakau, e akameitaki katoa i tona ua; kare ra, e akakino i te rakau, akakino katoa i tona ua; te kitea nei oki te tu o te rakau i tona uaorai ua.

34 E te anaunga vipera nei, eaa e tikaʼi ia kotou, te aronga kino, kia tuatua mai i te tuatua meitaki? no te ki oki o te ngakau ra e tuatuaʼi te vaa.

35 E tuku mai te tangata meitaki i te mea meitaki, no roto i tona putunga meitaki i roto i te ngakau; e tuku mai te tangata kino ra i te mea kino, no roto i tona putunga kino.

36 Te karanga atu nei au ia kotou e, E akavaia te tangata i te au tuatua puapinga kore katoa ta ratou e tuatua ra, kia tae ki te rā akavaanga ra.

37 E akatikaia koe i taau tuatua, e akaapaia koe i taau tuatua.

38 E tokotai aronga tata tuatua, ma te Pharisea, kua tuatua maira i reira, na ko maira, E te Orometua, te inangaro nei matou kia kite matou i tetai akairo ia koe.

39 Kua karanga atura aia kia ratou, na ko atura, E uki tangata kikino teia e te akaturi, te kimi nei i te akairo, kare ra e orongaia atu te akairo, mari ra te akairo i te peroveta ra ia Iona.

40 Mei ia Iona oki, e toru ona po, e toru oki ao, i roto i te kopu o te ika maata ra; ka riro katoa te Tamaiti a te tangata nei, e toru ona po ki raro i te enua, e toru oki ao.

41 E tu katoa mai te tangata o Nineve ki runga i te akavaanga ra, e akaapa mai i teianei uki; kua tataraara oki ratou i te ako angaia atu e Iona; e i na, e maata teia ia Iona.

42 E tu katoa mai te ariki vaine no apatonga ki runga, i te akavaanga ra, e akaapa mai i teianei uki: i te mea, i aere mai aia mei te openga mai o teianei ao, e akarongo i te tuatua pakari na Solomona; e i na, e maata teia ia Solomona.

43 Kia riro te vaerua viivii i roto i te tangata nei ki vao, kua aaere ua iora na te ngai papamarō, i te kimi anga i te akaangaroianga, e kare akera i kitea:

44 Kua na ko iora, Ka oki au ki taku are, mei reira mai au nei; e kia tae mai aia ra, kite iora e, kare o roto, kua oti i te oreiia, e kua akamaneaia.

45 Kua tiki atura aia, e kapiti katoa maira i e toko itu vaerua kino maata rava, e o atura ratou katoa ki roto, noo atura i reira; kino maata ua atu te openga o taua tangata ra i tei muatangana: Koia katoa oki teianei uki tangata kikino.

46 E te tuatua ua ra aia ki te tangata tini, i na, te tu ua maira tona metua vaine ki vao, e tona aronga taeake, i inangaro i te tuatua mai kiaia.

47 Kua karanga atura tetai kiaia, I na, te tu ua maira to metua vaine e to ai taeake ki vao, te inangaro i te tuatua mai kia koe.

48 Kua tuatua maira aia ki tei tuatua mai kiaia ra, na ko maira, Koai taku metua vaine? Koai oki toku ai taeake?

49 Kua tou atura tona rima ki tana aronga pipi, na ko maira, I na, taku metua vaine, e toku ai taeake!

50 Te akono i te inangaro o taku Metua i te ao ra, ko toku ïa taeake, taku tuaine, e taku metua vaine.