1 Tesalonia

2 KUA kite oki kotou uaorai, e te au taeake e, kare to matou o anga atu ki roto ia kotou na i te mea puapinga kore:

2 Kua kite oki kotou e mate ua matou i muatangana, e te takinga-kino maataia mai, i Philipi ra, i maroiroi ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata. 3 E kare oki ta matou ako anga atu ia kotou i te tuatua apa, kare oki i to te kino, kare oki i te pikikaa:

4 Ko matou ra i akatikaia e te Atua kia tuku mai i te evangelia ia matou nei, koia oki matou i tuatuaʼi; auraka ei akarekareka i te tangata, i te Atua ra, ko tei akara matariki i to matou ngakau.

5 Kare ua oki a matou e tuatua taparu, kua kite oki kotou, kare oki e uuna i te noinoi apinga; ko te Atua te kite:

6 Kare oki i umuumu i ta te tangata akameitaki, kare i ta kotou, kare oki i ta tetai ke, e tika ua ra ia matou i te Aposetolo a te Mesia nei kia akateiaa ia kotou.

7 I maru ua ra matou i rotopu ia kotou: mei te metua i matuapuru i tana tamariki;

8 Koia katoa matou, no te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou. 9 Kare oki i ngaro ia kotou, e te au taeake, i ta matou angaanga e te roiroi: i te rave anga i te angaanga i te po e te ao, kia kore oki kotou kia teimaa ia matou, i te tuatua anga atu ia kotou i te evangelia a te Atua.

10 Ko kotou oki te kite e te Atua katoa, i te meitaki anga, e te tika anga, e te ara kore anga, o ta matou tuatua i rotopu ia kotou i te aronga akarongo:

11 Kua kite oki kotou i ta matou ako anga atu e te akapumaana anga atu e te akaue anga atu ia kotou ravarai, mei te metua i tana tamariki,

12 Kia tau to kotou aerenga i te Atua ra, i tei kapiki ia kotou no tona basileia e no te ao.

13 E te akameitaki katoa nei matou i te Atua kare e tivata, i te mea, ka āriki mai ei kotou i te tuatua a te Atua ta kotou i kite ia matou nei, kare kotou i āriki ei tuatua na te tangata, ei tuatua ra na te Atua, e koia tika rai oki, ko tei angaanga maroiroi i roto ia kotou i tei akarongo ra.

14 Riro atura oki kotou, e te au taeake, ei aru i te au ekalesia a te Atua i roto i te Mesia ra ia Iesu i Iudea ra; okotai rai tu to kotou uaorai, e to ratou i te ngati Iuda;

15 I tei ta i te Atu ra ia Iesu, e ta ratou uaorai au peroveta, e kua takinga-kino mai ia matou nei; kare rava te Atua i mareka ia ratou, e e enemi oki ratou no te tangata ravarai;

16 I te akakore anga mai i ta matou ako anga atu i te etene kia ora ratou, i te akaki ua anga i te arite i ta ratou ara, te vaitata maira ra te riri o te Atua ia ratou e tae ua atu ki te mate maata ra.

17 Ko matou nei ra, e te au taeake, i akataka keia akenei matou ia kotou i te ora iti okotai nei, i te akonoanga i te kopapa, kare ra i te ngakau, umuumu ua akenei ma te inangaro maata kia kite to kotou mata.

18 I anoano ei oki matou e aere atu ia kotou na ka tu tai, e ka tu rua oki, ko au nei rai ko Paulo; na Satani ra i akakore.

19 Eaa oki to matou irinakianga, e te rekareka anga, e te korona rekareka anga? Kare aina ko kotou i mua i te aroaro o to tatou Atu ra, ko Iesu Mesia kia tae mai aia ra?

20 Koia ïa, ko kotou to matou kakā e to matou rekareka.