Roma

3 EAA oki ta te ngati Iuda ngai i maata? e eaa te puapinga o te peritome?

2 E maata ïa i nga mea ravarai, ko te tuatua ra a te Atua i tukuia mai ia ratou ra, te mea maata.

3 Kare tetai papaki i akarongo ra, eaa to reira? na to ratou akarongo kore ainei e akakore i te tuatua-mou a te Atua?

4 Kare rava ïa: kia riro atu te tangata ravarai ei pikikaa, e tuatua-mou rai ta te Atua; koia oki tei tataia ra e, “Kia tika taau me tuatua koe, e kia apa kore taau me akavaia koe.”

5 Kia akameitaki ra ta tatou tuatua-tika kore i te tuatua tika a te Atua ra, akapeea tatou? kare aina i ē te Atua ra ko tei tuku mai i te mate nei? (mei ta te tangata taku e tuatua nei.)

6 Kare rava ïa; eaa oki te Atua e tikaʼi kia akava i to te ao nei i reira?

7 Kua maata oki te meitaki o te Atua i te tuatua-mou nana i taku nei pikikaa; eaa iora au i akaapaia mai ei ei tangata ara?

8 Eaa oki i kore ei i tika kia karanga atu e, Ka rave tatou i te tuatua kino kia tupu te meitaki? (ko tei tapikipiki aereia matou nei, e ta tetai pae i karanga nei e, te akapera nei matou,) kua tika te akaapa ia ratou.

9 Te aa nei oki i teianei? te maata nei to tatou meitaki? Kare rava ïa; kua taka oki ia tatou e, te vai ara ua nei te ngati Iuda e te Eleni katoa oki:

10 Koia oki tei tataia ra e, kare rava e tangata tuatua-tika, e okotai iti ake:

11 Kare ua tetai i kite, kare rava tetai i kimi i te Atua:

12 “Kua ope rava i te aere ke, e kua riro oki ratou ei mea puapinga kore: kare rava tetai i rave i te meitaki, e okotai iti ake.”

13 “E vaarua turuma i tuera ua ra to ratou karaponga; na to ratou arero e pikikaa mai;” “te kavangia asepi tei roto i to ratou ngutu;”

14 “Kua ki to ratou vaa i te tao e te akakino oki:”

15 “E viviki to ratou vaevae i te akamaringi toto:

16 Ko te mate e te mamae maata tei to ratou aerenga:

17 Kare ratou i kite i te mataara au:”

18 “Kare rava e mataku i te Atua i mua i to ratou mata.”

19 Kua kite oki tatou e, te tuatua ravarai a te ture i tuatua maira, i tuatua mai ïa i te aronga i raro ake i te ture ra: kia piri te au vaa ravarai, e kia araia to te ao katoa nei i mua i te aroaro o te Atua.

20 E teianei, kare rava e tangata e akatikaia i mua i te aroaro o te Atua i te angaanga a te ture ra: no te ture mai oki te kite i te ara.

21 I teianei ra, kua kitea mai nei te tuatua-tika a te Atua i te ture kore, i akakiteia mai ïa i te ture e te au peroveta ra:

22 Koia oki te tuatua-tika a te Atua i te akarongo anga ia Iesu Mesia, i te tangata katoatoa, e ki runga i te aronga ravarai e akarongo; kare ua e tu ke ke:

23 Kua rave katoatoa oki i te ara, e kua ngere i te akameitaki a te Atua;

24 I akatika uaia mai e tona aroa ua, i te ora e vai i te Mesia ra ia Iesu;

25 Ko ta te Atua i tuku mai ei akaongi, kia irinaki i tona toto, ei akakite anga mai i tana tuatua-tika i te akakore anga i te au ara i raveia i muatangana, i te akakoromaki anga o te Atua;

26 Ei akakite anga mai oki i tana tuatua-tika i teianei: kia tika tana tuatua, ka akatika mai ei aia i te tangata i akarongo ia Iesu ra.

27 Eiea iora te nengonengo? Kua akakoreia ïa. Na teea ture? na te ture angaanga aina? Kare: na te ture akarongo ra.

28 E teianei, teia ta matou tuatua, i akatikaia te tangata i te akarongo, auraka i te angaanga a te ture.

29 E Atua aina aia no te ngati Iuda anake ra? kare aina no te etene katoa? No te etene katoa ïa:

30 Okotai oki Atua e akatika mai i te peritome i te akarongo, e no te akarongo katoa oki e tika mai ei te peritome kore.

31 Te akakore nei aina matou i te ture i te akarongo nei? Kare rava ïa: te akatinamou nei rai matou i te ture.